بۇگىن قازاق-قىرعىز جاستار فورۋمىنىڭ اياسىندا شوقان ءۋاليحانوۆتىڭ ءومىرى مەن قىزمەتىنە ارنالعان دەرەكتى ءفيلمنىڭ تانىستىرىلىمى ءوتتى. بۇل تۋرالى مادەنيەت جانە اقپارات ءمينيسترى ايدا بالاەۆا مالىمدەدى، دەپ حابارلايدى «ادىرنا» ءتىلشىسى.
ول تۋىندىدا عالىمنىڭ قىرعىز حالقىنىڭ تاريحى مەن ەتنوگرافياسىن تەرەڭىرەك تانۋعا قوسقان زور ۇلەسى، سونداي-اق «ماناس» ەپوسىن ناسيحاتتاۋداعى ءرولى كەڭىنەن باياندالاتىنىن اتاپ ءوتتى.
«بەلگىلى بولعانداي، الەمگە تانىمال «ماناس» ەپوسى – قىرعىز حالقىنىڭ رۋحاني قازىناسى. الايدا ونى العاش رەت حاتقا ءتۇسىرىپ، كەڭ اۋديتورياعا ۇسىنعان تۇلعا – كورنەكتى قازاق عالىمى، ەتنوگراف شوقان ءۋاليحانوۆ ەدى. مەنىڭ ويىمشا، ونىڭ تاعى ءبىر ماڭىزدى ەڭبەگى – «ىستىقكولگە ساپار كۇندەلىگى». بۇل شىعارما – قازاق پەن قىرعىز حالىقتارىنىڭ عىلىمداعى، رۋحانياتتاعى بىرلىگىنىڭ ايقىن عىلىمي كۋالىگى»،—دەدى مينيستر.
سونداي-اق ايدا بالاەۆا قىرعىز رەسپۋبليكاسىنىڭ مەملەكەتتىك حاتشىسى مارات يمانقۇلوۆتىڭ قاتىسۋى ءىس-شارانىڭ مارتەبەسىن ودان سايىن ارتتىرا تۇسكەنىن اتاپ ءوتتى.
«تاعى ءبىر قۋانتارلىعى – ءبىزدىڭ ەلدەردىڭ جاستارى مەملەكەتتەرىمىز اراسىنداعى ىنتىماقتاستىقتى تەرەڭدەتىپ، نىعايتاتىن – ءدال وسىنداي ۇلى تۇلعالار ەكەنىنە تاعى ءبىر مارتە كوز جەتكىزدى»،—دەپ تولىقتىردى ول.
ايتا كەتەيىك، بۇگىن پرەزيدەنت قاسىم-جومارت توقاەۆ قىرعىزستانعا رەسمي ساپارمەن بارعان بولاتىن.
