ەندى لەگيونەرلەرگە شەكتەۋ الىنىپ تاستالادى. بۇل تۋرالى قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ مالىمدەمە جاسادى، دەپ حابارلايدى “ادىرنا” ۇلتتىق پورتالى.
ول بيىلدان باستاپ فۋتبولدا شەتەل لەگيونەرلەرىنە قويىلاتىن شەكتەۋدىڭ الىنىپ تاستالاتىنىن ايتىپ، ونىڭ قازاق فۋتبولىنا پايدالى جاعىن ءتۇسىندىرىپ بەردى.
«سوڭعى 15 جىلدا لەگيونەرلەردىڭ ۇلەسىنە بايلانىستى ءتۇرلى ەكسپەريمەنت بولدى. الايدا ول اۋىز تولتىرىپ ايتارلىقتاي ناتيجە بەرمەدى. ونى وزدەرىڭىز دە كورىپ، جاقسى ءبىلىپ وتىرسىزدار. سوندىقتان ءبىز سوڭعى 2 جىلدا ساراپتاما جۇرگىزىپ، ەرەجە قابىلدادىق»، – دەدى ادىلەت بارمەنقۇلوۆ.
سونداي-اق، ەگەر بۇرىن الاڭعا 7 لەگيونەر شىعاتىن بولسا، ەندى ولاردىڭ سانىنا شەكتەۋ الىنىپ تاستالادى. بىراق ءوتىنىش بەرگەن كەزدە 25 فۋتبولشىنىڭ 13-ءى قازاقستان فۋتبولىنىڭ وكىلى بولادى. بۇل الدىمەن باسەكەلەستىكتى ارتتىرادى. دەمەك فۋتبول داميدى.
ەكىنشىدەن، كاسىبي فۋتبول كلۋبتارىن اگەنتتەردىڭ كولەڭكەلى جۇيەسىنەن قورعايدى. نارىقتىق ەڭبەكاقى جۇيەسى جاسالىپ، جالاقىنى جاساندى كوبەيتۋ بولمايدى.
ۇشىنشىدەن، حالىقتىڭ فۋتبولعا دەگەن قىزىعۋشىلىعى ارتادى. ستاديوندار جانكۇيەرگە تولادى. دەمەك جاڭا زاماناۋي ستاديونداردىڭ قۇرىلىسىنا قاجەتتىلىك پايدا بولادى.
«وسىلايشا، حالىقتىڭ چەمپيوناتقا دەگەن قىزىعۋشىلىعى ارتسا، ءبىز ينۆەستورلاردىڭ دا قىزىعۋشىلىعىن وياتامىز. سوندا عانا ءبىز فۋتبولدى مەملەكەتتىك قارجىلاندىرۋدان گورى، جەكە كاسىپكەرلەردىڭ ينۆەستيتسياسىمەن قارجىلاندىرا الامىز. وسى ويىمىز ىسكە اسسا، ءبىز فۋتبولدىڭ بيزنەس يندۋسترياسىن قۇراتىن بولامىز. ول كلۋبتىڭ جۇمىسىنا دا پايداسىن تيگىزىپ، فۋتبولشىلارعا موتيۆاتسيا بەرىپ، سۇيىكتى ىسىمەن اينالىسۋعا تالپىنىسىن وياتادى. بۇل وزگەرىستەر كلۋبتاردىڭ بالالار فۋتبولىن دا قارجىلاندىرۋعا سەپتىگىن تيگىزەدى. ولار ءوز ويىنشىلارىن تاربيەلەپ، ترانسفەر ارقىلى قارجى تابا الادى»، – دەدى ادىلەت بارمەنقۇلوۆ.
قفف باسشىسى ەرەجەدەگى وزگەرىستەر ۇلتتىق قۇرامانىڭ ويىندارىنا دا اسەر ەتەتىنىن، سوندا عانا ەلىمىزدىڭ باس كومانداسى بارىنشا قازاقستان ازاماتتارىنان جاساقتالاتىنىن دا ايتا كەتتى.
«ۇلتتىق قۇرامانىڭ ويىنشىلارىن قازاقستان ازاماتتارىنان جاساقتاۋ – فەدەراتسيانىڭ نەگىزگى ۇستانىمى»، – دەدى ول.
