Endı legionerlerge şekteu alynyp tastalady. Būl turaly Qazaqstan futbol federasiiasynyŋ prezidentı Ädılet Bärmenqūlov mälımdeme jasady, dep habarlaidy “Adyrna” ūlttyq portaly.
Ol biyldan bastap futbolda şetel legionerlerıne qoiylatyn şekteudıŋ alynyp tastalatynyn aityp, onyŋ qazaq futbolyna paidaly jaǧyn tüsındırıp berdı.
«Soŋǧy 15 jylda legionerlerdıŋ ülesıne bailanysty türlı eksperiment boldy. Alaida ol auyz toltyryp aitarlyqtai nätije bermedı. Ony özderıŋız de körıp, jaqsy bılıp otyrsyzdar. Sondyqtan bız soŋǧy 2 jylda saraptama jürgızıp, ereje qabyldadyq», – dedı Ädılet Bärmenqūlov.
Sondai-aq, eger būryn alaŋǧa 7 legioner şyǧatyn bolsa, endı olardyŋ sanyna şekteu alynyp tastalady. Bıraq ötınış bergen kezde 25 futbolşynyŋ 13-ı Qazaqstan futbolynyŋ ökılı bolady. Būl aldymen bäsekelestıktı arttyrady. Demek futbol damidy.
Ekınşıden, käsıbi futbol klubtaryn agentterdıŋ köleŋkelı jüiesınen qorǧaidy. Naryqtyq eŋbekaqy jüiesı jasalyp, jalaqyny jasandy köbeitu bolmaidy.
Üşınşıden, halyqtyŋ futbolǧa degen qyzyǧuşylyǧy artady. Stadiondar janküierge tolady. Demek jaŋa zamanaui stadiondardyŋ qūrylysyna qajettılık paida bolady.
«Osylaişa, halyqtyŋ chempionatqa degen qyzyǧuşylyǧy artsa, bız investorlardyŋ da qyzyǧuşylyǧyn oiatamyz. Sonda ǧana bız futboldy memlekettık qarjylandyrudan görı, jeke käsıpkerlerdıŋ investisiiasymen qarjylandyra alamyz. Osy oiymyz ıske assa, bız futboldyŋ biznes industriiasyn qūratyn bolamyz. Ol klubtyŋ jūmysyna da paidasyn tigızıp, futbolşylarǧa motivasiia berıp, süiıktı ısımen ainalysuǧa talpynysyn oiatady. Būl özgerıster klubtardyŋ balalar futbolyn da qarjylandyruǧa septıgın tigızedı. Olar öz oiynşylaryn tärbielep, transfer arqyly qarjy taba alady», – dedı Ädılet Bärmenqūlov.
QFF basşysy erejedegı özgerıster ūlttyq qūramanyŋ oiyndaryna da äser etetının, sonda ǧana elımızdıŋ bas komandasy barynşa Qazaqstan azamattarynan jasaqtalatynyn da aita kettı.
«Ūlttyq qūramanyŋ oiynşylaryn Qazaqstan azamattarynan jasaqtau – federasiianyŋ negızgı ūstanymy», – dedı ol.
Ūqsas jaŋalyqtar
