Batys Qazaqstan oblysynyŋ äkımdıgı densaulyq saqtau basqarmasynyŋ şaruaşylyq jürgızu qūqyǧyndaǧy Oblystyq köp beiındı auruhanasy «2024 jylǧa arnalǧan kartridjderdı toltyru qyzmetı» degen ataumen tender jariialady, - dep habarlaidy Adyrna ūlttyq portaly satypalu.gov.kz saityna sılteme jasap.
Tenderge qūjattar tapsyru 16 qaŋtarda bastalady. Jeŋımpaz 31 qaŋtar künı anyqtalady. Bır qyzyǧy, memlekettık satyp alu portalynda oblystyq biudjetten 4 million 200 myŋ teŋge bölıngen tender habarlamasy bır apta būryn jariialanǧan. Būǧan deiıngı jariialanymdar tek «ötınımdı qabyldau künı» bastalǧanda köpşılık nazaryna ūsynylatyn.
Tenderge qatysuşylar negızınen jaŋa jariialanǧan habarlamany ızdeidı. Demek, Batys Qazaqstan oblysyäkımdıgı densaulyq saqtau basqarmasyna qarasty auruhananyŋ būl tenderı 16 qaŋtar künı bas betten körınbei, bırneşe bet astyǧa tüsıp ketedı degen söz. Būl 4 million 200 myŋ teŋgelık habarlamany jasyrudyŋ joly emes pe?
Tehnikalyq sipattama «Janarmai qūiuǧa ötınım beru jäne kartridjderdı toltyru boiynşa basqa da mäseleler oryndauşynyŋ bailanys ortalyǧy (koll-ortalyǧy) arqyly jüzege asyrylady» degen jaŋyltpaş söilemmen bastalǧan. «Janarmai qūiuǧa ötınım beru» degen ne? Auruhana printerge benzin qūimaq pa? Ūzyn-sonar tehnikalyq sipattamadan tüsıngenımız auruhana 4 million 200 myŋ teŋgege 5 468 märte kartridj toltyrmaq eken. Är kartridjdı toltyru qūny şamamen 769 teŋgege baǧalanǧan. Bar bolǧany 30 türlı printer markasy körsetılgen. Olardyŋ ışınde bır jylda 778 märte kartridj toltyru kerek «HP LaserJet Pro M102a» degen marka bar. Mūndai markaly qanşa printer bar ekenı jazylmaǧan.
5 468 märte kartridj toltyrudy jyldyŋ 365 künıne bölsek, tapsyrys oryndauşy künıge 15 printerge qyzmet körsetuı kerek.
Oblystyq köp beiındı auruhanada qanşa printer bar? Bızdı osy sūraq mazalaidy? Būl sūraqtyŋ jauabyn tiıstı mekeme naqty bermese, oblys biudjetınen bölıngen 4 million 200 myŋ teŋgenıŋ dūrys maqsatta jūmsalyp jatqanyna köz jetkıze almaitynymyz anyq. Sol sebeptı kümän tudyrǧan saualdardy atalǧan mekemege joldadyq. Jauap kelıp jatsa, ony da jariialaityn bolamyz.
Qanat Bırlıkūly Adyrna ūlttyq portaly
