بۇگىن - حالىق جازۋشىسى، قر مەملەكەتتىك سىيلىعىنىڭ يەگەرى، اقىن قادىر مىرزا ءالىنىڭ تۋعان كۇنى.
كورنەكتى تۇلعا 1935 جىلى 5 قاڭتاردا باتىس قازاقستان وبلىسىنىڭ جىمپيتى كەنتىندە دۇنيەگە كەلگەن.
1958 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن تامامداعان. ەڭبەك جولىن سول كەزدە جاڭادان اشىلعان بالالار جۋرنالى «بالدىرعاننان» باستاعان. «جۇلدىز» جۋرنالى رەداكتسياسىندا پوەزيا جانە سىن ءبولىمىنىڭ مەڭگەرۋشىسى، جاۋاپتى حاتشى، باس رەداكتوردىڭ ورىنباسارى، 1968-1973 جىلدارى «جازۋشى» باسپاسىندا قازاق پوەزياسى ءبولىمىنىڭ مەڭگەرۋشىسى، «بالاۋسا» باسپاسىنىڭ رەداكتورى، كەيىن قازاقستان جازۋشىلار وداعىندا پوەزيا سەكتسياسىنىڭ كەڭەسشىسى بولعان. 1966 جىلى «وي ورمانى» جيناعى ءۇشىن قازاقستان لەنين كومسومولىنىڭ سىيلىعى بەرىلدى. 1980 جىلى «جەرۇيىق» جىر كىتابى ءۇشىن قازاق كسر مەملەكەتتىك سىيلىعىنىڭ لاۋرەاتى اتاندى. 2001 جىلى تاۋەلسىز «تارلان» سىيلىعىن الدى.
«ناعىز قازاق – قازاق ەمەس، ناعىز قازاق – دومبىرا» دەپ جىرلاعان بەلگىلى اقىننىڭ تۇڭعىش جيناعى «كوكتەم» 1959 جىلى جارىق كوردى. ونىڭ كەيبىر ولەڭدەرى ورىس، نەمىس، ەستون، قىرعىز، تاتار جانە باسقا تىلدەرگە اۋدارىلعان. ورىس تىلىندە 13 ولەڭدەر جيناعى جارىق كوردى. اقىننىڭ مەكتەپكە دەيىنگى جانە باستاۋىش مەكتەپ جاسىنداعى بالالارعا، ورتا جانە جوعارى سىنىپ وقۋشىلارىنا ارنالعان ولەڭدەردەن تۇراتىن كىتاپتارى بار.
قادىر مىرزا ءالىنىڭ ولەڭدەرى قازاق اقىندارىنىڭ «قازاق سوۆەت پوەزياسىنىڭ انتولوگياسى»، «رەسپۋبليكالاردىڭ كومسومولى 1969-1970 جىلدارداعى كومسومول سىيلىعىنىڭ لاۋرەاتتارىن ۇسىنادى»، «قازاق بالالار پوەزياسىنىڭ انتولوگياسى» سەكىلدى ۇجىمدىق جيناقتارىنا ەنگىزىلدى.
قازاقستاننىڭ حالىق جازۋشىسى، بەلگىلى اقىن قادىر مىرزا ءالى ءومىرىنىڭ سوڭعى جىلدارى ەكى رەت ينفاركت الىپ، 2011 جىلى 23-نەن 24-ءشى قاڭتارعا قاراعان ءتۇنى جۇرەگى توقتاپ قايتىس بولدى.
