بۇگىن - الاشوردانىڭ ادىلەت ءمينيسترى بولعان، 1-2 مەملەكەتتىك دۋمانىڭ مۇشەسى بولعان زاڭگەر احمەت ءبىرىمجانوۆتىڭ تۋعان كۇنى.
ءبىرىمجانوۆ احمەت قورعانبەكۇلى - 1871 جىلى تورعاي ۋەزى توسىن بولىسىنىڭ №1 اۋىلىندا دۇنيەگە كەلگەن قوعام قايراتكەرى، الاشوردا ۇكىمەتىنىڭ مۇشەسى، زاڭگەر. شاقشاق جانىبەك باتىردىڭ تىكەلەي ۇرپاعى.
حالىق ورتاسىندا ادىلدىگىمەن كورىنگەن قايراتكەر تورعاي وبلىسىنان 1906-1907 جىلدارى رەسەيدىڭ ءى جانە ءىى مەملەكەتتىك دۋمالارىنا دەپۋتات بولىپ سايلانعان. دۋمادا ول مۇسىلمان فراكتسياسىنىڭ بەلسەندى مۇشەسى بولعان. ءى دۋمانىڭ ماجىلىسىندە قازاق دەپۋتاتتارىن اگرارلىق كوميسسياعا ەنگىزۋ تۋرالى ماسەلە قويعان. 1906 جىلى قازاق دالاسىنا زاڭسىز ورنالاسۋشىلار مەن ولاردىڭ ورىنسىز باسىپ الىنعان جەرلەرى تۋرالى ءبىر توپ قايراتكەرلەرمەن بىرگە مينيسترلەر كەڭەسىنە سۇراۋ سالادى. ءىى دۋمادا قازاقتىڭ جەرىنە بايلانىستى ناقتى ماسەلە كوتەرىپ، مۇسىلمان فراكتسياسىنىڭ قاتىسۋىمەن اگرارلىق زاڭ جوباسىن دايارلاۋعا قاتىسقان.
1917 جىلى كوكتەمنەن باستاپ، ۋاقىتشا ۇكىمەتتىڭ تورعاي ۋەزدىك كوميسسارى، كەيىننەن ۋاقىتشا ۇكىمەتتىڭ قوستاناي ۋەزدىك كوميسسارى بولىپ تاعايىندالعان. 1917 جىلى 21-26 شىلدە ارالىعىندا ورىنبوردا وتكەن ءبىرىنشى جالپىقازاق سەزىندە تورعاي وبلىسى قازاقتارىنىڭ اتىنان بۇكىلرەسەيلىك قۇرىلتايعا دەپۋتات بولىپ سايلانىپ، ەكىنشى جالپىقازاق سەزىندە ا.ءبىرىمجانوۆ الاشوردا ۇكىمەتى - ۇلت كەڭەسىنىڭ قۇرامىنا سايلانعان. سول جىلعى جەلتوقساندا ول «الاش» پارتياسىنىڭ تورعاي وبلىستىق كوميتەتى 14 مۇشەسىنىڭ ءبىرى بولعان. الاشوردا ۇكىمەتى مۇشەلەرىنىڭ ۋفادا وتكەن كەڭەسىنە قاتىسىپ، الاشوردا ادىلەت ءمينيسترى بولعان.
1918-1926 جىلدارى سەمەيدىڭ زاڭ كەڭەسشىسى، ورىنبور مەن قىزىلوردا قالالارى قازاق اكسر-ءى ىشكى ىستەر، زاڭ حالىق كوميتەتتەرىنىڭ، جوعارعى سوت تورالقاسىنىڭ كەڭەسشىسى، القا مۇشەسى، ءبولىم مەڭگەرۋشىسى قىزمەتتەرىن اتقارعان.
ا.ءبىرىمجانوۆ 1927 جىلى لەنينگرادتا (سانكت-پەتەربور) قايتىس بولىپ، ۆولكوۆ زيراتىنا جەرلەنگەن.
وتباسىندا ايەلى گۇلجاۋھار - Əبىلقايىر حاننىڭ شوبەرەسى. ۇلى باتىربەك (1911-1985) - حيميك، اسپيرانت. ءال-فارابي اتىنداعى قازاق ۇلتتىق ۋنيۆەرسيتەتىنىڭ حيميا فاكۋلتەتىنىڭ دەكانى. قىزى ىڭكəر (1915-2002) - مۇعالىم، عىلىم دوكتورى، اممي-نىڭ قالىپتى فيزيولوگيا كافەدراسىنىڭ مەڭگەرۋشىسى.
«ادىرنا» ۇلتتىق پورتالى
