الەمدەگى ەڭ قىمبات مەتالل وسمي-187 يزوتوپى تەك قانا قازاقستاندا ءوندىرىلىپ، ەكسپورتتالادى، دەپ حابارلايدى "ادىرنا" ۇلتتىق پورتالى Kazinform سايتىنا سىلتەمە جاساي وتىرىپ.
الايدا، ونەركاسىپ جانە قۇرىلىس مينيسترلىگىنىڭ ايتۋىنشا، وسمي وندىرىسىنە قاتىستى مالىمەتتەر مەملەكەتتىك قۇپيا بولىپ سانالادى.
«قازاقستاننىڭ 1999 جىلعى 15 ناۋرىزداعى № 349-I مەملەكەتتىك قۇپيالار تۋرالى زاڭىنىڭ 12-بابى 10 تارماعىنا سايكەس مەتاللۋرگيا ونەركاسىبىنىڭ سيرەك كەزدەسەتىن مەتالداردى نەمەسە ستراتەگيالىق ماڭىزى بار باسقا دا ماتەريالداردى، ونىڭ ىشىندە وسمي ءوندىرۋ تۋرالى مالىمەتتەر مەملەكەتتىك قۇپياعا جاتقىزىلادى»، - دەيدى ونەركاسىپ جانە قۇرىلىس مينيسترلىگى.
ەلىمىزدە عانا وندىرىلەتىن وسمي-187 يزوتوپىنىڭ 1 گرامى 10 مىڭ دوللاردان باستالىپ، 200 مىڭ دوللارعا دەيىن جەتەدى.
تابيعاتتا وسمي-187-دەن تىعىز زات جوق. بۇل ەلەمەنتتى 9 اي بويى وندىرەدى.
ونى ەرەكشە دالدىكتى قاجەت ەتەتىن ولشەۋىش جانە مەديتسينالىق اسپاپتار جاساۋعا قولدانادى.
ايتا كەتەيىك، قازاقستاننان باسقا اقش، اۆستراليا، كولۋمبيا جانە كانادادا دا وسمي كەن ورىندارى بار، بىراق تەك قازاقستان عانا ەكسپورتتايدى. وسمي ءوندىرۋ مەملەكەتتىك مونوپوليا بولىپ تابىلادى جانە مەتالدى ساتۋدان تۇسكەن بارلىق كىرىس ۇلتتىق قازىناعا اۋدارىلادى.
"ادىرنا" ۇلتتىق پورتالى
