21–22 تامىز كۇندەرى قازاقستان پرەزيدەنتى قاسىم-جومارت توقاەۆ قىرعىزستانعا رەسمي ساپارمەن بارادى، دەپ حابارلايدى "ادىرنا" ۇلتتىق پورتالى.
قىرعىزستان ءىىم مالىمەتىنشە، قاۋىپسىزدىكتى قامتاماسىز ەتۋ ءۇشىن بىشكەكتە شامامەن 3,5 مىڭ ميليتسيا قىزمەتكەرى قىزمەت اتقارادى.
قالاداعى قوزعالىس ۋاقىتشا تەك دەلەگاتسيا كورتەجى جۇرەتىن ساتتەردە شەكتەلمەك. شەكتەۋلەر «ماناس» اۋەجايىنان مەملەكەتتىك رەزيدەنتسياعا دەيىنگى باعىتتا، دوورونبەك سادىرباەۆ كوشەسىندە جانە «اتا-بەيىت» مەموريالدىق كەشەنى مەن توگولوك مولدو كوشەسىندە ەنگىزىلەدى.
22 تامىزدا توقاەۆ پەن قىرعىزستان پرەزيدەنتى سادىر جاپاروۆ كەلىسسوزدەر جۇرگىزىپ، قازاقستان - قىرعىزستان جوعارى مەملەكەتارالىق كەڭەسىنىڭ وتىرىسىنا قاتىسادى.
سونداي-اق، ساپار اياسىندا وش قالاسىندا قازاقستاننىڭ باس كونسۋلدىعى، ل.ن. گۋميلەۆ اتىنداعى ەۇۋ فيليالى اشىلادى.
بۇدان بولەك، قازاق كينوسىنىڭ كۇندەرى، قازاق-قىرعىز جاستار فورۋمى وتەدى جانە بىشكەكتەگى «ىنتىماق» پاركىندە «دوستىقتىڭ التىن كوپىرى» مونۋمەنتى اشىلادى.
