"ادىرنا" ۇلتتىق پورتالىندا «اتىراۋ ويىن الاڭدارىن كۇتىپ ۇستاۋعا 236 ميلليون تەڭگەدەن اسا قارجى ءبولدى» دەگەن تاقىرىپپەن ماتەريال جاريالانعان ەدى. سول ماقالادا كوتەرىلگەن ماسەلەگە قاتىستى اتىراۋ قالاسى اكىمىنىڭ ورىنباسارى ە. ۋماروۆ جاڭىلتپاشتاتىپ جاۋاپ بەردى، - دەپ حابارلايدى "ادىرنا" ۇلتتىق پورتالى.
اتالعان ماتەريالدا تەندەر قۇجاتتارىنا سۇيەنىپ، وندا اتىراۋ قالاسىندا قانشا ويىن الاڭى بار ەكەنى كورسەتىلمەگەنى، 2024 جىلدىڭ 31 جەلتوقسانىنا دەيىن بالالار ويىن الاڭدارىن كۇتىپ ۇستاۋ ءۇشىن ناقتى نە ىستەلۋ كەرەكتىگى كورسەتىلمەگەنى سىنالعان ەدى.
سونداي-اق قۇزىرەتتى ورگاندارعا پورتال ءتىلشىسى:
«1. اتىراۋ قالاسىنداعى ويىن الاڭداردى كۇتىپ ۇستاۋ ءۇشىن بيۋدجەتتەن 236 ميلليوننان اسا قارجى جۇمسالماق ەكەن. اتقارىلاتىن جۇمىستىڭ كولەمى، سانى، جوسپارى، تاراپتاردىڭ مىندەتى، بارلىعى نەلىكتەن تايعا تاڭبا باسقانداي تەحنيكالىق سيپاتتامادا كورسەتىلمەگەن؟
2. «اتىراۋ قالالىق تۇرعىن ءۇي-كوممۋنالدىق شارۋاشىلىعى جانە تۇرعىن ءۇي ينسپەكتسياسى تەندەر جەڭىمپازىنان ەسەپتى قالاي الادى؟» دەگەن ەكى ساۋال جولداعان بولاتىن.
بۇل سۇراقتارعا اتىراۋ قالاسى اكىمىنىڭ ورىنباسارى ە. ۋماروۆ:
«1. جوعارىدا ايتىلعاندار نەگىزىندە، ويىن الاڭدارىنا تالاپ ەتىلەتىن سيپاتتامالاردىڭ پارامەترلەرىڭ جانە وزگە دە باستاپقى دەرەكتەردىڭ سيپاتتامالارىن قوسىمشاعا سايكەس جولدايدى.
2. اتالعان جۇمىستاردى تالاپ ەتىلەتىن تەحنيكالىق ەرەكشەلىكتەرگە سايكەس «قالالىق تۇرعىن ءۇي-كوممۋنالدىق شارۋاشىلىعى جانە تۇرعىن ءۇي ينسپەكتسياسى ءبولىمى» مەملەكەتتىك مەكەمەسىنىڭ ماماندارى قابىلداپ الاتىندىعىن حابارلايدى»، - دەگەن قىسقا عانا جاڭىلتپاش جاۋاپ قايتارىپتى.
ۇزاق ۋاقىت كۇتتىرگەن جاۋاپتا ە.ۋماروۆ مىرزانىڭ نە ايتپاق بولعانىن تۇسىنە المادىق. اكىم ورىنباسارىنىڭ 236 ميلليوننان اسا قارجى بولىنگەن جوبانىڭ تەحنيكالىق سيپاتتاماسىن دۇرىستاۋ تۋرالى ەشتەڭە جازباعانىنا قاراعاندا شەنەۋنىكتىڭ بۇل ماسەلەگە قاتىستى ايتار ەشتەڭەسى جوق بولسا كەرەك.
236 ميلليوننان اسا اقشا از قارجى ەمەس. ونىڭ سۇراۋى ءالى دە بولاتىنىن قالالىق اكىمدىكتىڭ قاپەرىنە سالعىمىز كەلەدى.
قانات بىرلىكۇلى
ادىرنا ۇلتتىق پورتالى
