جاپونيانىڭ ورتالىعىندا بىرنەشە كۇشتى جەر سىلكىنىسى تىركەلدى. بۇل تۋرالى ەلدىڭ ۇلتتىق مەتەورولوگيالىق باسقارماسى مالىمدەدى، دەپ حابارلايدى “ادىرنا” ۇلتتىق پورتالى تاسس اقپارات اگەنتتىگىنە سىلتەمە جاساپ.
مالىمەت بويىنشا، يسيكاۆا جانە نيگاتا پرەفەكتۋرالارى ايماعىندا ماگنيتۋداسى 7,4-كە جەتەتىن جەر سىلكىنىسى بولدى.
قازىرگى كەزدە قۇرباندار مەن قيراندىلار تۋرالى اقپارات جوق. الايدا ەلدىڭ بۇكىل باتىس جاعالاۋىندا تسۋنامي قاۋپى جاريالاندى – تولقىن بيىكتىگى 5 مەترگە جەتۋى مۇمكىن.
جەرگىلىكتى تۇرعىنداردى دەرەۋ جاعالاۋ ايماعىن تاستاپ كەتۋگە نەمەسە عيماراتتاردىڭ شاتىرىنا شىعۋعا شاقىرىپ جاتىر.
سونىمەن بىرگە، وسى ساتتە رەسپۋبليكا بويىنشا كۇشتى جەر سىلكىنىسى تۋرالى ەسكەرتۋ جۇيەسى ءۇشىنشى رەت ىسكە قوسىلدى. جەرگىلىكتى تۇرعىنداردى جەراستى دۇمپۋىنە دايىندالۋعا شاقىردى.
