فوتو: nippon.com
جاپونيانىڭ دەنساۋلىق ساقتاۋ، ەڭبەك جانە ءال-اۋقات مينيسترلىگىنىڭ مالىمەتىنشە، 1 قىركۇيەكتەگى جاعداي بويىنشا ەلدە 100 جاستان اسقان 107 677 ادام تۇرادى. بۇل – 1963 جىلى ستاتيستيكا جۇرگىزىلە باستاعاننان بەرگى ەڭ جوعارى كورسەتكىش، دەپ حابارلايدى “ادىرنا” ۇلتتىق پورتالى Jiji Press اگەنتتىگىنە سىلتەپ.
اتالعان كورسەتكىش 56 جىل قاتارىنان جاڭارىپ وتىر.
«كوپتەگەن ادامنىڭ ۇزاق جىلدار بويى دەنساۋلىعىن ساقتاپ، بەلسەندى ءومىر ءسۇرىپ جاتقانىنا قۋانىشتىمىن. سالاۋاتتى ءومىر ءسۇرۋ ۇزاقتىعىن ارتتىرۋدىڭ ماڭىزى زور. ويتكەنى قارت ادامدار قوعامنىڭ تىرەگىنە اينالىپ كەلەدى»، – دەدى جاپونيانىڭ دەنساۋلىق ساقتاۋ، ەڭبەك جانە ءال-اۋقات ءمينيسترى كەنيتيرو ۋەنو ۇكىمەت وتىرىسىنان كەيىنگى ءباسپاسوز ءماسليحاتىندا.
مالىمەتتەر ەل تۇرعىندارىنىڭ نەگىزگى تىزىمىنە نەگىزدەلگەن. بىلتىرمەن سالىستىرعاندا 100 جاستان اسقان ادامداردىڭ سانى 7 914 ادامعا وسكەن. ولاردىڭ باسىم بولىگى – ايەلدەر. اتاپ ايتقاندا، 94 298 ايەل تىركەلگەن. بۇل جالپى كورسەتكىشتىڭ شامامەن 90 پايىزىنا تەڭ.
جاپونيادا ءاربىر 100 مىڭ تۇرعىنعا شاققاندا 100 جاستان اسقان 87,51 ادامنان كەلەدى. پرەفەكتۋرالار اراسىندا بۇل كورسەتكىش بويىنشا سيمانە ءوڭىرى 14 جىل قاتارىنان ءبىرىنشى ورىندا تۇر. مۇندا ءاربىر 100 مىڭ تۇرعىنعا شاققاندا 186,65 عاسىر جاساعان ادامنان كەلەدى. ودان كەيىن كوتي (169,52) جانە توتتوري (152,48) پرەفەكتۋرالارى ورنالاسقان.
ال 100 جاستان اسقان تۇرعىنداردىڭ ۇلەسى ەڭ تومەن ءوڭىر – سايتاما پرەفەكتۋراسى. مۇندا ءاربىر 100 مىڭ ادامعا شاققاندا 51,27 عاسىر جاساعان تۇرعىننان كەلەدى. ودان كەيىن ايتي (57,79) جانە وساكا (60,06) پرەفەكتۋرالارى تۇر.
جاپونيانىڭ ەڭ قارت تۇرعىنى – كيوتو قالاسىندا تۇراتىن 114 جاستاعى فۋيو كيسيموتو. ول 1911 جىلى دۇنيەگە كەلگەن. ال ەلدەگى ەڭ قارت ەر ادام – كۋماموتو ءوڭىرىنىڭ تۇرعىنى، 112 جاستاعى حيكارۋ كاتو. ول 1914 جىلى تۋعان.
بيىلعى قارجى جىلىندا جاپونيادا 54 294 ادام 100 جاسقا تولادى. ولارعا قۇتتىقتاۋ حاتتارى مەن كۇمىس توستاعاندار تابىستالادى.
جاپونيادا عاسىر جاساعان ادامداردىڭ ستاتيستيكاسى العاش رەت 1963 جىلى جۇرگىزىلە باستادى. سول كەزدە ەلدە 100 جاستان اسقان 153 ادام بولعان. 1981 جىلى ولاردىڭ سانى 1 000-نان، 1998 جىلى 10 مىڭنان استى. 2012 جىلى كورسەتكىش 50 مىڭعا جەتسە، 2022 جىلى 90 مىڭنان جوعارىلادى.
