كامچاتكا جاعالاۋىنان 161 شاقىرىم جەردە ماگنيتۋداسى 8,5 بالدىق جەر سىلكىنىسى بولدى، دەپ حابارلايدى "ادىرنا" ۇلتتىق پورتالى.
بۇل سوڭعى ونجىلدىقتارداعى ايماقتاعى ەڭ كۇشتى سىلكىنىستەردىڭ ءبىرى رەتىندە تىركەلدى. بىرقاتار ەلدەردە ءتسۋناميدىڭ قاۋپى جاريالاندى.
باستاپقىدا عالىمدار ماگنيتۋداسىن 7,5 دەپ باعالاعان، كەيىنىرەك 8,5-كە تۇزەتتى.
جەر سىلكىنىسىنىڭ ەپيتسەنترى تۇبەكتىڭ جاعالاۋىنان 161 شاقىرىم جەردە ورنالاسقان. وعان دەيىن كەشكىسىن جانە كۇندىز بىرنەشە جەر سىلكىنىسى بولعان. سىلكىنىس وشاعى 32 شاقىرىم تەرەڭدىكتە جاتىر.
ەۋروپا-جەرورتا تەڭىزى سەيسمولوگيالىق ورتالىعى (EMSC) بۇل سىلكىنىستىڭ ماگنيتۋداسىن 8,7 دەپ باعالادى، ال افتەرشوكتار 7,0 جانە ودان تومەن بولعان.
كامچاتكا ولكەسى بويىنشا تجم باسقارماسى جەرگىلىكتى باق-قا ءتسۋناميدىڭ بيىكتىگى 32 سم-گە دەيىن جەتۋى مۇمكىن ەكەنىن حابارلادى. مۇنداي تولقىن الەۋت مۋنيتسيپالدى وكرۋگىنە دە جەتۋى ىقتيمال. ال ۋست-كامچات مۋنيتسيپالدى وكرۋگىنە — 20 سم، پەتروپاۆل-كامچات قالالىق وكرۋگىنە — 6 سم-گە دەيىنگى تولقىن جەتۋى مۇمكىن.
توتەنشە جاعدايلار مينيسترلىگى تۇرعىنداردى تەڭىزگە بارىپ، تسۋنامي كورمەۋگە شاقىردى. جاعالاۋداعى سۋلاردا تۇرعان، اشىق رەيدتە، كىرەبەرىسى كەڭ قويناۋلاردا نەمەسە ايلاقتاردا تۇرعان كەمەلەرگە اشىق مۇحيتقا شىعۋ ۇسىنىلدى.
كامچاتكا گۋبەرناتورى ۆلاديمير سولودوۆ Telegram-ارناسىندا بۇل سىلكىنىستى سوڭعى ونجىلدىقتارداعى ەڭ كۇشتى دەپ اتادى.
«ماماندار الەۋمەتتىك ماڭىزى بار نىسانداردى – مەكتەپتەر، اۋرۋحانالار، بالاباقشالار – زاقىمدانۋ بەلگىلەرىنە مۇقيات تەكسەرۋدى باستاپ كەتتى»، – دەدى ول.
كەيىنىرەك گۋبەرناتور پەتروپاۆل-كامچات قالاسىنداعى ءبىر بالاباقشانىڭ قابىرعاسى قۇلاعانىن حابارلادى. بۇل بالاباقشا جوسپارلى جوندەۋ جۇمىستارىنا بايلانىستى جابىق بولعان، سوندىقتان بالالار عيماراتتا بولماعان.
ساحالين وبلىسىنىڭ گۋبەرناتورى ۆالەري ليمارەنكو دا سەۆەرو-كۋريلسك قالاسىندا ماگنيتۋداسى 7,9 بالدىق جەر سىلكىنىسى بولعانىن حابارلادى.
«تسۋنامي قاۋپى جاريالاندى، قاۋىپتى ايماقتاردان تۇرعىندار بيىك جەرلەرگە ەۆاكۋاتسيالانۋدا. توتەنشە قىزمەتتەر كۇشەيتىلگەن رەجيمدە جۇمىس ىستەۋدە. جاعداي باقىلاۋدا»، – دەدى ول.
