بيىل الاش زيالىلارى ءاليحان بوكەيحان، احمەت بايتۇرسىنۇلى، مىرجاقىپ دۋلاتۇلى شىعارعان «قازاق» گازەتىنە – 110 جىل. اتالعان باسىلىم 1913 جىلدىڭ 2 اقپانىنان باستاپ، 1918 جىلدارى ارالىعىندا ورىنبور قالاسىندا جاريالانىپ تۇردى. حX عاسىردىڭ باسىندا قازاق حالقى ءۇشىن زور قۇبىلىسقا اينالعان گازەت 5 جىلدا تۇتاستاي جالپى ۇلتتىڭ ىقىلاسىنا يە بولدى. ال تاۋەلسىزدىك قارساڭىندا وسى گازەتتىڭ جالعاسى شىققانىن بىلەمىز بە؟
1913 جىلدان كەيىن تۋرا 77 جىل وتكەن سوڭ، 1990 جىلى الاش قايراتكەرلەرىنىڭ ءىزىن جالعاستىرۋدى ماقسات تۇتقان، ۇلتىنا جانى اشيتىن قازاق جاستارى “قازاق” گازەتىنىڭ اتاۋىمەن قايتا شىعارعانىن ءبىرى بىلسە، ءبىرى بىلمەيدى. دەگەنمەن، گازەتتىڭ ءۇش ءنومىرى جارىققا شىعىپ، كەنەتتەپ توقتاپ قالعان. نەلىكتەن؟ نە سەبەپ بولدى؟ بۇل جايىندا 1990-1991 جىلدارى شىققان “قازاق” گازەتىنىڭ اتقارۋشى رەداكتورى بولعان سەرىك قاسەنعازىۇلىنان “ادىرنا” ءتىلشىسى سۇراپ ءبىلدى.
«قازاق جاستارىن ساياسي كۇرەسكە بىرىكتىرۋ ماقساتىن كوزدەدى»
– توقسانىنشى جىلدارى “قازاق” گازەتىنىڭ بىرنەشە ءنومىرى شىعارىلعان ەكەن. ءسىز – سول كەزدە باسىلىمنىڭ جارىققا شىعۋىنىڭ تىكەلەي باسى قاسىندا ءجۇرىپسىز. نە سەبەپتى “قازاق” گازەتىن قايتا جاڭعىرتۋعا بەل بايلادىڭىزدار؟
– 1989 جىلى 1986-نىڭ ىزعارى باسىلىڭقىراپ، ەسەسىنە گورباچەۆتىڭ “قايتا قۇرۋ، جاريالىلىق” باعدارىنان ءۇمىت كۇتكەن، اسىرەسە قازاقستاندا جەلتوقسان كوتەرىلىسىندەگى ازاتتىق رۋحىنان ءنار العان جاستار قوزعالىسى جاندانا ءتۇستى. سونىڭ زاڭدى ناتيجەسى رەتىندە 1990 جىلعى ءساۋىردىڭ جەتىسى الماتىدا 200-گە جۋىق، نەگىزىنەن قازاق ۇلتتىق ۋنيۆەرسيتەتىنىڭ (قازۇۋ), باسقا دا جوعارى وقۋ ورىندارىنىڭ ستۋدەنتتەرى مەن بىرقاتار جۇمىسشى جاستار قاتىسقان قۇرىلتاي ءوتىپ، ناتيجەسىندە جاستاردىڭ “ازامات ورداسى” دەپ اتالاتىن ساياسي ۇيىمى دۇنيەگە كەلدى.
وسى جاستاردىڭ “ازامات ورداسى” ساياسي ۇيىمىنىڭ قۇرىلتايى وتكەن سوڭ، “قازاق” گازەتىنىڭ №1 سانى 1990 جىلعى كوكتەمدە دۇنيەگە كەلدى. انىقتاپ ايتساق، 1990 جىلعى “قازاق” گازەتى “ازامات ورداسى” ساياسي ۇيىمىنىڭ رەسمي باسىلىمى رەتىندە جارىققا شىقتى. گازەتتىڭ ءبىرىنشى بەتىندە “رەسمي حابار” دەگەن اتاۋمەن مىناداي سوزدەر جازىلدى: “ازامات ورداسى” ساياسي ۇيىمى قازاق جەرىنىڭ تولىق ەگەمەندىگى ءۇشىن قازاق جاستارىن ساياسي كۇرەسكە بىرىكتىرۋ ماقساتىن كوزدەيدى. ول ءۇشىن وسىنداي ماقساتتاعى باسقا دا ساياسي قوزعالىستار، پارتيالارمەن بىرگە تاۋەلسىز كۇش رەتىندە ساياسي ساحناعا شىقتى”. ءبىز 1990-1991 جىلدارى “قازاق” اتتى گازەتتى 1913 جىلى دۇنيەگە كەلگەن “قازاق” گازەتىنىڭ جالعاسى رەتىندە سانالى تۇردە جارىققا شىعاردىق.
جوعارىدا اتالعان فاكتورلاردى ەسكەرسەك، ءبىز 1990 جىلى “ازامات ورداسى” ساياسي ۇيىمىن قۇرۋعا جانە الاشوردا قايراتكەرلەرى العاش دۇنيەگە اكەلگەن “قازاق” گازەتىن جالعاستىرۋعا رۋحاني تۇرعىدان دا، ساياسي كوزقاراس تۇرعىسىنان دا دايىن بولدىق. ءبىز ستۋدەنت كەزىمىزدەن-اق ءاليحان، احاڭ مەن جاقاڭ، جۇسىپبەك، مۇستافا شوقاي، ماعجانداردىڭ كىم ەكەنىن زەردەلەپ قانا قويعان جوقپىز، الاشوردا فەنومەنى ءبىزدىڭ كۋميرىمىزگە اينالدى. سوندىقتان “قازاق” گازەتىن قايتا شىعارۋدى قولعا الدىق.
«باسىندا «قازاق» اتاۋىن بەرۋگە جۇرەكسىندىم»
– الاش قايراتكەرلەرى شىعارعان گازەت پەن سىزدەر شىعارىپ وتىرعان “قازاق” گازەتىنىڭ اراسىندا قانداي بايلانىس بار؟
– احمەت بايتۇرسىنۇلى باس رەداكتور بولعان “قازاق” گازەتى مەن ءبىز شىعارعان “قازاق” گازەتىنىڭ اراسىندا، ارينە رۋحاني بايلانىس بولدى. 1990 جىلعى ءساۋىردىڭ جەتىسى كۇنى بولعان قۇرىلتايدان كەيىن “ازامات ورداسىنىڭ” ورتالىق كەڭەسىنىڭ مۇشەسى رەتىندە جانە قازۇۋ-دىڭ فيلولوگيا فاكۋلتەتىندە وقىپ جۇرگەندىكتەن گازەتتىڭ نەگىزگى جۇمىسى ماعان جۇكتەلدى. مەن ءۇشىن الاش قايراتكەرلەرى قاسيەتتى تۇلعالارعا اينالعان بولاتىن. سوندىقتان، العاشقىدا قاتتى قوبالجىدىم. ءتىپتى گازەتتى “ازامات” نەمەسە “ەركىندىك” دەپ اتايىق دەپ جۇرەكسىنگەنىم دە راس. الايدا، ول كەزدە عابيدەن قۇلاحمەتوۆ شىعاراتىن “ازامات” دەگەن گازەت بار ەدى، ونىڭ ۇستىنە، گازەت “قازاق” دەپ اتالادى دەپ “ازامات ورداسىنىڭ” توراعاسى ەبەيسىن سەرەكۇلى ناقتى شەشىمىن ايتتى. دەگەنمەن، الاشوردا قايراتكەرلەرى شىعارعان “قازاق” گازەتىنىڭ جاۋاپكەرشىلىگى اۋىر. مۇراعاتقا بارىپ، اسا ءبىر تولقىنىسپەن سارعايعان “قازاق” گازەتتەرىنىڭ بەتتەرىن قولىممەن سيپالاپ وتىرعان ءساتىم ەسىمدە. اراب ھارپىمەن جازىلعان سوزدەردى وقي المادىم، سودان اراب بولىمىندە وقيتىن سەرىكباي قوسان دەگەن كۋرستاسىما قولقا سالىپ، “قازاق” گازەتىنىڭ تۇپنۇسقاداعى مازمۇنىمەن تانىسا باستادىم.
سونىڭ اسەرىمەن، 1990 جىلعى “قازاق” گازەتىنىڭ № 1 سانىنىڭ باس تاقىرىبىن “الاشتىڭ ازاماتىنا” دەپ اتادىم. ءدال وسىنداي تاقىرىپپەن الاش قايراتكەرلەرى 1916 جىلى “قازاق” گازەتىندە ۇندەۋ جاريالاعانى تاريحتان بەلگىلى.
سونىمەن قاتار، گازەتتىڭ № 1 سانىنىڭ ماڭدايشاسىنا احمەت بايتۇرسىنۇلىنىڭ “مالىڭ الداۋ تالاۋدا تۇر، جانىڭ ارباۋ قاماۋدا تۇر” دەگەن، ال گازەتتىڭ ەكىنشى جانە ءۇشىنشى بەتتەرىندەگى ماقالالاردان كەيىن “بۇل كۇيگە بۇگىن ەمەس، كوپتەن كىردىك، الدى ارتىن اڭداماعان بەتپەن كىردىك”، “اداسقانىن الاشتىڭ، ءتۇزۋ جولعا ءتۇسىر، حاق”، “اياعىڭدى تۇساۋ قىستى، جاقتارىڭدى قۇرساۋ قىستى” دەگەن سوزدەرىن جازدىم. قىسقاسى، اتالمىش گازەتكە جاريالانعان ءاربىر ماقالادا الاش قايراتكەرلەرى شىعارعان “قازاق” گازەتىنىڭ رۋحى سەزىلىپ تۇرۋىنا كۇش سالدىم.
ءبىر ايتا كەتەرلىگى، 1990-1991 جىلدارى ءبىز شىعارعان “قازاق” گازەتىنىڭ ءۇش نومىرىندە دە باس رەداكتور دەگەن ءسوز جوق، سەبەبى “قازاق” گازەتىنىڭ باس رەداكتورى جالعىز ادام - احمەت بايتۇرسىنۇلى دەپ شەشىم قابىلدادىم. بۇل “قازاق” گازەتىنە دەگەن ەرەكشە قۇرمەتىمىزدىڭ كورىنىسى دەپ بىلەمىن.
«گازەتتىڭ العاشقى سانىن جاسىرىن شىعارۋعا تۋرا كەلدى»
– گازەتتى شىعارۋدا قانداي دا ءبىر قيىندىقتار تۋىندادى ما؟
– 1990 جىلعى كوكتەم، جاز ايلارىندا كەڭەس ۇكىمەتى ءالى كۇشىندە بولدى. جۇرتشىلىق اشىق پوزيتسياسىن بىلدىرۋگە ءالى دە بولسا جاسقاناتىن. ماسەلەن، 1990 جىلى “قازاق” گازەتىنىڭ № 1 سانىنىڭ مازمۇنىمەن تانىسقان بويدا رەسمي باسپاحانالار باسىپ شىعارۋدان باس تارتتى. سوندىقتان، № 1 سانىن روتوپرينت تاسىلىمەن جاسىرىن تۇردە شىعارۋىمىزعا تۋرالى كەلدى.
– گازەت قايدا تاراتىلىپ وتىردى؟
– گازەت الماتىدا تاراتىلدى، تيراجى از بولدى، 500-1000 دانا شاماسى. گازەتتىڭ ءبىرىنشى ءنومىرى بروشيۋرا سياقتى، ەكى-اق پاراق بولىپ شىقتى. دەگەنمەن، مازمۇندى بولۋىنا كۇش سالدىق.
– قانداي تاقىرىپتار قوزعالدى؟
– الاش زيالىلارىنىڭ جولىن جالعاعان گازەتتە ءبىز وزەكتى تاقىرىپتاردى قوزعاپ تۇردىق. سول كەزدە وتكەن وقيعالاردى، ساياسي قوزعالىستاردى، اششى شىندىقتى جازدىق. ماسەلەن، “الاشتىڭ ازاماتىنا” دەگەن باس ماقالادا مىناداي باتىل پىكىرلەر جازىلدى: ء“بىزدىڭ بۇگىنگى ءستالينيزمدى، بيۋروكراتيزمدى سىنادىق دەپ جۇرگەنىمىز جىلاننىڭ قۇيرىعىن كەسكەندەي عانا. جىلاننىڭ ءۇش كەسسە دە كەسىرتكەلىك كۇشى بار. بۇگىنگى “جاڭارعان سوتسياليزم، جاڭارعان پارتيا” دەگەنىمىز سونداي كوز الداۋ”.
ياعني، باس ماقالادا “كەڭەس وداعى” دەگەن ۇعىم قازاققا جات، سوندىقتان “كەڭەس وداعى كۇيرەۋى كەرەك” دەگەن وي ايتىلدى. ونىڭ ۇستىنە اتالمىش ءنومىردىڭ ەكىنشى بەتىندە: “قازاقتى زار قاقساتقان وكتيابر” دەگەن ەبەيسىن سەرەكەۇلىنىڭ كولەمدى ماقالاسى جاريالاندى. گازەتتىڭ ءۇشىنشى بەتتەرىندە ء“تۇبى ءبىر تۇرىك ەدىك” دەگەن سەرىك ورىنبايۇلى دەگەن جىگىتتىڭ ماقالاسى مەن “ۇلتشىلدىق پەن شوۆينيزم تۋرالى ويلار” دەگەن قازۇۋ-دىڭ اسپيرانتى سەرىك بەيسەنبايۇلى دەگەن ازاماتتىڭ ماقالاسى جاريالاندى.
جوعارىدا اتالعان تاقىرىپتار كوپ جايتتان حابار بەرەدى دەپ ويلايمىن. ال ەركىن نۇرحانۇلى دەگەن جىگىت “ەگەمەندىك ەلدىكتىڭ بەلگىسى” دەگەن ماقالاسىندا ەگەمەن ەلدىڭ ءوز تۋى، ەلتاڭباسى، ۆاليۋتاسى ت.ب. نىشاندارى بولۋى كەرەگىن جازدى. ال مۇنداي مازمۇنداعى ماقالالاردىڭ “قازاق” گازەتىنە جازىلعان ۋاقىتى 1990 جىلدىڭ كوكتەم-جاز ايلارى بولاتىن. ياعني، “قازاقستاندا ەگەمەندىك ءۇشىن ەشكىم كۇرەسپەدى، وعان تاۋەلسىزدىك 1991 جىلدىڭ جەلتوقسانىندا عانا توسىننان پايدا بولدى” دەگەن پىكىرلەردىڭ نەگىزسىز ەكەنىن ءبىز شىعارعان “قازاق” گازەتى دالەلدەيدى.
– ءسىز ول كەزدە قانشا جاستا ەدىڭىز؟
– مەن 1990 جىلعى ءساۋىردىڭ جەتىسىندە قۇرىلتاي وتكەن كەزدە بار بولعانى 20 جاستا ەدىم جانە جاستاردىڭ “ازامات ورداسى” ساياسي ۇيىمىنىڭ ەڭ جاس مۇشەسىنىڭ ءبىرى بولىپ تىركەلدىم. سوعان قاراماستان، بۇل ۋاقىتتا مەنىڭ دە ازاماتتىق كوزقاراسىم قالىپتاسىپ ۇلگەردى دەسەم شىندىقتان الشاقتاي قويماسپىن. 1986 جىلى الماتىداعى № 86 ورتا مەكتەپتە ساپالى ءبىلىم الىپ ءتامامدادىم. ونىڭ ۇستىنە مەكتەپ وقۋشىسى كەزىمنىڭ وزىندە الماتىدا راحمانقۇل بەردىباەۆ ۇيىمداستىرعان حالىق ۋنيۆەرسيتەتىنىڭ دارىستەرىنە دە قاتىسىپ ءجۇردىم. 1986 جىلعى جەلتوقسان كوتەرىلىسىنە بەلسەنە قاىسپاسام دا، سول كۇندەردىڭ بىرىندە الاڭدا بولعانىم راس. 1987 جىلى سوۆەت ارمياسى قاتارىنا قازۇۋ-دىڭ فيلولوگيا فاكۋلتەتىنىڭ 1-كۋرسىن تامامداعان سوڭ اتتاندىم. 1989 جىلى اسكەردەن كەلگەندە ماعان العاشقىدا قازاقستاندا حالىقتىڭ ساياسي بەلسەندىلىگى تومەن سياقتى كورىندى. ال مەن اسكەري قىزمەت وتكەرگەن لەنينگراد (سانكت-پەتەربۋرگ) وڭىرىندە 1989 جىلدارى دەموكراتيا، قايتا قۇرۋ، جاريالىلىق ۇراندارىن تۋ ەتكەن جەرگىلىكتى حالىقتىڭ ساياسي بەلسەندىلىگى جوعارى بولاتىن. سودان اسكەردەن كەلگەن سوڭ بار جىگەرىممەن ۇيىمعا مۇشە بولىپ، گازەتتىڭ شىعۋىنا كۇشىمدى سالدىم.
«الەم ەلدەرىنىڭ قازاقستاندى تاۋەلسىز ەل دەپ تانۋى – گازەتتى توقتاتۋدىڭ باستى سەبەبى»
– گازەتتىڭ توقتاپ قالۋىنا نە سەبەپ بولدى؟
– بىردەن ايتا كەتەيىن، گازەتتى توقتاتۋ كەرەك دەپ رەسمي تۇردە شەشىم قابىلداعان جوقپىز. دەگەنمەن، گازەتتىڭ توقتاپ قالۋىنىڭ بىرنەشە سەبەبى بار. قارجىنىڭ جەتىسپەۋى، ۇكىمەتتىڭ قىسىم كورسەتىپ، ميلليونداپ ايىپپۇل سالۋ ىقتيمالدىعى، مەنىڭ ەكىنشى كۋرس ستۋدەنتى بولىپ، ساباققا الاڭداۋىم جانە بار بولعانى جيىرما جاستاعى ءومىر تاجىريبەسى از جاس بولۋىم. دەگەنمەن، بۇل نەگىزگى سەبەپ دەپ ەسەپتەمەيمىن. نەگىزگىسى، 1991 جىلعى جەلتوقساننىڭ ون التىسى كۇنى حالىقارالىق قوعامداستىقتىڭ قازاقستاندى تاۋەلسىز ەل دەپ تانۋى گازەتتى توقتاتۋدىڭ باستى سەبەبى بولعان سەكىلدى. ويتكەنى، ءبىز شىعارعان “قازاق” گازەتىندەگى ماقالالاردىڭ باستى لەيتموتيۆى قازاق ەلىنىڭ تاۋەلسىزدىگى ءۇشىن كۇرەسۋدى ناسيحاتتاۋ بولاتىن.
شىنىندا دا، گازەت كەڭەستىك بيلىككە جاقپايتىن وتكىر ماسەلەلەردى قوزعادى. ماسەلەن، گازەتتىڭ № 2 سانىندا 1990 جىلعى جەلتوقساننىڭ ونى وتكەن رەسپۋبليكالىق قۇرىلتاي ماتەريالدارى، قازاقستان جاستارىنىڭ “ازامات” ۇيىمىنىڭ باعدارلاماسى جانە 1990 جىلعى 22-26 قازانداعى ەرەۋىل، سول الاڭدا كومسومول بيلەتتەرىنەن ارىلۋ اكتسياسى جونىندە دە جازىلدى.
“ازامات” ۇيىمىنىڭ بۇل ارەكەتتەرى سول كەزدە سوۆەتتىك سوتسياليستىك قالپىنان ايرىلعىسى كەلمەگەن رەسمي بيلىككە ۇناماعان سىڭايلى. ماسەلەن، سول جىلدارى “سوتسياليستىك (ەگەمەندى) قازاقستان” گازەتىندە جاستاردىڭ مۇنىسى دۇرىس ەمەس، قازاقستانعا ەگەمەندىك الۋعا ءالى ەرتە دەگەن سارىنداعى ءۇ. ءۋايديننىڭ تەرىس پىكىر بىلدىرگەن ماقالاسى شىقتى. جالپى ول كەزدە كوپتەگەن گازەت-جۋرنالدار سوۆەت وكىمەتىن اشىق سىنامايتىن. باتىل پىكىر ايتىپ، سوۆەت وكىمەتىن سىناعان سانالى باسىلىمنىڭ ءبىرى ءبىز شىعارعان “قازاق” گازەتى بولدى.
تاۋەلسىزدىك جاريالانعاننان كەيىن جازعىشتاردىڭ كوبى اياق استىنان “باتىر” بوپ شىعا كەلىپ، ءتىپتى “سوتسياليستىك (ەگەمەندى) قازاقستان” گازەتى “قازاق” گازەتىنىڭ جالعاسى بولدى دەپ سوعىپ جىبەرگەن، ادام ۇيالاتىن “باتىل” پىكىرلەر دە ايتىلىپ ءجۇر بۇگىندەرى.
جالپى، ءوزىم جاۋاپتى حاتشى-رەداكتور قىزمەتىن اتقارعان 1990-1991 جىلدارى جارىققا شىققان “قازاق” گازەتىنىڭ ءۇش نومىرىندە دە نەگىزىنەن قازاق ەلىنىڭ شىنايى تاۋەلسىزدىگى ءۇشىن كۇرەسۋگە ۇندەيتىن قوعامدىق-ساياسي ماقالالار جازىلدى، ءارى بۇل الاش قايراتكەرلەرى شىعارعان “قازاق” گازەتىمەن رۋحاني ساباقتاستىقتا بولۋىنا كۇش سالدىق. ءبىز شىعارعان گازەت ماتەريالدارى ۇساق تاقىرىپتان ادا بولدى. ماقساتىمىز تاعىلىمى مول، وتكىر، ۇلت مۇددەسىنە عانا قىزمەت ەتەتىن مازمۇندى ماقالالار جازىپ، الاش قايراتكەرلەرىنىڭ ارۋاعىن قاستەرلەي وتىرىپ، بولاشاق ۇرپاق الدىندا ۇيالمايتىن ءىس اتقارۋ بولدى.
– سول كەزدە گازەتكە سىزدەن بولەك، كىمدەر جازىپ تۇردى؟
– سەرىك ورىنبايۇلى دەگەن سۋرەتشى جىگىت “قازاق” گازەتىنىڭ ديزاينىن تولىق ءوزى جاسادى. ەبەيسىن سەرەكەۇلى، ەركىن نۇرحانۇلى، اعىسبەك تولەگەنتەگى، سەرىك بەيسەنبايۇلى، سەرىكباي قوسان، اسقار تۇرعانباي دەگەن ازاماتتار ماقالالاردىڭ نەگىزگى اۆتورلارى بولدى. مەن جاۋاپتى حاتشى-رەداكتور مىندەتىن اتقارعاندىقتان كوپ ماتەريالداردى ءوزىم جازۋىما تۋرا كەلدى.
سونىمەن بىرگە، تاعى ءبىر ءوز ۇلەسىمدى قوسقان ءىسىمنىڭ ءبىرى - 1990-1991 جىلدارى “قازاق” گازەتىمەن قاتار ءبىز “مولودەج كازاحستانا” دەگەن ورىس تىلىندەگى نۇسقاسىن دا شىعاردىق. بۇل جونىندە سول كەزدىڭ وزىندە-اق “لەنينسكايا سمەنا” گازەتىنىڭ ءجۋرناليسى مەنەن سۇحبات الىپ، كومسومالعا التەرناتيۆالىق ۇيىم دەگەن مازمۇندا شاعىن ماقالا جاريالاندى. “لەنينسكايا سمەنا” گازەتىنىڭ ارحيۆىنەن تابىلىپ قالۋى مۇمكىن. ال قازاق تىلىندە “ادىرنا” ۇلتتىق پورتالى تۇڭعىش بولعالى تۇر. سىزدەرگە ءبىزدى ەلەپ-ەسكەرگەندەرىڭىزگە العىس ايتامىن!
– 2023 جىلى «قازاق» گازەتىنە –110 جىل تولدى. قانشالىقتى اتالىپ ءوتتى، بۇل باسقا ماسەلە. ال سىزدەر 77 جىلدان كەيىن جالعاستىردىڭىزدار، ال ەندى 33 جىلدان كەيىن گازەتتى قايتا جاڭعىرتۋ جوسپارلارىڭىزدا بار ما؟
– شىنىندا دا، “ازامات” ۇيىمى ۇيىمداستىرعان 1990 جىلعى 22-26 قازانداعى ەرەۋىل ءوتىپ جاتقان كەزدە “ەگەمەندىك تۋرالى دەكلاراتسيانى” قابىلداۋ تاريحىنىڭ قالتارىستارى جانە سول كۇندەرى مۇحتار شاحانوۆتى اۋرۋحانادا “ازامات” ۇيىمى جىگىتەرىنىڭ اتىس قارۋىمەن كۇزەتۋى، كەزىندە ولجاس سۇلەيمەنوۆ تىكەلەي ەفير وتكىزىپ جاتقان جينالىستان “ازامات” ۇيىمىنىڭ جىگىتتەرى دەمونستراتيۆتى تۇردە شىعىپ كەتۋى، “ازامات” ۇيىمىنىڭ “ازات” قوزعالىسىمەن بىرىگۋى، ارون اتابەك باستاعان “الاش” پارتياسى مەن “ازامات” ۇيىمىنىڭ قارىم-قاتىناسى سياقتى ەلەۋلى وقيعالار جايىندا “قازاق” گازەتىنىڭ اتالمىش ءۇش سانىندا جاريالاپ ۇلگەرمەدىك.
جوعارىدا اتالعان جايتتار ءالى دە بولسا قوعامنىڭ قىزىعۋشىلىعىن تۋدىرۋى دا مۇمكىن.
ەڭ باستىسى، قازاق ەلىنىڭ شىنايى تاۋەلسىزدىكە جەتۋ تاقىرىبى ءالى دە بولسا وزەكتى دەپ ويلايمىن، سوندىقتان ءبارى دە مۇمكىن.
– سۇحباتتاسقانىڭىزعا راحمەت!
دانا نۇرمۇحانبەت
“ادىرنا” ۇلتتىق پورتالى
