ءماجىلىس دەپۋتاتى قازىبەك يسا تۇرمەدە وتىرعان بەلسەندى ميربولات مىرزاتايۇلىن بوساتۋدى سۇرادى، دەپ حابارلايدى "ادىرنا" ۇلتتىق پورتالى.
دەپۋتات باس پروكۋرور بەرىك اسىلوۆتىڭ اتىنا رەسمي حات جولدادى. حات ءماتىنى «قازاق ءۇنى» سايتىندا جاريالاندى.
دەپۋتاتقا بۇل ماسەلە بويىنشا 261 ازامات قول قويعان ۇجىمدىق ءوتىنىش تۇسكەنى ايتىلدى. قازىبەك يسا حاتتى وسى ءوتىنىش نەگىزىندە جازعانىن جەتكىزگەن.
ول ميربولات مىرزاتايۇلىنىڭ دەنساۋلىعى ناشار ەكەنىن، كامەلەتكە تولماعان بالالارى بارىن اتاپ وتكەن.
«سەمەي يادرولىق سىناعىنان زارداپ شەگىپ، باسىندا كيستا بار. سونىمەن بىرگە سول جاق مويىن تامىرى 50 پايىزعا بىتەلىپ، ينسۋلت الۋ قاۋپى جوعارى»، — دەلىنگەن حاتتا.
دەپۋتاتتىڭ ايتۋىنشا، بەلسەندىنىڭ ارەكەتىندە قىلمىس قۇرامى جوق. ال ميربولات مىرزاتايۇلىنىڭ قازاق ءتىلىن تالاپ ەتۋى – قىلمىس ەمەس.
«ەشبىر ۇلتقا، تىلگە ءتىل تيگىزبەگەن. مەملەكەتتىك ءتىلدى زاڭ اياسىندا تالاپ ەتتى. بۇعان بولا سوتتاۋ — زاڭدا قاراستىرىلماعان»، — دەيدى قازىبەك يسا.
حاتتا باس پروكۋروردان قىلمىستىق ءىستى قايتا قاراپ، مۇقيات تەكسەرۋ سۇرالعان.
ەسكە سالا كەتەيىك، ميربولات مىرزاتايۇلى «كوك-توبە» تك كووپەراتيۆى باسشىسىمەن جانجالداسىپ، «مەملەكەتتىك تىلدە سويلەۋگە مىندەتتىسىز» دەگەن ءسوزى ءۇشىن ءىستى بولعان. سوت ونى قك 174-باپ 1-بولىگى بويىنشا كىنالى دەپ تانىپ، 4 جىلعا باس بوستاندىعىنان ايىرعان. بەلسەندى ايىپپەن كەلىسپەيتىنىن مالىمدەگەن.
