جەرگىلىكتى ءونىم شىعارۋ – ءبىر ماسەلە، ونى تۇتىنۋشىنىڭ تالابىنا ساي جەتكىزۋ – تاعى ءبىر ماسەلە. وندايدا باعا بەلگىلەۋدىڭ دە ءوز تالاپتارى بار.
كەز كەلگەن ساۋدا ۇيىندەگى دۇكەن سورەلەرىنە نازار سالساڭىز سىرتتان كەلگەن تاۋارلار قاپتاپ تۇر. كيىم-كەشەك، اياق-كيىم، ازىق-تۇلىك، ۇيگە قاجەتتى تاۋارلاردىڭ كوبى كورشىلەس رەسەي، قىرعىزستان، وزبەكستان، قىتاي ەلدەرىنەن كەلەتىنى جاسىرىن ەمەس. دەگەنمەن، «قازاقستاندا جاسالعان» بەلگىسىمەن تۇرعان تاۋارلار دا از ەمەس.
سونداي ءونىم ءوندىرىپ جۇرگەندەردىڭ ءبىرى – توقتار ءبىرجانۇلى. «ساپا جاعىنان شەتەلدەن كەم ەمەسپىز» دەيدى كاسىپكەر. بىرنەشە جىل بۇرىن موڭعوليادان كوشىپ كەلگەن قانداس ەلگە كەلىپ، كاسىپ باستاعان. بۇگىندە «بىزدىكى» اتىمەن تانىمال برەندتىڭ يەسىمەن «ادىرنا» ءتىلشىسى سۇحباتتاستى.
- ەڭ العاش بۇل كاسىپ قالاي باستالدى؟ العاشقى تاۋار قانداي بولدى؟
- ءبىزدىڭ ونىمدەر تولىق قازاقستاندا وندىرىلەدى. 2022 جىلى كوكتەمنەن باستاپ وسى كاسىپپەن اينالىستىق. ال 2016 جىلدان باستاپ شۇلىق وندىرە باستاعادىق. قازىر بىرنەشە قالادا دۇكەنىمىزدىڭ فيليالدارى بار. ءبىزدىڭ تاۋارلار قوي، تۇيە جۇنىنەن، تازا ماقتادان جاسالادى. باستىسى كيىمدەرىمىزدىڭ بارلىعى جىلى، ىڭعايلى، ءساندى ءارى تازا وتاندىق ونىمدەردەن تىگىلگەن.
- وتاندىق ونىمدەردى دايىنداۋ، ساۋدالاۋ يدەياسى، وسىنداي دۇكەن اشۋ كىمنىڭ ويى بولدى؟
- مەن ءوزىم موڭعوليادان كەلگەن قانداسپىن. 2012 جىلى موڭعوليانىڭ ءجۇن ونىمدەرىن ەلىمىزگە اكەلىپ، ساتا باستادىق. سول كەزدە موڭعوليانىڭ ءجۇن-شۇلىقتارىن وندىرەتىن كومپانيا كوز الدىمىزدا ءوسىپ، وركەندەي باستادى. بىزدە دە تۇتىنۋشىلار سانى ارتتى. سودان «ءبىزدىڭ اقشالارىمىز نەگە موڭعولياعا كەتۋى كەرەك، نەگە ءوزىمىز وسى كاسىپپەن اينالىسپاسقا؟» دەگەن وي كەلدى. تۇرىكتىڭ Zara, LC Waikiki, Koton سياقتى برەند قالىپتاستىرىپ، ءوز ءونىمىمىزدى الەمگە تانىتۋ – ءبىزدىڭ ماقسات.
- «وتاندىق ءونىم» دەسە كوپشىلىك قىمباتسىناتىن سەكىلدى. ال سىزدەر وندىرەتىن تاۋاردىڭ باعاسى قانشا؟
- باعا جاعى ورتاشا. ءبىزدىڭ ونىمدەر ساپالى شيكىزاتتان جاسالعاندىقتان باعاسىنا اسەر ەتەدى. ەكىنشى جاعداي - جالعا الۋ قۇنىنىڭ قىمباتتاۋى. ساۋدا ۇيىندەگى دۇكەندەردى جالعا الۋ قىمبات بولعاندىقتان ول باعاعا دا اسەر ەتەدى. وسى تۇستا مەملەكەتتەن كومەك الۋعا تىرىسىپ جاتىرمىز.
- تۇراقتى تۇتىنۋشىلار كوپ پە؟ قازاقستاندا جاسالعان تاۋارلاردى وزگە ەلگە ەكسپورتتايسىزدار ما؟
- حالىق وتاندىق ونىمگە قىزىعادى. تۇراقتى تۇتىنۋشىلارىمىز دا بار. قوي كورپەسى مەن تۇيە ءجۇن كورپەسىنە امەريكا، كانادا، رەسەيدەن سۇرانىس تۇسەدى.
- ساپاسى مەن باعا ءبىر-بىرىنە ۇيلەسەدى مە؟
- ساپاسى مەن باعاسى جاعىنان شەتەلدەن كەم ەمەسپىز. باستىسى حالىققا قولجەتىمدى ەتۋگە تىرىسىپ جاتىرمىز. شەتەلدىك تاۋارلارعا قاراعاندا قولايلى دەپ ايتا الامىن.
- سۇحباتىڭىزعا راقمەت!
سىمبات ناۋحان
«ادىرنا» ۇلتتىق پورتالى
