ورتالىق ازيا ەلدەرى «Made in Central Asia» برەندىن قۇرۋعا كەلىستى

ورتالىق ازيا ەلدەرى ءوزارا ساۋدا كولەمىن 20 ميلليارد دوللارعا جەتكىزۋ جانە «Made in Central Asia» اتتى ورتاق برەند قالىپتاستىرۋ تۋرالى كەلىسىمگە كەلدى. بۇل ماسەلەلەر 13 قاراشا كۇنى تاشكەنتتە وتكەن ورتالىق ازيا مەملەكەتتەرى مەن ازەربايجاننىڭ ساۋدا جانە ينۆەستيتسيا مينيسترلەرىنىڭ العاشقى وتىرىسىندا تالقىلاندى، دەپ حابارلايدى “ادىرنا”.

وزبەكستاننىڭ ينۆەستيتسيالار، ونەركاسىپ جانە ساۋدا ءمينيسترى لازيز كۋدراتوۆ ءوزارا ساۋدا اينالىمىن ەكى ەسە ارتتىرۋ تۋرالى ۇسىنىس ايتتى.

ء«بىزدىڭ ەكونوميكالارىمىزدىڭ ءبىر-ءبىرىن تولىقتىراتىنىن جانە بىرلەسكەن جوبالارعا بيزنەستىڭ قىزىعۋشىلىعى ارتىپ كەلە جاتقانىن ەسكەرسەك، ساۋدا اينالىمىنىڭ الەۋەتى ءالى دە وراسان. وسىعان بايلانىستى ءوزارا ساۋدانى 20 ميلليارد دوللارعا دەيىن ارتتىرۋ بويىنشا بىرلەسكەن ءىس-قيمىل جوسپارىن ازىرلەۋدى ۇسىنامىز»، – دەدى ول.

وزبەكستان ۇسىنعان دەرەكتەرگە سايكەس، 2017–2024 جىلدارى ايماق ەلدەرىنىڭ ءوزارا ساۋداسى ەكى ەسە ءوسىپ، 11 ميلليار دوللارعا جەتكەن. كۋدراتوۆتىڭ پىكىرىنشە، جوسپار اياسىندا كەدەندىك راسىمدەردى ۇيلەستىرۋ، تسيفرلىق قۇجات اينالىمىن ەنگىزۋ، رۇقسات بەرۋ قۇجاتتارىن ءوزارا تانۋ جانە ء«بىر تەرەزە» جۇيەسىن دامىتۋ قاجەت. ناقتى قادامداردىڭ قاتارىندا – وندىرۋشىلەردىڭ بىرىڭعاي ەلەكتروندىق كاتالوگى جانە ۆەدومستۆولار مەن ساۋدا-ونەركاسىپ پالاتالارىنىڭ تسيفرلىق پلاتفورمالارىن بىرىكتىرۋ بار.

«بۇل بيزنەسكە جەتكىزۋشىلەر مەن ساتىپ الۋشىلاردى تىكەلەي تابۋعا مۇمكىندىك بەرەدى، ترانزاكتسيالىق شىعىنداردى جانە دەلدالدارعا تاۋەلدىلىكتى ازايتادى»، – دەپ ناقتىلادى ول.

وزبەكستان 2026 جىلى سامارقاندا ورتالىق ازيا مەن ازەربايجاننىڭ ينۆەستيتسيالىق فورۋمىن وتكىزىپ، ءدال وسى الاڭدا «Made in Central Asia» وڭىرلىك برەندى تانىستىرىلاتىنىن دا ۇسىندى. ءمينيستردىڭ ايتۋىنشا، ورتاق بەلگى ونىمدەردىڭ سىرتقى نارىقتاردا تانىمالدىعىن ارتتىرادى.

قازاقستاننىڭ ساۋدا جانە ينتەگراتسيا ءمينيسترى ارمان شاققاليەۆ «ساتىپ ال – سات» مودەلىنەن «ينۆەستيتسيالا – ءوندىر – سات» فورماتىنا كوشۋدى ۇسىندى.

«بۇل باعىتقا سەرپىن بەرۋ ءۇشىن وزبەكستانمەن ونەركاسىپتىك كووپەراتسيانى دامىتۋ باعدارلاماسىن بەكىتۋ جوسپارلانىپ وتىر. ونىڭ كەيبىر ەلەمەنتتەرى ورتالىق ازيا ەلدەرى مەن ازەربايجانعا دا تارالۋى مۇمكىن»، – دەدى ول.

قازاقستان سونداي-اق ورتاق برەند يدەياسىن قولداپ، جۇمىستى تسيفرلىق پلاتفورمالاردان باستاۋدى ۇسىندى.

تاجىكستاننىڭ ەكونوميكالىق دامۋ جانە ساۋدا ءمينيسترى زاۆكي زاۆكيزودا تسيفرلاندىرۋدىڭ ماڭىزىن اتاپ ءوتتى. ونىڭ ايتۋىنشا، جاساندى ينتەللەكت شەشىمدەرىمەن اينالىساتىن تاجىك ستارتاپى Zypl.ai قازىرگى تاڭدا 15 ەلدە، سونىڭ ىشىندە وزبەكستان مەن قازاقستاندا جۇمىس ىستەيدى. سونىمەن قاتار ول Alif فينتەح-كومپانياسىن مىسال رەتىندە كەلتىردى — كومپانيا قىسقا مەرزىمدە ايماقتاعى تسيفرلىق تولەمدەر مەن قارجىلىق قىزمەتتەر نارىعىنىڭ كوشباسشىلارىنىڭ بىرىنە اينالعان.

«بۇل ايماق يننوۆاتسيالارىنىڭ حالىقارالىق دەڭگەيگە شىعىپ، وزدەرىنىڭ جوعارى تەحنولوگيالىق برەندتەرىن قالىپتاستىرا الاتىنىن كورسەتەتىن جارقىن مىسال»، – دەدى ول.

تۇركىمەنستاننىڭ وكىلى نازار اعانوۆ ەلدىڭ راسىمدەردى جەڭىلدەتۋ مەن ەلەكتروندىق پلاتفورمالاردى دامىتۋدى «ورتاق ماقساتتارعا جەتۋدىڭ نەگىزگى قادامدارى» رەتىندە كورەتىنىن جانە جاڭا جۇمىس توبىنا قاتىسۋعا دايىن ەكەنىن جەتكىزدى.

كەزدەسۋدە قىرعىزستاندى تانىستىرعان قازاقستانداعى ەلشى دۇيشونكۇل چوتونوۆ بۇل فورماتتى «جاڭا دەڭگەيدەگى پلاتفورما» دەپ اتادى جانە ورتاق شەشىمدەر ايماق ەكونوميكاسىنىڭ بولاشاعى مەن حالىقتىڭ ءال-اۋقاتىنا تىكەلەي اسەر ەتەتىنىن اتاپ ءوتتى.

ازەربايجان ەكونوميكا ءمينيسترىنىڭ ءبىرىنشى ورىنباسارى ەلنۋر اليەۆ ءوز تاراپىنان سوڭعى 9 ايدا ايماق ەلدەرىمەن تاۋار اينالىمى 58%-عا ءوسىپ، 1 ميلليارد دوللاردان اسقانىن حابارلادى. ول بيزنەس ءۇشىن كولىك ينفراقۇرىلىمىن دامىتۋدىڭ ماڭىزدى ەكەنىن ايتتى.

«وسى باعىتتار بويىندا ينۆەستيتسيالىق-لوگيستيكالىق حابتار قارقىندى دامىپ كەلەدى، بۇل بىرلەسكەن كاسىپورىنداردىڭ قۇرىلۋىنا جول اشادى»، – دەدى اليەۆ.

كەزدەسۋ قورىتىندىسى بويىنشا قاتىسۋشىلار ەكونوميكالىق ىنتىماقتاستىقتى تەرەڭدەتۋ، كووپەراتسيا مەن بىرلەسكەن وندىرىستەردى دامىتۋ، سونداي-اق ينۆەستيتسيالىق جۇمىس ءۇشىن جاڭا قۇرالدار قۇرۋ جونىندەگى نيەتتەرىن بەكىتكەن بىرلەسكەن كومميۋنيكە قابىلدادى.