Jergilikti ónim shyǵarý – bir másele, ony tutynýshynyń talabyna saı jetkizý – taǵy bir másele. Ondaıda baǵa belgileýdiń de óz talaptary bar.
Kez kelgen saýda úıindegi dúken sórelerine nazar salsańyz syrttan kelgen taýarlar qaptap tur. Kıim-keshek, aıaq-kıim, azyq-túlik, úıge qajetti taýarlardyń kóbi kórshiles Reseı, Qyrǵyzstan, Ózbekstan, Qytaı elderinen keletini jasyryn emes. Degenmen, «Qazaqstanda jasalǵan» belgisimen turǵan taýarlar da az emes.
Sondaı ónim óndirip júrgenderdiń biri – Toqtar Birjanuly. «Sapa jaǵynan shetelden kem emespiz» deıdi kásipker. Birneshe jyl buryn Mońǵolııadan kóship kelgen qandas elge kelip, kásip bastaǵan. Búginde «Bizdiki» atymen tanymal brendtiń ıesimen «Adyrna» tilshisi suhbattasty.
- Eń alǵash bul kásip qalaı bastaldy? Alǵashqy taýar qandaı boldy?
- Bizdiń ónimder tolyq Qazaqstanda óndiriledi. 2022 jyly kóktemnen bastap osy kásippen aınalystyq. Al 2016 jyldan bastap shulyq óndire bastaǵadyq. Qazir birneshe qalada dúkenimizdiń fılıaldary bar. Bizdiń taýarlar qoı, túıe júninen, taza maqtadan jasalady. Bastysy kıimderimizdiń barlyǵy jyly, yńǵaıly, sándi ári taza Otandyq ónimderden tigilgen.
- Otandyq ónimderdi daıyndaý, saýdalaý ıdeıasy, osyndaı dúken ashý kimniń oıy boldy?
- Men ózim Mońǵolııadan kelgen qandaspyn. 2012 jyly Mońǵolııanyń jún ónimderin elimizge ákelip, sata bastadyq. Sol kezde Mońǵolııanyń jún-shulyqtaryn óndiretin kompanııa kóz aldymyzda ósip, órkendeı bastady. Bizde de tutynýshylar sany artty. Sodan «bizdiń aqshalarymyz nege Mońǵolııaǵa ketýi kerek, nege ózimiz osy kásippen aınalyspasqa?» degen oı keldi. Túriktiń Zara, LC Waikiki, Koton sııaqty brend qalyptastyryp, óz ónimimizdi álemge tanytý – bizdiń maqsat.
- «Otandyq ónim» dese kópshilik qymbatsynatyn sekildi. Al sizder óndiretin taýardyń baǵasy qansha?
- Baǵa jaǵy ortasha. Bizdiń ónimder sapaly shıkizattan jasalǵandyqtan baǵasyna áser etedi. Ekinshi jaǵdaı - jalǵa alý qunynyń qymbattaýy. Saýda úıindegi dúkenderdi jalǵa alý qymbat bolǵandyqtan ol baǵaǵa da áser etedi. Osy tusta memleketten kómek alýǵa tyrysyp jatyrmyz.
- Turaqty tutynýshylar kóp pe? Qazaqstanda jasalǵan taýarlardy ózge elge eksporttaısyzdar ma?
- Halyq otandyq ónimge qyzyǵady. Turaqty tutynýshylarymyz da bar. Qoı kórpesi men túıe jún kórpesine Amerıka, Kanada, Reseıden suranys túsedi.
- Sapasy men baǵa bir-birine úılesedi me?
- Sapasy men baǵasy jaǵynan shetelden kem emespiz. Bastysy halyqqa qoljetimdi etýge tyrysyp jatyrmyz. Sheteldik taýarlarǵa qaraǵanda qolaıly dep aıta alamyn.
- Suhbatyńyzǵa raqmet!
Symbat Naýhan
«Adyrna» ulttyq portaly
