قازاقستاندىقتار جاقىندا عانا جاڭا قىزمەتكە تاعايىندالعان ءمادي احمەتوۆتى قىزمەتىنەن بوساتۋدى تالاپ ەتىپ، پەتيتسيا جاريالادى، دەپ حابارلايدى "ادىرنا" ءتىلشىسى.
ءمادي احمەتوۆ بىرەر كۇن بۇرىن الماتى وبلىسىنىڭ جاستار ساياساتى باسقارماسىنىڭ باسشىسى بولىپ تاعايىندالعان. دەگەنمەن، "ەڭ جاس دەپۋتات" بولعان باسشىنىڭ قىزمەتتەن كەتۋىن تالاپ ەتىپ، پەتيتسيا قول قويعانداردىڭ سانى 340-تان استام. پەتيتسيا Alash online سايتىندا جاريالاندى.
پەتيتسيانىڭ اۆتورى سايد ساماتوۆ ەسىمدى ازامات.
«وسى جىلدىڭ قىركۇيەك ايىندا الەۋمەتتىك جەلىلەردە ءماجىلىستىڭ بۇرىنعى دەپۋتاتى مادي احمەتوۆ الماتى وبلىسىنىڭ جاستار ساياساتى باسقارماسىنىڭ باسشىسى قىزمەتىنە دايىندالىپ جاتىر دەگەن اقپارات پايدا بولدى. سودان كەيىن اكىمدىكتىڭ ءباسپاسوز قىزمەتى بۇل ورىننىڭ شىنىمەن بوس ەكەنىن حابارلادى. بىراق ول كەزدە ۇمىتكەرلەر تۋرالى ەشقانداي مالىمەت بولعان جوق»، – دەلىنگەن پەتيتسيا ماتىنىندە.
احمەتوۆ قوعامدا ساياسي كوزقاراسىمەن تانىلىپ ۇلگەرگەن. ول 2019 جىلى «قازاق جاستارىنىڭ» اتىنان سويلەگەن سوزىندە الماتىدا ەكس-پرەزيدەنت نۇرسۇلتان نازارباەۆقا ەسكەرتكىش ورناتۋ تۋرالى ۇسىنىس جاساعان بولاتىن. ودان كەيىن ول پرەزيدەنتتىك سايلاۋدا قر پرەزيدەنتى قاسىم-جومارت توقاەۆقا داۋىس بەرۋگە شاقىردى.
كوزقاراسىنىڭ جىلدام وزگەرۋىمەن بيلىككە دە، حالىققا دا تانىلعان بۇرىنعى دەپۋتاتقا قاتىستى تاعى دا ءبىر پەتيتسيا جاريالانعان بولاتىن. 10 مىڭنان استام ادام قولداعان پەتيتسيادا احمەتوۆتىڭ اسكەري بورىشىن وتەۋى تالاپ ەتىلگەن.
