مادەنيەت جانە اقپارات ءمينيسترى ايدا بالاەۆا لگبت-نى ناسيحاتتاۋعا قاتىستى پەتيتسيا بويىنشا بەينەۇندەۋ جولدادى. بۇل تۋرالى ول فەيسبۋكتەگى پاراقشاسىندا جازدى، دەپ حابارلايدى “ادىرنا” ۇلتتىق پورتالى.
بيىل 10 ماۋسىمىندا مادەنيەت جانە اقپارات مينيسترلىگىنە لگبت-نى اشىق جانە جاسىرىن تۇردە ناسيحاتتاۋعا تولىق تىيىم سالۋ تۋرالى ءوتىنىش كەلىپ ءتۇستى.
“بۇل ماسەلە قوعامدا ۇلكەن رەزونانس تۋعىزىپ، قىزۋ پىكىرتالاس بولدى. ويتكەنى قازىرگى كەزدە مەملەكەت تاراپىنان ادام قۇقىقتارىنا كوپ كوڭىل ءبولىنىپ وتىر. سونداي-اق قازاقستاندىقتار قوعامدىق ماڭىزدى تاقىرىپتاردى تالقىلاۋعا جانە مەملەكەتتىك ساياساتتى قالىپتاستىرۋعا بەلسەندى اتسالىسۋدا. قازاقستاندا پرەزيدەنتتىك رەفورمالار اياسىندا دەموكراتيالىق دامۋ، ادام قۇقىقتارىن قورعاۋ جانە زاڭ ۇستەمدىگىن نىعايتۋ ءۇشىن بارلىق قاجەتتى زاڭنامالىق جاعدايلار جاسالعان. سونىڭ ءبىرى – پەتيتسيا ينستيتۋتى.
كونستيتۋتسيا نورمالارىنا جانە حالىقارالىق مىندەتتەمەلەرگە سايكەس، قازاقستان كەمسىتۋگە قارسى ساياساتتى جۇزەگە اسىرادى. ول ساياسات نەگىزىندە قوعامدا كونستيتۋتسيالىق كەپىلدىك، جانجال تۋدىرماۋ جانە تولەرانتتىلىقتىڭ ساقتالۋىن قامتاماسىز ەتۋ مىندەتتەلگەن”، - دەپ جازدى بالاەۆا.
قوعامداعى وسىنداي ماڭىزدى پەتيتسيانى تالقىلاۋعا كوپتەگەن قازاقستاندىقتار قاتىسىپ، كوتەرىلگەن ماسەلەلەر بويىنشا پىكىرلەر ەكىگە جارىلدى.
“جۇمىس توبىنا قوعامنىڭ ءتۇرلى توپتارىنىڭ اراسىنان 45 ادام كىردى. اتاپ ايتقاندا، قۇزىرلى مەملەكەتتىك ورگان وكىلدەرى، پارلامەنت دەپۋتاتتارى، قوعامدىق بىرلەستىكتەر، ساراپشىلار مەن بارلىق مۇددەلى تاراپتار قاتىستى. وسىلايشا، قوعامىمنىڭ ۇلكەن بولىگى ماسەلەنى تالقىلاۋعا بەلسەندى ارالاستى.
جۇمىس توبىنىڭ ەكى وتىرىسىن جانە اۋقىمدى ساراپتامالىق تالقىلاۋلار وتكىزۋ كەزىندە ءوتىنىش بويىنشا كەلىپ تۇسكەن ەسكەرتۋلەر تالدانىپ، جۇيەلى جۇمىس جۇرگىزىلدى. ۇلتتىق جانە حالىقارالىق نورماتيۆتىك قۇقىقتىق اكتىلەرگە سالىستىرمالى تالداۋ جاسالدى. پەتيتسيادا كوتەرىلگەن ماسەلەلەردى رەتتەۋدىڭ حالىقارالىق تاجىريبەسى زەردەلەندى. جەتەكشى ۇلتتىق عىلىمي-زەرتتەۋ ۇيىمدارىمەن جانە ساراپشىلارمەن كەڭەس وتكىزىلدى”، - دەپ جازدى ول.
پەتيتسيا تاقىرىبى بويىنشا حالىقارالىق جانە قازاقستاندىق ۇكىمەتتىك ەمەس ۇيىمدار ۇسىنعان پىكىرلەر، ۇسىنىستار مەن دالەلدەر، زەرتتەۋ ماتەريالدارى مەن ۇندەۋلەردىڭ بارلىعى نازارعا الىندى.
“دەگەنمەن، بۇل جۇمىس پەتيتسيا بويىنشا تۇپكىلىكتى شەشىم قابىلداۋعا جەتكىلىكسىز. زەرتتەۋلەر مەن تالقىلاۋلار قازىرگى ۋاقىتتا بۇل باعىتتاعى اۋقىمدى جۇمىستاردى جالعاستىرىپ، ماسەلەنى جان-جاقتى زەرتتەپ، ونى رەتتەۋدىڭ ناقتى تەتىكتەرىن ازىرلەۋ كەرەكتىگىن كورسەتتى. بۇل ۋاقىت الادى.
دەگەنمەن، مادەنيەت جانە اقپارات مينيسترلىگىنىڭ ۇستانىمى – كامەلەتكە تولماعانداردىڭ قۇقىعىن قورعاۋ جانە قاۋىپسىزدىگىن قامتاماسىز ەتۋ تۇرعىسىنان پەتيتسيانى ءىشىنارا قولداۋ. بالالاردىڭ جىنىستىق قول سۇعىلماۋشىلىعىنا قارسى قىلمىستاردىڭ ءوسۋى اياسىندا "جاسوسپىرىمدەر مەن بالالاردى جىنىستىق قاتىناستاردى، ونىڭ ىشىندە ءداستۇرلى ەمەس قاتىناستاردى ناسيحاتتاۋ مەن كۋلت جاساۋدان قورعاۋ» تالابى وزەكتى ءارى قاجەت.
بالالارىمىزدىڭ قاۋىپسىز اقپاراتتىق ورتادا ءوسىپ، دامۋى وتە ماڭىزدى.
ءبىزدىڭ ۇرپاق الدىنداعى پارىزىمىز – ولارعا دۇرىس رۋحاني-ادامگەرشىلىك باعىت-باعدار بەرىپ، ءداستۇرلى وتباسىلىق قۇندىلىقتاردى بويىنا ءسىڭىرۋ. سونداي-اق ۇلتتىق مادەني مۇرانى ۇستانۋعا جانە گەنەتيكالىق كودتى ساقتاۋعا جاعداي جاساۋ وتە ماڭىزدى”، - دەدى ايدا بالاەۆا.
