وزبەكستان پرەزيدەنتى شاۆكات ميرزيەەۆ ماجوريتارلىق سايلاۋ جۇيەسىنەن - ارالاس پروپورتسيونالدى سايلاۋ جۇيەسىنە كوشۋ تۋرالى كونستيتۋتسيالىق زاڭعا قول قويدى. قۇجات «حالق سۋزي» گازەتىندە جاريالاندى، دەپ حابارلايدى "ادىرنا" ۇلتتىق پورتالى.
وسى ۋاقىتقا دەيىن وزبەكستاندا ماجوريتارلىق سايلاۋ جۇيەسى قولدانىلعان، وندا ءوز وكرۋگىندە كوپشىلىك داۋىس العان كانديداتتار سايلاناتىن. ونىڭ ۇستىنە بارلىق كانديداتتار ەلدە ارەكەت ەتەتىن پارتيالاردىڭ اتىنان شىعۋى كەرەك بولدى.
پروپورتسيونالدى جۇيەدە داۋىس بەرۋ پارتيالىق تىزىمدەر بويىنشا وتەدى، ونىڭ ناتيجەلەرى ءار پارتيا العان داۋىستار سانىنا پروپورتسيونالدى مانداتتاردى ءبولۋ پرينتسيپىمەن انىقتالادى.
وزبەكستاننىڭ سايلاۋ كودەكسىنە جاڭا زاڭمەن ەنگىزىلگەن تۇزەتۋلەرگە سايكەس، پارلامەنتتىڭ زاڭ شىعارۋ پالاتاسىنىڭ 75 دەپۋتاتى ماجوريتارلىق جۇيە بويىنشا (كانديدات ءۇشىن داۋىس بەرۋ) ءبىر مانداتتى وكرۋگتەر بويىنشا، ال قالعان 75-ءى پروپورتسيونالدىق جۇيە بويىنشا ساياسي پارتيالار ءۇشىن بەرىلگەن داۋىستار نەگىزىندە (كانديداتتاردىڭ تىزىمىنە داۋىس بەرۋ) سايلانادى.
بۇل رەتتە ايەلدەردىڭ سانى ساياسي پارتيادان ءبىر مانداتتى سايلاۋ وكرۋگتەرى بويىنشا، سونداي-اق پارتيالىق ءتىزىم بويىنشا دەپۋتاتتىققا كانديداتتار سانىنىڭ كەمىندە 40 پايىزىن قۇراۋى ءتيىس. «پارتيالىق تىزىمدەگى ءاربىر بەس كانديداتتىڭ كەم دەگەندە ەكەۋى ايەل بولۋى كەرەك»، - دەپ ءتۇسىندىردى ادىلەت مينيسترلىگى.
پروپورتسيونالدىق جۇيە بويىنشا سايلاناتىن زاڭ شىعارۋ پالاتاسى دەپۋتاتتارىنىڭ مانداتتارى 7 جانە ودان دا كوپ پايىز داۋىس العان ساياسي پارتيالار اراسىندا بولىنەدى. مۇنداي ناتيجەنى ءبىر عانا پارتيا السا، وندا ەڭ كوپ داۋىس جيناعان ەكىنشى پارتيانىڭ كانديداتتارى دەپۋتات بولا الادى.
