جىل سايىن 16-جەلتوقساندا قۋانارىمدى دا بىلمەيمىن، قۋانباسىمدى دا بىلمەيمىن. تاۋەلسىزدىك مەرەكەسى دەيمىز عوي. ءوز باسىم ءبىر تۇسىنىكسىز كۇي كەشەمىن. قۋانايىن دەسەم دە بىرنارسە جىبەرمەي تۇرادى. قۋانا المايمىن. ارينە، ساياسي تۇرعىدان قۋاناسىڭ عوي. الايدا قۋانىشىڭدى باياندى ەتەتىن حالىقتىڭ تۇرمىستىق جاعدايى كەرى كەتىپ بارادى. قۋانبايىن دەسەم، 260 جىلعا سوزىلعان بوداندىقتان سوڭ قايتارىپ العان تاۋەلسىزدىگىمىز قىمبات ەكەنىن تۇسىنەمىن. 1991 جىلى 16-جەلتوقساندا جوعارعى كەڭەستىڭ تاۋەلسىزدىك تۋرالى كونستيتۋتسيالىق زاڭ جوباسى تالقىلانىپ، ول قابىلدانعان سەسسسياسىنان رەپورتاج جاريالاعانىم ەسىمە تۇسەدى. ەڭ ۇلكەن قۋانىش سول كەزدە بولىپ ەدى. ال قازىر ونداي قۋانىش جوق!
سوناۋ 90-شى جىلدارى بيلىك «قازاقستان تابىسىنىڭ 93 پايىزىن ماسكەۋ الىپ جاتىر» دەۋشى ەدى. قازىر ءبارى وزىمىزدە ەمەس پە؟! التىن، كۇمىس، پلاتينا، مۇناي مەن گازدىڭ ۇستىندە وتىرىپ حالقىمىز نەگە جۇدەيدى؟ ءبىزدى كىم توناپ جاتىر؟
بۇعان توقتاۋ بولا ما جوق پا؟
قارادان قاراپ تۇرىپ ناليسىڭ. قاناتىن كەڭگە جايعان كوررۋپتسيادان شوشيسىڭ. ول اقپارات كوزدەرىندە ايتىلاتىن بىرەن-ساران فاكت ەمەس، ول بۇكىل اعزاعا تاراپ، مەملەكەتتىك جۇيەنى ءشىرىتىپ تۇر. ەكونوميكا، اۋىل شارۋاشىلىعى، ءبىلىم بەرۋ، مەديتسينا، جول قۇرىلىسى قاي سالانى الاڭىز دا مەملەكەت مۇددەسىنە تىرىسىپ جاتقاندار كەمدە كەم. اقساقتى تىڭداي، وتىرىكتى شىنداي كورسەتەتىن نازارباەۆ بيلىكتەن كەتكەنىمەن نازارباەۆ رەجيمى قاز قالپىندا. سوندا قايتىپ كوگەرەمىز؟
تۇبەگەيلى رەفورمالار جۇزەگە اسۋ ءۇشىن بىزگە وتارسىزداندىرۋ دا، سوۆەتسىزدەندىرۋ دە، ليۋستراتسيا دا اۋاداي قاجەت بولىپ تۇر. توقاەۆ بيلىگى سولاردى جۇزەگە اسىرۋعا قاجەتتى كۇش-جىگەر تابا الار ما ەكەن؟
ءبىر بىلەتىنىمىز، قازاقستانداعى تۇراقتىلىقتىڭ تۇتقاسى دا، بيلىكتىڭ باستاۋى دا حالىقتىڭ قولىندا عوي. اللا تاعالام سىرتتان كەزەنگەن جاۋدان، ىشتەگى داۋدان ساقتاسىن! تۇنەرگەن تاۋەلسىزدىكتەن ارايلى ازاتتىققا تەزىرەك جەتەيىك!
Marat Baidildauly
