بۇگىن 1929 جىلى 16 جەلتوقساندا دۇنيەگە كەلگەن بيبىگۇل تولەگەنوۆا 94 جاسقا تولدى. تانىمال ءانشى تۋعان كۇنىندە ءوز ىزگى نيەتىن ءبىلدىردى.
«بارشاڭىزعا زور دەنساۋلىق، باقىت، شاڭىراقتارىڭىزعا اماندىق، توبەمىزدە تازا، اشىق اسپان، تىنىشتىق، جان دۇنيەمىزدە بۇگىنگى قارداي قۋانىش پەن نۇر بولۋىن تىلەيمىن. تاۋەلسىزدىك كۇنى - قازاقستان ءۇشىن وتە ۇلكەن مەرەكە. وسى كۇنى ءبارىمىزدىڭ دەنساۋلىعىمىز ءۇشىن توست كوتەرۋلەرىڭىز كەرەك دەپ ويلايمىن»، - دەدى تۋعان كۇن يەسى.
بيبىگۇل احمەتقىزى ءوزىنىڭ 70 جىلدان اسا شىعارماشىلىق جولىندا جۇزدەگەن وپەرالىق پارتيالاردى ورىنداپ، «دالا قىزى»، «ءبىزدىڭ سۇيىكتى دارىگەر»، «بۇل شۇعىلادا بولعان»، «تاقيالى پەرىشتە» فيلمدەرىندە وزىندىك بەينەلەر جاساعان، ال اتى اڭىزعا اينالعان ءانشىنىڭ ورىنداۋىنداعى «بۇلبۇل» ءانى دۇنيەجۇزىندەگى ونەرسۇيەر قاۋىمنىڭ ەسىنەن ماڭگى ۇمىتىلماس.
1958 جىلى موسكۆا قالاسىندا قازاق ونەرىنىڭ ونكۇندىگىندە انشىلىك بيىگىنەن كورىنىپ، سول جولى قازاق سسر حالىق ءارتيسى اتانادى. ءانشى لەنين وردەنى مەن ەڭبەك قىزىل تۋ وردەنىمەن، مەدالدارمەن ماراپاتتالعان. قازاقستان مەملەكەتتىك سىيلىعىنىڭ لاۋرەاتى (1966), سسسر حالىق ءارتيسى (1967).
بۇگىنگى كۇنگە دەيىن بيبىگۇل تولەگەنوۆا اتىنداعى 11 حالىقارالىق ۆوكالدىق بايقاۋ وتكىزىلىپ، ونداعان ونەرپازدىڭ وركەندەۋىنە سەرپىن بەرىپ، الەمدىك ارەناعا جولداما بەرىلدى.
«ادىرنا» ۇلتتىق پورتالى
