بۇگىن قازاقتىڭ كۇرەسكەر تاريحشىسى، تاريح عىلىمىنىڭ دوكتورى، پروفەسسور، قازاقستان عىلىم اكادەمياسىنىڭ كوررەسپوندەنت-مۇشەسى – ەرمۇحان بەكماحانوۆتىڭ تۋعانىنا 110 جىل تولدى، دەپ حابارلايدى “ادىرنا” ۇلتتىق پورتالى.
ەرمۇحان بەكماحانۇلى 1915 جىلى 15 اقپاندا پاۆلودار وبلىسى، باياناۋىل اۋدانىندا دۇنيەگە كەلگەن.
1937 جىلى رەسەيدىڭ ۆورونەج قالاسىنداعى پەداگوگيكالىق ينستيتۋتىن بىتىرگەن. قازاق كسر حالىق اعارتۋ كوميسسارياتىنىڭ جانىنداعى عىلىمي زەرتتەۋ ينستيتۋتىندا ەڭبەك ەتكەن.
1946-1947 جىلداردا قازاق كسر عىلىم اكادەمياسىندا جاڭادان قۇرىلعان تاريح، ارحەولوگيا جانە ەتنوگرافيا ينستيتۋتى ديرەكتورىنىڭ عىلىمي جۇمىس جونىندەگى ورىنباسارى، 1947 جىلدان باستاپ، ءومىرىنىڭ سوڭىنا دەيىن، ياگني 1966 جىلعى مامىردىڭ التىسىنا دەيىن قازاق مەملەكەتتىك ۋنيۆەرسيتەتىندە ءوزى ۇيىمداستىرعان قازاقستان تاريحى كافەدراسىن باسقاردى.
1946 جىلى بەكماحانوۆ "قازاقستان ءحىح عاسىردىڭ 20-40 جىلدارىندا" اتتى دوكتورلىق ديسسەرتاتسيا قورعاپ، كەنەسارى قاسىمۇلىنىڭ كوتەرىلىسى جايىندا جازىپ، وعان "ۇلت-ازاتتىق قوزعالىس" دەگەن سيپات بەرەدى. قازاقستان تاراپىنان بايانداما جاساپ، سول جەردە قاعازسىز سويلەگەن ەرمۇحاندى كورگەن بارلىق حالىق تاڭقالعان كورىنەلى.
سودان كەيىن ول "ۇلتشىل" دەپ ايىپتالىپ 25 جىلعا باس بوستاندىعىنان ايىرىلىپ جەر اۋدارىلادى.
ول كىسىنىڭ لاگەردەن ءتيىستى ورگاندارعا جازعان كوپتەگەن ارىزدارىنىڭ ناتيجەسىندە، اكادەميك، قوعام قايراتكەرى اننا ميحايلوۆنا پانكراتوۆا سياقتى قايىرىمدى ادامداردىڭ كومەگىنىڭ ارقاسىندا بەريا اتىلعاننان كەيىن ە. بەكماحانوۆتىڭ ءىسى قايتا قارالىپ، 1954 جىلى 16 اقپاندا ونىڭ ءىسى جابىلىپ، ءوزى اقتالىپ شىقتى.
كوزىنىڭ تىرىسىندە اقتالماعان ەڭبەكتەرى، قازاق ەلى تاۋەلسىزدىگىن العاننان كەيىن اقتالىپ، قازاق ۋنيۆەرسيتەتى باسپاسىندا جارىق كورەدى.
