بيىلعى 28 قازاندا 46 شاحتەردىڭ ءومىرىن جالماعان كوستەنكوداعى اپاتقا 40 كۇن تولدى، دەپ حابارلايدى «ادىرنا» ءتىلشىسى.
ەڭ جويقىن اپات
قاراعاندى وبلىسىنداعى «ارسەلورميتتال تەمىرتاۋ» كومپانياسىنا قاراستى كوستەنكو اتىنداعى شاحتادا 28 قازان كۇنى ساعات 02:33-تە جارىلىس بولعان ەدى.
اپات كەزىندە شاحتادا 252 ادام بولىپ، ولاردىڭ 206-سى جەر بەتىنە شىقتى. ال قالعاندارىن امان الىپ قالۋ مۇمكىن بولمادى.
46 ادامنىڭ ءومىرىن قيعان كوستەنكوداعى اپات تاۋەلسىز قازاقستان تاريحىنداعى وندىرىستە بولعان ەڭ ءىرى اپات دەپ باعالاندى. الدىن الا مالىمەت بويىنشا، اپاتقا كومىر وياتىن ورىننان شىققان ءورت سەبەپ بولعان.
اپات بولعان كۇنى مەملەكەت باسشىسى قاسىم-جومارت توقاەۆ مارقۇم كەنشىلەردىڭ تۋىستارىمەن كەزدەسىپ، 29 قازاندى جالپىۇلتتىق ازا تۇتۋ كۇنى دەپ جاريالادى. بارلىق ايماقتا مەملەكەتتىك تۋى تومەن ءتۇسىرىلدى. بۇل تاۋەلسىز قازاقستان تاريحىنداعى ون ءۇشىنشى قارالى كۇن ەكەنى ايتىلدى.
قايعىلى وقيدان كەيىن باس پروكۋراتۋرا «تاۋ نەمەسە قۇرىلىس جۇمىستارى كەزىندە قاۋىپسىزدىك ەرەجەلەرىن بۇزۋ» (277-باپتىڭ 3-بولىگى) بويىنشا سوتقا دەيىنگى تەرگەۋ امالدارىنىڭ باستالعانىن حابارلادى. الايدا وسى ىسكە بايلانىستى ۇستالعاندار تۋرالى ءالى كۇنگە دەيىن رەسمي مالىمدەمە جاسالمادى.
كوزدەلگەن كومەك
پرەزيدەنت اپاتتىڭ ءمان-جايىن انىقتاۋ، كەنشىلەردى قۇتقارۋ جانە زارداپ شەككەندەر مەن قازا تاپقانداردىڭ وتباسىلارىنا شۇعىل كومەك كورسەتۋ جونىندە قاجەتتى شارالار قابىلداناتىنىن جەتكىزدى.
پرەزيدەنت توقاەۆتىڭ تاپسىرماسى بويىنشا بىرنەشە قولداۋ شارالارىنىڭ قاراستىرىلاتىنى ايتىلدى:
كومپانيا قاراجاتى ەسەبىنەن وتباسىلارعا باسپانا ساتىپ الۋ;
مورالدىق زيان ءۇشىن 10 جىلدىق جالاقى مولشەرىندە بىرجولعى تولەم;
اسىراۋىندا بولعان بالالارعا 18 جاسقا تولعانعا دەيىن اي سايىنعى ساقتاندىرۋ تولەمى (جوو ستۋدەنتى بولسا، 23 جاسقا دەيىن);
مەملەكەتتىك الەۋمەتتىك ساقتاندىرۋ قورىنان جالاقىسىنا بايلانىستى اي سايىنعى تولەم;
قامقورلىقتاعى ادامداردىڭ سانىنا بايلانىستى اسىراۋشىسىنان ايىرىلۋ جاعدايى بويىنشا اي سايىنعى مەملەكەتتىك جاردەماقى;
جۇمىس بەرۋشىنىڭ قاراجاتى ەسەبىنەن وتباسىلاردىڭ نەسيەلەرىن وتەۋ;
جەرلەۋگە بايلانىستى بارلىق شىعىنداردى وتەۋ;
قازا تاپقانداردىڭ بالالارى مەن جۇبايلارىن جۇمىسقا ورنالاستىرۋ;
23 جاسقا دەيىنگى بالالاردىڭ وقۋ اقىسىن تولەۋ;
قازا تاپقانداردىڭ جۇبايلارى مەن بالالارىنا ساناتوري-كۋرورتتىق ەمدەلۋگە جولدامالار بەرۋ;
ءۇيدى پەشپەن جىلىتاتىن وتباسىلارعا جىل سايىن كومىر ءبولۋ.
ۇكىمەتتەن بولەك، ءتۇرلى قورلار مەن مەتسەناتتار دا قازا بولعان كەنشىلەردىڭ وتباسىنا كومەك ءبولدى. ماسەلەن،«نۇرسۇلتان نازارباەۆ قورى» 6 قاراشادا كوستەنكو شاحتاسىندا قازا تاپقانداردىڭ وتباسىنا 50 ملن تەڭگە بولگەنىن حابارلادى. ال 18 قاراشادا تانىمال ءانشى ديماش قۇدايبەرگەننىڭ كامەلەتتىك جاسقا تولماعان بالالارى بار 20 وتباسىعا 20 ملن تەڭگە اۋدارعانى بەلگىلى بولدى.
«تاريحىمىزداعى ەڭ ناشار كومپانيا»
قايعىلى وقيعادان كەيىن «ارسەلورميتتال تەمىرتاۋعا» قاراستى شاحتالاردى ۇكىمەتكە بەرۋ تۋرالى شەشىم قابىلدانعانى ايتىلدى.
«مەن «ارسەلورميتتال تەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋ جونىندە تاپسىرما بەردىم. ءبىز ءارتۇرلى كومپانيالاردى كوردىك. ونىڭ ىشىندە جاقسىسى دا بار، جامانى دا بار. الايدا بۇل مەكەمە ۇكىمەتپەن جانە كاسىپورىنمەن ىنتىماقتاستىق تۇرعىسىنان ءبىزدىڭ تاريحىمىزداعى ەڭ ناشار كومپانيا بولدى»،– دەدى توقاەۆ.
«كۇن سايىن ولىمگە يتەرمەلەدى»
6 جەلتوقسان كۇنى قازا تاپقان كەنشىلەردىڭ تۋعان-تۋىستارى قاراعاندىداعى شاحتەرلەر داڭقى ەسكەرتكىشىنە گۇل قويىپ، مارقۇمداردى ەسكە الدى.
«كىنالىلەردىڭ جازالانعانىن قالايمىز. ولار كۇن سايىن شاحتەرلەردى ولىمگە يتەرمەلەدى. باس تارتىپ، قارسىلىق كورسەتە المايتىندارىن ءبىلدى»،—دەيدى قازا بولعانداردىڭ جاقىندارى.
بۇدان بولەك ساقتاندىرۋ تولەمدەرىن الۋ ءۇشىن مارقۇم شاحتەرلەردىڭ اسىراۋىندا بولعاندارىن دالەلدەپ، سوتقا بارۋعا ءماجبۇر ەكەندەرىن اتاپ ءوتتى. ياعني، ولار وزدەرىنە بولىنگەن اقشانى الۋ ءۇشىن كوپتەگەن كەڭسەلىك كەدەرگىلەرگە تاپ بولعان.
بۇعان دەيىن كوستەنكو شاحتاسىندا قازا تاپقانداردىڭ تۋىستارى ۋادە ەتىلگەن قارجىنى الا الماي وتىرعانىن جەتكىزگەندەرىن جازعان ەدىك.
رەسمي مالىمەت بويىنشا، "ارسەلورميتتال تەمىرتاۋ" نىساندارىندا كەيىنگى 15 جىلدا 120-دان استام ادام وپات بولعان.
كوستەنكو شاحتاسىندا قازا تاپقان كەنشىلەردىڭ تولىق ءتىزىمىن سىلتەمەدەن تولىق كورە الاسىز.
ديانا اسان
«ادىرنا» ۇلتتىق پورتالى
