پەرۋدىڭ وڭتۇستىگىندە اسكەري مي-17 تىكۇشاعى قۇلاپ، كەمىندە 15 ادام مەرت بولدى، دەپ حابارلايدى "ادىرنا" ۇلتتىق پورتالى تاسس اگەنتتىگىنە سىلتەپ.
رەسمي مالىمەتكە سايكەس، اپاتقا ۇشىراعان اۋە كەمەسى پەرۋدىڭ ارەكيپا وڭىرىندە تابىلعان. تىكۇشاق چالا-ۆەحو ەلدى مەكەنى ماڭىنان، كاراۆەلي پروۆينتسياسىنا قاراستى چالا وكرۋگى اۋماعىندا انىقتالعان.
اسكەري اۋە كۇشتەرى مەن ۇلتتىق پوليتسيانىڭ بىرلەسكەن ىزدەستىرۋ جۇمىستارى بارىسىندا راديوبايلانىسى ۇزىلگەن تىكۇشاقتىڭ ورنى 22 اقپان كۇنى تابىلعان. قۇتقارۋشىلار وقيعا ورنىنا جەتكەن سوڭ، 4 ەكيپاج مۇشەسى مەن 11 جولاۋشىنىڭ، ونىڭ ىشىندە بالالاردىڭ قازا بولعانىن راستادى.
الدىن الا مالىمەت بويىنشا، تىكۇشاق تابيعي اپات سالدارىنان زارداپ شەككەن ايماقتارعا كومەك كورسەتۋ ءۇشىن باعىت العان. اتاپ ايتقاندا، ارەكيپا وڭىرىندە سۋ تاسقىنى، وزەندەردىڭ ارناسىنان اسۋى جانە وزگە دە توتەنشە جاعدايلار تىركەلگەن. اۋە كەمەسى گۋمانيتارلىق كومەك جەتكىزىپ، ىزدەستىرۋ-قۇتقارۋ جۇمىستارىن جۇرگىزۋگە ءتيىس بولعان.
قازىرگى ۋاقىتتا اپاتتىڭ ناقتى سەبەپتەرى انىقتالىپ جاتىر.
