مەملەكەتتىك ءتىلدى قولداۋ ءۇشىن قر پرەزيدەنتى قاسىم-جومارت توقاەۆ قازاق ءتىلىن قولداۋ ماقساتىمەن قۇرىلعان QAZAQ TILI Endowment Qory-نا العاشقى جارنانى اۋداردى.
مەملەكەت باسشىسى ءوز قاراجاتىنان قوسقان جەكە جارنا كولەمى – 7 ملن. تەڭگە.
QAZAQ TILI Endowment Qory حالىقارالىق «قازاق ءتىلى» قوعامدىق ۇيىمىنىڭ باستاماسىمەن قۇرىلعان. نەگىزگى مىندەتى – مەملەكەتتىك ءتىلدى قولداۋ جانە دامىتۋمەن اينالىساتىن ەلىمىزدەگى ەڭ ءىرى ۇيىم – «قازاق ءتىلى» قوعامىنىڭ تۇراقتى ءارى ۇزاق مەرزىمدى دامۋىن قامتاماسىز ەتۋ.
بيىل 12 قازاندا قر پرەزيدەنتى قاسىم-جومارت توقاەۆ «قازاق ءتىلى» قوعامىنىڭ باسشىسىمەن كەزدەسۋىندە مەملەكەتتىك ءتىلدى دامىتۋ ماقساتىمەن ارنايى ەنداۋمەنت قورىن قۇرۋ باستاماسىنا قولداۋ بىلدىرگەن بولاتىن.
ەنداۋمەنت قورىنىڭ ەرەكشەلىگى – قورعا جينالعان قارجى جۇمسالمايدى. قاراجات تولىقتاي باسقارۋعا بەرىلەدى جانە ينۆەستيتسيالانادى. ەنداۋمەنت قورىنىڭ ينۆەستيتسيالىق قىزمەتىنەن تۇسكەن تابىسى بەنەفيتسيار ۇيىمنىڭ جارعىلىق مىندەتتەرىن ورىنداۋعا جۇمسالادى. الەم ەلدەرىندە ءبىلىم بەرۋ مەن الەۋمەتتىك باعىتتا جۇمىس ىستەيتىن قوعامدىق ۇيىمداردىڭ تۇراقتى ءارى ۇزاق مەرزىمدى قىزمەتىن قامتاماسىز ەتۋ ءۇشىن ەنداۋمەنت قورىن قۇرۋ تاجىريبەسى كەڭ تارالعان.
قازىرگى تاڭدا جاپونياداعى عىلىم مەن تەحنولوگيا قورى، سونىمەن قاتار ستەنفورد، گارۆارد ۋنيۆەرسيتەتتەرىنىڭ قورلارى دۇنيە جۇزىندەگى ەڭ ءىرى ەنداۋمەنت قورلارىنىڭ قاتارىنا كىرەدى. ەلىمىزدە ءىرى ۋنيۆەرسيتەتتەر، مەكتەپتەر مەن كوممەرتسيالىق ەمەس ۇيىمداردىڭ ەنداۋمەنت قورلارى ءساتتى جۇمىس ىستەپ جاتىر.
QAZAQ TILI Endowment Qory-نا جينالعان قاراجاتتى بەدەلدى قوعام قايراتكەرلەرى، عالىم-لينگۆيستەر مەن مەملەكەت وكىلدەرىنەن قۇرالعان تاۋەلسىز قامقورشىلار كەڭەسى باقىلاپ، قاداعالايتىن بولادى.
ەنداۋمەنت قورىنان تۇسكەن تابىس حالىقارالىق «قازاق ءتىلى» قوعامىنىڭ جۇمىسىن قامتاماسىز ەتۋ جانە مەملەكەتتىك ءتىلدى دامىتۋ، مودەرنيزاتسيالاۋ مەن ونى قولدانۋ اياسىن كەڭەيتۋگە باعىتتالعان جوبالارعا گرانت نەگىزىندە بەرىلىپ وتىرادى.
پرەزيدەنت «قازاق ءتىلى» قوعامىنا مەملەكەتتىك تىلدەگى مەديا جانە باسپا كونتەنتىن كوبەيتۋ ءۇشىن ناقتى جوبالار مەن شارالار كەشەنىن جۇزەگە اسىرۋ، ءتىلدى وقىتۋ مەن ۇيرەتۋ ادىستەمەسىن جەتىلدىرۋ، وقۋ ساۋاتتىلىعى مەن جازۋ مادەنيەتىن دامىتۋ، سونىمەن قاتار، قازاق ءتىلىن قولداۋ مەن ءتىلدى قولداناتىن قاۋىمداستىق اياسىن كەڭەيتۋ ءۇشىن زاماناۋي تەحنولوگيالىق شەشىمدەردى كەڭىنەن پايدالانۋدى تاپسىردى.
حالىقارالىق «قازاق ءتىلى» قوعامى مەملەكەتتىك ءتىلدىڭ جاناشىرلارى اتىنان قر پرەزيدەنتى قاسىم-جومارت كەمەلۇلى توقاەۆقا باستاماعا بىلدىرگەن قولداۋى مەن وزگەلەرگە كورسەتكەن ۇلگىسى ءۇشىن العىس ايتادى.
«ادىرنا» ۇلتتىق پورتالى
