مەملەكەت باسشىسى قاسىم-جومارت توقاەۆ رەسەيدىڭ لەنينگراد وبلىسىنىڭ گۋبەرناتورى الەكساندر دروزدەنكونى قابىلدادى. بۇل تۋرالى 19 قازاندا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
كەزدەسۋ بارىسىندا قازاقستان مەن رەسەيدىڭ ستراتەگيالىق سەرىكتەستىگىن دامىتۋدا وڭىرارالىق ىقپالداستىقتىڭ ماڭىزدى ءرول اتقاراتىنى اتاپ ءوتىلدى.
قاسىم-جومارت توقاەۆ لەنينگراد وبلىسىنىڭ ونەركاسىپ جانە كولىك-لوگيستيكا سالالارىنداعى ايتارلىقتاي الەۋەتىنە توقتالىپ، قازاقستان اتالعان ايماقپەن ءتيىمدى ىنتىماقتاستىق اياسىن كەڭەيتۋگە دايىن ەكەنىن راستادى. پرەزيدەنتتىڭ ايتۋىنشا، لەنينگراد وبلىسىمەن ساۋدا-ەكونوميكالىق قارىم-قاتىناستار قارقىندى دامىپ كەلەدى. بىلتىر ءوزارا تاۋار اينالىمى 400 ميلليون دوللاردان اسقان.
الەكساندر دروزدەنكو قوناقجايلىق تانىتقانى ءۇشىن مەملەكەت باسشىسىنا العىس ايتىپ، رەسەي پرەزيدەنتى ۆلاديمير ءپۋتيننىڭ سالەمىن جەتكىزدى. گۋبەرناتور ۇلى وتان سوعىسى جىلدارىندا لەنينگراد ءۇشىن شايقاسقان قازاقستاندىقتاردىڭ باتىرلىعى مەن قاھارماندىعىن ەرەكشە اتاپ ءوتتى. سونىمەن قاتار ولاردىڭ ەرلىگى تۋرالى ەستەلىكتەر كوزدىڭ قاراشىعىنداي ساقتالاتىنىنا نازار اۋداردى.
اڭگىمەلەسۋ بارىسىندا ونەركاسىپ، اتوم ەنەرگەتيكاسى، كولىك جانە اگروونەركاسىپ كەشەنى سالالارىندا بىرلەسكەن جوبالاردى جۇزەگە اسىرۋ پەرسپەكتيۆاسى، سونداي-اق مادەني-گۋمانيتارلىق باعىتتاعى ىنتىماقتاستىقتى تەرەڭدەتۋ مۇمكىندىكتەرى تالقىلاندى.
مەملەكەت باسشىسى قاسىم-جومارت توقاەۆ قازاقستان مەن رەسەي اراسىنداعى وداقتاستىق قاتىناستاردى نىعايتۋعا قوسقان ۇلەسى ءۇشىن الەكساندر دروزدەنكونى II دارەجەلى «دوستىق» وردەنىمەن ماراپاتتادى.
