پرەزيدەنت قاسىم-جومارت توقاەۆ بيىلعى قورىتىندى بويىنشا ەلوردانىڭ وڭىرلىك جالپى ءونىم كولەمى 34 ميلليارد دوللار بولاتىنىن مالىمدەدى. بۇل تۋرالى ول استانانى دامىتۋ جونىندەگى كەڭەستە ايتتى، دەپ حابارلايدى «ادىرنا» ءتىلشىسى.
«قازىر استانا قارقىندى ءوسىپ كەلەدى. ءتۇرلى باعىت بويىنشا بەلسەندى جۇمىس ىستەلىپ جاتىر. سوڭعى 11 ايدا قىسقا مەرزىمگە ارنالعان ەكونوميكالىق ينديكاتور 118,6 پايىزعا جەتتى. ينۆەستيتسيا، قۇرىلىس، شاعىن جانە ورتا بيزنەس سالاسىنداعى كورسەتكىشتەر بويىنشا استانا الدىڭعى ورىندا تۇر. ەلوردانىڭ كوش باسىندا بولۋى – زاڭدىلىق. بيىل ەلورداداعى تۇرعىن ءۇي قۇرىلىسى 5 ميلليونعا جۋىق شارشى مەتردى قۇرايدى. بۇل ەلىمىزدە پايدالانۋعا بەرىلگەن باسپانانىڭ تورتتەن ءبىرى جانە ورتالىق ازيا ايماعىنداعى باسقا استانالاردىڭ كورسەتكىشتەرىنەن بىرنەشە ەسە ارتىق.
وڭدەۋ ونەركاسىبى ءونىمىنىڭ كولەمى 2025 جىلدىڭ 11 ايىندا 2,8 تريلليون تەڭگەگە جەتىپ، 7,2 پايىز ءوستى. ياعني 6 ميلليارد دوللار شاماسىندا»،- دەدى ول.
پرەزيدەنت ساۋدا كولەمىنىڭ دە ارتقانىن جەتكىزدى.
«بيىلعى 11 ايدا ساۋدا كولەمى 10,8 تريلليون تەڭگەدەن اسىپ، 8,4 پايىز ءوسىم كورسەتكە. بۇل – شامامەن 22,5 ميلليارد دوللار. ماعان بەرىلگەن مالىمەت بويىنشا، قالا بيۋدجەتىنە 4,3 تريلليون تەڭگە سالىق تۇسكەن. مۇنى قوماقتى قارجى دەۋگە بولادى. استانانىڭ 2024 جىلعى وڭىرلىك جالپى ءونىم كولەمى 15 تريلليون تەڭگەدەن ءسال استى. بۇل – 32 ميلليارد دوللار. بيىلعى قورىتىندى بويىنشا 34, ءتىپتى، 35 ميلليارد دوللار (17 تريلليون تەڭگە نەمەسە ودان دا جوعارى) بولادى دەپ كۇتىلۋدە. ال قالاداعى حالىقتىڭ رەسمي سانى 1,6 ميلليون ادامعا جەتكەن»،-دەدى توقاەۆ.
مەملەكەت باسشىسى استانا اكىمىنە Smart City جوباسىن تەزدەتىپ اياقتاۋدى تاپسىردى.
«بۇعان دەيىن مەنىڭ تاپسىرمام بويىنشا استانادا Smart City جوباسى قولعا الىندى. جاقىن ارادا جەدەل باسقارۋ ورتالىعى ىسكە قوسىلادى. قالاداعى بەينەكامەرالاردىڭ جۇمىسى جانە باسقا دا قىزمەتتەر وسى ورتالىقتان باسقارىلادى. بۇل جۇيە ءتۇرلى قاۋىپ-قاتەرگە دەر كەزىندە نازار اۋدارۋعا جانە كەلەڭسىز وقيعالاردىڭ الدىن الۋعا مۇمكىندىك بەرەدى.
قازىر پلاتفورمانى ىسكە قوسۋ ءۇشىن دەرەكتەردى تالداۋ ورتالىعى سالىنىپ جاتىر. وسى تسيفرلىق ينفراقۇرىلىمدى قۇقىق قورعاۋ ورگاندارى دا قولدانا الادى. سول ارقىلى قالانىڭ قاۋىپسىزدىگىن كۇشەيتۋگە مۇمكىندىك تۋادى. «زاڭ جانە ءتارتىپ» قاعيداتى ءىس جۇزىندە جۇمىس ىستەۋگە ءتيىس. استانا اكىمىنە وسى شارۋانى تەزدەتىپ اياقتاۋدى تاپسىرامىن. ەلىمىزدەگى باسقا قالالار دا وسىنداي پلاتفورمانى ەنگىزۋگە ءتيىس. بۇل جۇمىستى جاساندى ينتەللەكت جانە تسيفرلىق دامۋ مينيسترلىگى ۇيلەستىرۋى كەرەك»،-دەپ تولىقتىردى ول.
