قوعامدىق دەنساۋلىق ساقتاۋ ۇلتتىق ورتالىعىنىڭ باسقارما توراعاسى مانار سماعۇل قازاقستاننىڭ قاي وڭىرىندە قىزىلشا اۋرۋى جيىلەپ كەتكەنىن ايتتى، - دەپ حابارلايدى "ادىرنا" ءتىلشىسى.
ونىڭ ايتۋىنشا، ەلدەگى قىزىلشاعا قاتىستى قازىرگى ەپيدەميولوگيالىق جاعداي كۇردەلى كۇيىندە قالىپ وتىر.
"2023 جىلدىڭ باسىنان بەرى رەسپۋبليكادا قىزىلشامەن اۋىرۋ بويىنشا 20 188 جاعداي تىركەلدى. ونىڭ 81 پايىزى 14 جاسقا دەيىنگى بالالاردا، ياعني 16 351 جاعداي. جاسوسپىرىمدەر اراسىندا 706 جاعداي تىركەلدى، بۇل 3,4 پايىز، 15,4 پايىزدى ەرەسەك تۇرعىندار قۇرايدى، ياعني 18 جاستان اسقاندار اراسىندا تىركەلدى – 3131 جاعداي تىركەلدى. بارلىق وبلىستاردا قىزىلشا اۋرۋى تىركەلدى. اۋرۋدىڭ ەڭ جوعارى دەڭگەيى شىمكەنتتە – 3069 جاعداي، 100 مىڭ تۇرعىنعا شاققانداعى كورسەتكىش – 263,5, الماتىدا – 3010, الماتى وبلىسىندا – 1812 جاعداي، جامبىلدا – 2724, ماڭعىستاۋدا – 1701, اتىراۋدا – 1377, اقتوبەدە – 5,8 ادام. قىزىلوردا وبلىسىندا – 1182 جاعداي»، - دەدى سماعۇل.
ونىڭ ايتۋىنشا، ەلىمىزدە كۇن سايىن قىزىلشامەن اۋىراتىن 350-گە جۋىق جاعداي تىركەلۋدە جانە نەگىزگى اۋرۋ ەكپە الماعان ادامداردا كەزدەسەدى.
ۇيىمداسقان توپتاردا، ياعني ەلىمىزدەگى 643 مەكتەپتە قىزىلشامەن اۋىرعان 1466 جاعداي تىركەلدى. سماعۇل اتاپ وتكەندەي، بايلانىستا بولعاندار سانى 20 مىڭنان اسادى، ال العاشقى 72 ساعاتتا ەپيدەميولوگيالىق كورسەتكىشتەر بويىنشا 3898 ادام ەكپە الدى.
«سونىمەن قاتار، بايلانىستا بولعاندار اراسىندا ەكپەدەن باس تارتۋ فاكتىلەرى تىركەلۋدە – بۇگىنگى كۇنى بۇل 967 جاعداي، ال تاعى 724 بايلانىستا مەديتسينالىق جەڭىلدىكتەر بار. مەكتەپكە دەيىنگى مەكەمەلەردە بۇگىندە 827 مەكەمەدە 1662 جاعداي انىقتالدى. قازىرگى ۋاقىتتا بايلانىستا بولعاندار اراسىندا ەپيدەميولوگيالىق كورسەتكىش بويىنشا 1 442 ادام ەگىلدى، ەكپەدەن باس تارتۋ جاعدايلارى دا بار: 523 باس تارتۋ تىركەلدى، 371 بالا مەديتسينالىق جەڭىلدىككە يە بولدى»، - دەپ قوستى مانار سماعۇل.
