قازاقستاندىقتارعا بانگلادەش حالىق رەسپۋبليكاسىنا بارماۋعا كەڭەس بەرىلەدى، دەپ حابارلايدى “ادىرنا” ۇلتتىق پورتالى قر سىرتقى ىستەر مينيسترلىگىنىڭ ءباسپاسوز قىزمەتىنە سىلتەپ.
«بانگلادەش حالىق رەسپۋبليكاسىندا قالىپتاسقان جاعدايعا بايلانىستى قازاقستان رەسپۋبليكاسىنىڭ سىرتقى ىستەر مينيسترلىگى قازاقستان رەسپۋبليكاسىنىڭ ازاماتتارىنا جاعداي تۇراقتالعانعا دەيىن بۇل ەلگە بارۋدان ۋاقىتشا باس تارتۋدى ۇسىنادى»، - دەلىنگەن حابارلامادا.
ۇندىستانداعى قازاقستان ەلشىلىگى قازىرگى ۋاقىتتا بانگلادەشتە جۇرگەن قازاقستان ازاماتتارىن اسا قاجەت بولماسا تۇرعىلىقتى جەرىنەن شىقپاۋدى، كۇشەيتىلگەن قاۋىپسىزدىك شارالارىن ساقتاۋدى، قىراعىلىق پەن ساقتىق تانىتۋدى، جاڭالىقتاردى قاداعالاپ، بيلىكتىڭ ۇسىنىستارىن ورىنداۋدى، سونداي-اق مەملەكەتتىك ورگاندارمەن بايلانىستا بولۋدى سۇرايدى.
قوسىمشا جانە ۋاقتىلى اقپارات الۋ ءۇشىن بانگلادەشتە ورنالاسقان قازاقستان رەسپۋبليكاسىنىڭ ازاماتتارى مەن ولاردىڭ قازاقستانداعى تۋىستارى ءۇشىن شۇعىل بايلانىس جەلىلەرى اشىلعانى حابارلاندى.
ەسكە سالا كەتەيىك، بانگلادەشتە ستۋدەنتتەر نارازىلىعى كوتەرىلىسكە ۇلاسىپ، قازىرگى تاڭدا 135 ادام قازا تاپتى.
