الەۋمەتتىك جەلىلەردە قازاقستان ازاماتتىعىن اقشاعا ساتىپ العانىن مالىمدەگەن ەر ادامنىڭ بەينەجازباسى تاراعاننان كەيىن ىشكى ىستەر مينيسترلىگى قىلمىستىق ءىس قوزعادى. ۆەدومستۆو ونىڭ ايتقان مالىمەتتەرى شىندىققا سايكەس كەلمەيتىنىن حابارلادى، دەپ جازادى "ادىرنا".
بەينەجازبادا ەر ادامنان مەملەكەتتىك ءتىلدى بىلۋگە ارنالعان تەستتەن وتپەي ازاماتتىقتى قالاي العانى سۇرالادى. ول جاۋاپ رەتىندە "قازاقستاندا ءبارى ساتىپ الىنادى" دەپ، ەلدى جەمقور مەملەكەت دەپ سيپاتتايدى. الايدا كەيىن ول قازاقستاندىقتار تۋرالى جىلى پىكىر بىلدىرگەن.
ءىىم مالىمەتىنشە، جۇرگىزىلگەن تەكسەرۋ بارىسىندا ۆيدەوداعى ادامنىڭ جەكە باسى انىقتالعان. ول قازاقستان ازاماتى ەمەس، كورشىلەس ەلدىڭ ازاماتى بولىپ شىققان.
ۆەدومستۆونىڭ حابارلاۋىنشا، ونىڭ قازاقستان ازاماتتىعىن ساتىپ العانى تۋرالى ايتقانى راستالماعان.
وسى دەرەك بويىنشا قىلمىستىق ءىس قوزعالدى. قازىرگى ۋاقىتتا ءىىم شەتەلدىك ارىپتەستەرىمەن بىرلەسىپ قاجەتتى تەرگەۋ جانە تەكسەرۋ شارالارىن جۇرگىزىپ جاتىر.
ازىرگە قىلمىستىق ءىستىڭ ناقتى قاي باپ بويىنشا تىركەلگەنى جانە كۇدىكتىنىڭ قاي ەلدە جۇرگەنى جاريالانعان جوق.
ىشكى ىستەر مينيسترلىگى ازاماتتاردى تەكسەرىلمەگەن ءارى جالعان اقپاراتتى تاراتۋدان ساق بولۋعا شاقىردى.
