بۇگىن الماتى قالاسىندا حوستەلدە بولعان ورتتەن 13 ادام قازا تاپتى. قازا تاپقانداردىڭ توعىزى – قازاقستان ازاماتى بولسا، قالعانى شەتەلدىكتەر. اي امان، جۇرت تىنىشتا، 13 ادامنان ايرىلۋدىڭ سەبەبى نەدە بولۋى مۇمكىن؟ وسى جانە وزگە دە سۇراقتاردى الماتى قالاسىنان ماجىلىسكە سايلانعان دەپۋتات ەرمۇرات باپيگە قويدىق.
– ەندى بۇل، تۋراسىن ايتۋ كەرەك، قاستىق نەمەسە زۇلىمدىقتان تۋعان دۇنيە ەمەس. ومىردە نەشە ءتۇرلى وقىس جاعدايلار بولادى. بۇل ەندى وراشولاقتىق، كەمشىلىك بولار، وقىس وقيعانىڭ سالدارى دەپ قابىلداۋ كەرەك. زالالدان تۋعان دۇنيە ەمەس دەپ ويلايمىن. بىراق وسىنىڭ قورىتىندىسىن زەرتتەي، باقىلاي كەلە، قالالىق اكىمدىك پەن توتەنشە جاعدايلار تۋرالى ۆەدوموستۆالار ساباق الۋ كەرەك دەپ ويلايمىن.
– بىراق بۇل جەردە جەمقورلىق ماسەلەسى جوق پا؟
– ول جەكەمەنشىك قوناق ءۇي عوي. جەكەمەنشىك جەردە قانداي جەمقورلىق بولۋى مۇمكىن. بىلمەيمىن مەن دە.
– مىسالى حوستەلدىڭ بولمەلەرى جەرتولەدە بولماۋ كەرەك ەكەن. وعان رۇقسات بەرۋدىڭ ءوزى قانشالىقتى زاڭدى؟
– ەندى، ەندى ونداي جاعدايلاردىڭ بولۋى مۇمكىن. جەرتولەدە ادامدار تۇراتىن مۇمكىندىك جوق قوي. باقىلاۋشى ورگان مەن جەكەمەنشىك حوستەلدىڭ قوجايىنى ارقىلى تەرگەلىپ، زەرتتەلەدى دەپ ويلايمىن.
– اتالعان حوستەل ەكس-پرەزيدەنتتىڭ كۇيەۋ بالاسى تيمۋر قۇلىباەۆ باسقاراتىن حالىق بانكتىڭ مەنشىگىندە دەپ جاتىر. بۇل كەزدەيسوق جاعداي ما؟
– مەنىڭ ويىمشا، حوستەلدى الدەبىر كومپانيا حالىق بانكتەن نەسيە الىپ، قارىزىن قايتارماعان سوڭ بانكتىڭ مەنشىگىنە وتكەن بولۋ كەرەك. ايتپەسە مونستر بانككە حوستەل اشىپ، پايدا تابۋدىڭ اسا قاجەتى جوق. شاماسى كەپىلدىككە قويىلعان عيمارات حالىق بانككە وتكەن بولۋى كەرەك.
– ءۇندىستان پەن پاكىستان جانە قازاقستاننىڭ ازاماتتارى قازا تاپتى. ستۋدەنتتەردىڭ حوستەلدە جاتۋى نەنى بىلدىرەدى؟
– جالپى حوستەل دەگەن دۇنيە الەمدىك تانىم دەڭگەيىندە جامان ەمەس. ياعني، الەۋمەتتىك قوناق ءۇي بولىپ سانالادى. شەت ەلگە بارعاندا ءوزىم دە حوستەلدە جاتقان كەزىم بولعان. ونىڭ ەشقانداي دا ابەستىگى جوق. ونىڭ حوستەل دەگەن اتى سۇمىراي سەكىلدى بولىپ ەستىلەدى. تۇپتەپ كەلگەندە وعان قولى جەتكەن ادام بارىپ، قونادى.
– ۇكىمەت جاتاحانا ماسەلەسىن شەشسە، مۇنداي قايعىلى جاعداي بولماس پا ەدى؟
– ارينە، قازىر جاتاحانا ماسەلەسى كوتەرىلىپ جاتىر. جاتاحانا تۇرماق حالىقتىڭ باسپانا ماسەلەسى شەشىلمەي جاتقان كەزدە، مۇنى تىزەگە سالىپ، سۇراق قوياتىن ماسەلە ەمەس. ءبىزدىڭ ەلدە الەۋمەتتىك ماسەلە كوپ. ونىڭ ءبىرى – جاتاحانا ماسەلەسى. ستۋدەنتتەر كۇزدە وقۋعا كەلگەن ۋاقىتتا پاتەر تاپپاي، ۆوكزالعا قونىپ جۇرەتىنىن جاقسى بىلەمىز. ەلىمىزدەگى 100 مىڭ ستۋدەنتتى جاتاحانامەن قامتاماسىز ەتۋ – قازىرگى ەكونوميكالىق جاعدايدا مۇمكىن ەمەس.
– قازا تاپقان ازاماتتاردىڭ ىشىندە شەتەلدىك ازاماتتار بار ەكەن. بۇل ەلىمىزدىڭ يميدجىنە قالاي اسەر ەتەدى؟
– ءورت شىققان وقىس دۇنيەدەن ەلدىڭ ءيميدجى قۇلاپ كەتەدى دەپ ويلامايمىن. ونى مەملەكەتتىك ورگان نەمەسە مەملەكەتتىك قىزمەتكەر ورتەگەن جوق قوي. اياق استىنان بولعان دۇنيە. سوندىقتان مۇنداي جاعداي تۇرمىستا، ومىردە بولىپ تۇراتىن جاعداي. ارينە، مەملەكەتتىك بيلىك تاراپىنان كوڭىل ايتىپ، پاكىستان حالقىنا ءبىر جاۋابىن بەرۋ كەرەك. بىراق وسىعان بولا ءبىزدىڭ ەلدىڭ ءيميدجى ەتەككە ءتۇسىپ كەتەدى دەپ ويلامايمىن.
سەرىك جولداسباي
«ادىرنا» ۇلتتىق پورتالى
