بيىل كۇزدە كەزەكتەن تىس پرەزيدەنت سايلاۋىن وتكىزۋدى توقاەۆ 1 قىركۇيەكتەگى جولداۋىندا ۇسىندى، دەپ حابارلايدى «ادىرنا» ءتىلشىسى.
"قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى 2022 جىلدىڭ 20 قاراشاسىنا تاعايىندالسىن. قازاقستان رەسپۋبليكاسىنىڭ ورتالىق سايلاۋ كوميسسياسى كەزەكتەن تىس پرەزيدەنتتىك سايلاۋدى ۇيىمداستىرۋ مەن وتكىزۋدى قامتاماسىز ەتسىن" دەلىنگەن پرەزيدەنت جارلىعىندا.
سايلاۋعا نەبارى 9 كۇن قالدى. ساياسي ناۋقان الدىندا وڭىرلەردىڭ دايىندىعى قىزۋ. بۇل قاتاردا الماتى قالاسى دا بار.
ەستەرىڭزگە سالامىز، الماتىدا 4 قاراشادان بەرى 531 سايلاۋ ۋچاسكەسى اشىلعان. الماتىلىقتار سايلاۋ ۋچاسكەلەرىنە 2گيس جانە Yandex Maps كارتاسى قوسىمشالارىنىڭ كومەگىمەن بارا الادى.
داۋىس بەرۋ ورىندارى كارتادا بەلگىلەنەدى، بۇنى الماتى قالاسىنىڭ اۋماقتىق سايلاۋ كوميسسياسىندا ەسكەرگەن. اۋماقتىق سايلاۋ كوميسسياسىنىڭ ءتورايىمى جاننا اسانوۆا وكق بريفينگىندە كەزەكتەن تىس پرەزيدەنتتىك سايلاۋ الدىنداعى مەگاپوليستەگى اعىمداعى جاعداي تۋرالى ەگجەي-تەگجەيلى ايتىپ بەردى.
«سايلاۋ ۋچاسكەلەرىنىڭ مەكەن-جايلارى كورسەتىلگەن تولىق ءتىزىمى «ۆەچەرني الماتى» جانە «الماتى اقشامى» گازەتتەرىنىڭ باسپا نۇسقالارىندا، ولاردىڭ سايتتارىندا، سونداي-اق الماتى قالاسى اكىمدىگىنىڭ سايتىندا جاريالانعان»، - دەدى ج.اسانوۆا.
سونىمەن قاتار، الماتىدا ءوز سايلاۋ ۋچاسكەسىن تەكسەرۋ ءۇشىن «1315» بىرىڭعاي ءنومىر قۇرىلدى. بارلىق ۇيالى بايلانىس وپەراتورلارىنىڭ ابونەنتتەرى ءۇشىن قوڭىراۋ شالۋ تەگىن. Call-ورتالىقتىڭ جۇمىس ۋاقىتى – دەمالىس كۇندەرىن قوسقاندا كۇن سايىن 8.00-دەن 20.00-گە دەيىن.
الماتى قالاسى اكىمدىگىنىڭ «Open Almaty» قوعامدىق قابىلداۋ سايتىندا جانە ءبىلىم باسقارماسىنىڭ مەملەكەتتىك قىزمەتتەر پورتالىندا سايلاۋشىلار تىزىمدەرىنەن ءوزىڭىزدى تەكسەرۋگە مۇمكىندىك بەرەتىن سەرۆيس قولجەتىمدى.
«ءبىزدىڭ سايلاۋشىلار تىزىمدەرى تۇراقتى تىركەۋ قاعيداسى بويىنشا جاسالعان. اكىمدىكتەر سايلاۋشىلار ءتىزىمىن تاپسىرعان كەزدە ءبىزدىڭ الماتى قالاسىندا سايلاۋشىلار سانى 1 ميلليون 170 مىڭنان استى. سايلاۋ ۋچاسكەلەرىنە بارلىعى 11 مىڭنان استام ەسەپتەن شىعارۋ كۋالىكتەرى تاپسىرىلدى»، - دەدى الماتى قالالىق اۋماقتىق سايلاۋ كوميسسياسىنىڭ ءتورايىمى جاننا اسانوۆا.
ول ەسەپتەن شىعارۋ كۋالىگى نە ءۇشىن كەرەكتىگىن ءتۇسىندىردى.
«شارتتى تۇردە مەن الماتىدا تىركەلگەم، داۋىس بەرۋ كۇنى تارازدا بولۋدى جوسپارلاپ وتىرمىن. مۇنداي جاعدايدا مەن ءوز قۇقىعىمدى پايدالانۋ ءۇشىن ءوز ۋچاسكەمە بارىپ، داۋىس بەرۋ قۇقىعىن پايدالانۋ ءۇشىن ەسەپتەن شىعارۋ تالونىن الۋىم كەرەك»، - دەپ ءتۇسىندىردى ج.اسانوۆا.
بۇگىندە بارلىق سايلاۋ ۋچاسكەلەرى سايلاۋ جاشىكتەرىمەن، مەملەكەتتىك رامىزدەرمەن جابدىقتالعان. بارلىق ۋچاسكەلىك كوميسسيالار كانديداتتار تۋرالى اقپاراتتىق ماتەريالدارمەن، سونداي-اق سايلاۋشىلاردى قىزىقتىراتىن ادىستەمەلىك قۇرالدارمەن قامتاماسىز ەتىلگەن. بۇل رەتتە كانديداتتار تۋرالى اقپاراتتىق ماتەريالداردى ۇگىت ماتەريالدارىمەن شاتاستىرماۋ كەرەك. ويتكەنى ولار وزدەرى جاسايدى. بارلىق سايلاۋ ۋچاسكەلەرىندە بارلىق اقپارات بىرىڭعاي فورماتتا.
«قازىرگى تاڭدا سايلاۋ ۋچاسكەلەرىنىڭ مەكەنجايلارىن تانىمال 2GIS, Yandex Maps قوسىمشالارىنا ەنگىزۋ جۇمىستارى جۇرگىزىلۋدە. جۇمىس اياقتالۋعا جاقىن. سايلاۋ كۇنى جاقىنداعان كەزدە كەز كەلگەن سايلاۋشى ءوز سايلاۋ ۋچاسكەسىنىڭ گەولوكاتسياسىن تابا الادى»، - دەدى ج.اسانوۆا.
زاعيپ سايلاۋشىلار ءۇشىن ارنايى ترافارەتتەردىڭ دايىندالاتىنىن ايتتى. سونداي-اق ەرەكشە قاجەتتىلىكتەرى بار ادامدارعا ارنالعان بۇرىشتار جابدىقتالادى: بەينەروليكتەر، اقپاراتتىق ماتەريالدارى بار اۋديو روليكتەر جانە مۇگەدەكتەر ارباسىنا كىرۋگە ارنالعان كەڭەيتىلگەن ورىندار.
