Búgin Almaty qalasynda hostelde bolǵan órtten 13 adam qaza tapty. Qaza tapqandardyń toǵyzy – Qazaqstan azamaty bolsa, qalǵany sheteldikter. Aı aman, jurt tynyshta, 13 adamnan aırylýdyń sebebi nede bolýy múmkin? Osy jáne ózge de suraqtardy Almaty qalasynan Májiliske saılanǵan depýtat Ermurat Bapıge qoıdyq.
– Endi bul, týrasyn aıtý kerek, qastyq nemese zulymdyqtan týǵan dúnıe emes. Ómirde neshe túrli oqys jaǵdaılar bolady. Bul endi orasholaqtyq, kemshilik bolar, oqys oqıǵanyń saldary dep qabyldaý kerek. Zalaldan týǵan dúnıe emes dep oılaımyn. Biraq osynyń qorytyndysyn zertteı, baqylaı kele, qalalyq ákimdik pen tótenshe jaǵdaılar týraly vedomostvalar sabaq alý kerek dep oılaımyn.
– Biraq bul jerde jemqorlyq máselesi joq pa?
– Ol jekemenshik qonaq úı ǵoı. Jekemenshik jerde qandaı jemqorlyq bolýy múmkin. Bilmeımin men de.
– Mysaly hosteldiń bólmeleri jertólede bolmaý kerek eken. Oǵan ruqsat berýdiń ózi qanshalyqty zańdy?
– Endi, endi ondaı jaǵdaılardyń bolýy múmkin. Jertólede adamdar turatyn múmkindik joq qoı. Baqylaýshy organ men jekemenshik hosteldiń qojaıyny arqyly tergelip, zertteledi dep oılaımyn.
– Atalǵan hostel eks-prezıdenttiń kúıeý balasy Tımýr Qulybaev basqaratyn Halyq banktiń menshiginde dep jatyr. Bul kezdeısoq jaǵdaı ma?
– Meniń oıymsha, hosteldi áldebir kompanııa Halyq bankten nesıe alyp, qaryzyn qaıtarmaǵan soń banktiń menshigine ótken bolý kerek. Áıtpese monstr bankke hostel ashyp, paıda tabýdyń asa qajeti joq. Shamasy kepildikke qoıylǵan ǵımarat Halyq bankke ótken bolýy kerek.
– Úndistan pen Pákistan jáne Qazaqstannyń azamattary qaza tapty. Stýdentterdiń hostelde jatýy neni bildiredi?
– Jalpy hostel degen dúnıe álemdik tanym deńgeıinde jaman emes. Iaǵnı, áleýmettik qonaq úı bolyp sanalady. Shet elge barǵanda ózim de hostelde jatqan kezim bolǵan. Onyń eshqandaı da ábestigi joq. Onyń hostel degen aty sumyraı sekildi bolyp estiledi. Túptep kelgende oǵan qoly jetken adam baryp, qonady.
– Úkimet jatahana máselesin sheshse, mundaı qaıǵyly jaǵdaı bolmas pa edi?
– Árıne, qazir jatahana máselesi kóterilip jatyr. Jatahana turmaq halyqtyń baspana máselesi sheshilmeı jatqan kezde, muny tizege salyp, suraq qoıatyn másele emes. Bizdiń elde áleýmettik másele kóp. Onyń biri – jatahana máselesi. Stýdentter kúzde oqýǵa kelgen ýaqytta páter tappaı, vokzalǵa qonyp júretinin jaqsy bilemiz. Elimizdegi 100 myń stýdentti jatahanamen qamtamasyz etý – qazirgi ekonomıkalyq jaǵdaıda múmkin emes.
– Qaza tapqan azamattardyń ishinde sheteldik azamattar bar eken. Bul elimizdiń ımıdjine qalaı áser etedi?
– Órt shyqqan oqys dúnıeden eldiń ımıdji qulap ketedi dep oılamaımyn. Ony memlekettik organ nemese memlekettik qyzmetker órtegen joq qoı. Aıaq astynan bolǵan dúnıe. Sondyqtan mundaı jaǵdaı turmysta, ómirde bolyp turatyn jaǵdaı. Árıne, memlekettik bılik tarapynan kóńil aıtyp, Pákistan halqyna bir jaýabyn berý kerek. Biraq osyǵan bola bizdiń eldiń ımıdji etekke túsip ketedi dep oılamaımyn.
Serik Joldasbaı
«Adyrna» ulttyq portaly
