بۇگىن، 28 قاراشادا قر ۇلتتىق كىتاپحاناسىندا «اباي» باسپاسىنان جارىق كورگەن 35 كىتاپتىڭ تۇساۋكەسەرى ءوتتى، دەپ حابارلايدى «ادىرنا» ۇلتتىق پورتالى.
باسپا قازاق ادەبيەتىنىڭ كلاسسيك اقىن-جازۋشىلارىنىڭ شىعارمالارىنان بىرەگەي سەريا جاساقتاعان. بۇل سەريا قازاقتىڭ باس اقىنى، حاكىم ابايدان باستالىپ، دۋلات باباتايۇلى، شاكارىم، ءماشھۇر ءجۇسىپ كوپەيۇلى، مۇحتار اۋەزوۆ، الاشوردا قايراتكەرلەرى، كەڭەس وداعى زامانىنىڭ ايگىلى قالامگەرلەرى، تاۋەلسىز قازاقستاننىڭ كورنەكتى جازۋشىلارى مەن بەلگىلى جاس اۆتورلاردىڭ شىعارمالارىن قامتيدى.
تۇساۋكەسەرگە مادەنيەت جانە اقپارات ءمينيسترى ايدا بالاەۆا ءوز قۇتتىقتاۋىن جولداپ، ىزگى نيەتىن ءبىلدىردى.
سونداي-اق شاراعا زيالى قاۋىم وكىلدەرى، بەلگىلى اقىن-جازۋشىلار قاتىستى. اتاپ ايتساق، تەمىرحان مەدەتبەك، سماعۇل ەلۋباي، ۇلىقبەك ەسداۋلەت، گ.سالىقباي، ب.بەدەلحان، ج.سارسەك جانە م.ماقاتاەۆتىڭ، سىرباي ماۋلەنوۆتىڭ، ج.ءابدىراشوۆتىڭ، ت. مولداعاليەۆتىڭ، ت.دوسىموۆتىڭ ۇرپاقتارى، بەلگىلى اقىن ەرلان ءجۇنىس قوناق بولدى.
جوبا اياسىندا قازاقتىڭ باس اقىنى، اعارتۋشى، قازاق جازبا ادەبيەتىنىڭ، قازاق ادەبي ءتىلىنىڭ نەگىزىن قالاۋشى، فيلوسوف، كومپوزيتور، اۋدارماشى، ساياسي قايراتكەر، رەفورماتور اباي قۇنانبايۇلىنىڭ ارتىندا قالعان رۋحاني مۇراسى «جۇرەكتىڭ كوزى اشىلسا...»، قازاقتىڭ ايگىلى اۋليەسى، اقىن، اعارتۋشى، فيلوسوف ءماشھۇر ءجۇسىپ كوپەيۇلىنىڭ ادەبي مۇراسى «حال-احۋال»، ۇلى اقىن شاكارىم قۇدايبەردىۇلىنىڭ ەڭبەكتەرى «ناسيحات»، ءسوز زەرگەرى دۋلات باباتايۇلىنىڭ شىعارمالارى «ساندىقتاس» دەگەن اتاۋمەن وقىرمانعا ۇسىنىلماق.
بۇدان بولەك، قازاقتىڭ اسا كورنەكتى اقىنى، قازاق پوەزياسىنا وزگەشە لەپ اكەلگەن جاراسقان ءابدىراش، تەمىرحان مەدەتبەك، تىنىشتىقبەك ابدىكاكىمۇلى، سۆەتقالي نۇرجان، تابىلدى دوسىموۆ تۋىندىلارى دا وسى جيناقتاردىڭ سالماعىن ارتتىرىپ تۇر. اتالمىش كىتاپتار تىزبەگى قر مەملەكەتتىك سىيلىعىنىڭ يەگەرى ولجاس سۇلەيمەنوۆ، مۇحتار شاحانوۆ باستاعان بۋىن يسرايل ساپارباي، نەسىپبەك ايتۇلى، كۇلاش احمەتوۆا، سابىر اداي، گۇلنار سالىقباي، قالقامان سارين، تاناگوز تولقىنقىزى، ەرلان ءجۇنىس ەسىمدى قالامگەرلەردىڭ تۋىندىلارىمەن جالعاسا بەرەدى. سولاردىڭ ىشىندە بۇگىنگى كۇننىڭ بەتسەللەرىنە اينالعان ۇلاربەك نۇرعالىمۇلىنىڭ «داياعاشى» كىتابى مەن اقبەرەن ەلگەزەكتىڭ «بولماعان بالالىق شاق» تۋىندىسى مۇلدە بولەك ديزايندا، جاڭاشا فورماتتا وقىرمانعا ۇسىنىلماق.
«ادىرنا» ۇلتتىق پورتالى
