Búgin, 28 qarashada QR Ulttyq kitaphanasynda «Abaı» baspasynan jaryq kórgen 35 kitaptyń tusaýkeseri ótti, dep habarlaıdy «Adyrna» ulttyq portaly.
Baspa qazaq ádebıetiniń klassık aqyn-jazýshylarynyń shyǵarmalarynan biregeı serııa jasaqtaǵan. Bul serııa qazaqtyń bas aqyny, hákim Abaıdan bastalyp, Dýlat Babataıuly, Shákárim, Máshhúr Júsip Kópeıuly, Muhtar Áýezov, Alashorda qaıratkerleri, Keńes Odaǵy zamanynyń áıgili qalamgerleri, táýelsiz Qazaqstannyń kórnekti jazýshylary men belgili jas avtorlardyń shyǵarmalaryn qamtıdy.
Tusaýkeserge Mádenıet jáne aqparat mınıstri Aıda Balaeva óz quttyqtaýyn joldap, izgi nıetin bildirdi.
Sondaı-aq sharaǵa zııaly qaýym ókilderi, belgili aqyn-jazýshylar qatysty. Atap aıtsaq, Temirhan Medetbek, Smaǵul Elýbaı, Ulyqbek Esdáýlet, G.Salyqbaı, B.Bedelhan, J.Sársek jáne M.Maqataevtyń, Syrbaı Máýlenovtyń, J.Ábdirashovtyń, T. Moldaǵalıevtyń, T.Dosymovtyń urpaqtary, belgili aqyn Erlan Júnis qonaq boldy.
Joba aıasynda qazaqtyń bas aqyny, aǵartýshy, qazaq jazba ádebıetiniń, qazaq ádebı tiliniń negizin qalaýshy, fılosof, kompozıtor, aýdarmashy, saıası qaıratker, reformator Abaı Qunanbaıulynyń artynda qalǵan rýhanı murasy «Júrektiń kózi ashylsa...», qazaqtyń áıgili áýlıesi, aqyn, aǵartýshy, fılosof Máshhúr Júsip Kópeıulynyń ádebı murasy «Hal-ahýal», uly aqyn Shákárim Qudaıberdiulynyń eńbekteri «Nasıhat», sóz zergeri Dýlat Babataıulynyń shyǵarmalary «Sandyqtas» degen ataýmen oqyrmanǵa usynylmaq.
Budan bólek, qazaqtyń asa kórnekti aqyny, qazaq poezııasyna ózgeshe lep ákelgen Jarasqan Ábdirash, Temirhan Medetbek, Tynyshtyqbek Ábdikákimuly, Svetqalı Nurjan, Tabyldy Dosymov týyndylary da osy jınaqtardyń salmaǵyn arttyryp tur. Atalmysh kitaptar tizbegi QR Memlekettik syılyǵynyń ıegeri Oljas Súleımenov, Muhtar Shahanov bastaǵan býyn Israıl Saparbaı, Nesipbek Aıtuly, Kúlásh Ahmetova, Sabyr Adaı, Gúlnar Salyqbaı, Qalqaman Sarın, Tanagóz Tolqynqyzy, Erlan Júnis esimdi qalamgerlerdiń týyndylarymen jalǵasa beredi. Solardyń ishinde búgingi kúnniń betsellerine aınalǵan Ularbek Nurǵalymulynyń «Daıaǵashy» kitaby men Aqberen Elgezektiń «Bolmaǵan balalyq shaq» týyndysy múlde bólek dızaında, jańasha formatta oqyrmanǵa usynylmaq.
«Adyrna» ulttyq portaly
