5 اقپاندا بەلگىلى ءانشى ديماش قۇدايبەرگەننىڭ «Voice Beyond Horizon» حالىقارالىق مۋزىكالىق رەاليتي-شوۋى الەمدىك ەفيرگە شىعادى. بۇل تۋرالى Dimashnews جازدى، دەپ حابارلايدى «ادىرنا» ءتىلشىسى.
باعدارلاما قىتايدىڭ Hunan TV تەلەارناسى مەن Mango TV پلاتفورماسىندا, سونداي-اق Qazaqstan تەلەارناسىنان كورسەتىلەدى.
Hunan Broadcasting System مەدياحولدينگىمەن سەرىكتەستىكتە جۇزەگە اسىرىلعان «Voice Beyond Horizon» شوۋى — قازاقستان مەن قىتاي اراسىنداعى شىعارماشىلىق ىنتىماقتاستىقتىڭ جاڭا بەلەسى. اتالعان جوبا اياسىندا التى مەملەكەتتەن كەلگەن ونەرپازدار ءبىر شىعارماشىلىق كەڭىستىككە توعىسادى.
سەربيا، يتاليا، مالايزيا، قىرعىزستان، قىتاي جانە قازاقستان ەلدەرىنەن قاتىسقان ۇزدىك ۆوكاليستەر وزدەرىنىڭ مۋزىكالىق قابىلەتتەرىن كورسەتىپ قانا قويماي، كورەرمەندەردى ەلىمىزدىڭ ەڭ كورىكتى وڭىرلەرىمەن تانىستىراتىن رۋحاني جولباسشى ءرولىن دە اتقارادى.
22 كۇنگە سوزىلعان ءتۇسىرىلىم بارىسىندا حالىقارالىق شىعارماشىلىق توپ مىڭداعان شاقىرىم جول ءجۇرىپ، تۇركىستان، اقمولا، ماڭعىستاۋ، الماتى وبلىستارىندا، سونداي-اق الماتى مەن استانا قالالارىنداعى تۇسىرىلىمدەر ارقىلى الەمدىك اۋديتورياعا قازاقستاننىڭ تابيعي جانە مادەني كەلبەتىن تانىتاتىن تاماشا ساياحات دايىنداپ قويعان.
