سىبايلاس جەمقورلىققا قارسى قىزمەت QazaqGaz كومپانياسىنداعى ۇستالعاندار تۋرالى اقپاراتقا جاۋاپ بەردى، - دەپ حابارلايدى "ادىرنا" ءتىلشىسى.
سىبايلاس جەمقورلىققا قارسى قىزمەتتىڭ رەسمي وكىلى استانادا وتكەن بريفينگ بارىسىندا «QazaqGaz» اق قىزمەتكەرلەرى مەن باسشىلىعىنىڭ ۇستالعانى تۋرالى الەۋمەتتىك جەلىلەردە پايدا بولعان اقپاراتقا تۇسىنىكتەمە بەردى.
«وسىعان بايلانىستى، ۆەدومستۆولىق باعىنىستاعى ۇيىمدار قىزمەتكەرلەرىنىڭ وكىلەتتىگىن اسىرا پايدالانۋى مۇمكىن دەگەن فاكت بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتقانىن حابارلايمىز. وبەكتيۆتىلىكتى قامتاماسىز ەتۋ جانە قىلمىستىق ارەكەتتىڭ ءمان-جايىن جان-جاقتى زەردەلەۋ ماقساتىندا جەدەل-ىزدەستىرۋ شارالارى جۇرگىزىلدى. قازىرگى ۋاقىتتا بۇل ءىس بويىنشا ەشكىم قاماۋعا الىنعان جوق. ەشكىمگە ايىپ تاعىلعان جوق. تەرگەۋ مۇددەسىنە ساي باسقا دا مالىمەتتەر جاريالاۋعا جاتپايدى»، - دەدى «انتيكور» رەسمي وكىلى ارمان تىلەۋكەنوۆ.
بۇعان دەيىن باق 21 قاراشادا QazaqGaz جۇيەسىندەگى توپ-مەنەدجەرلەردى ءتىنتۋ جانە ۇستاۋ شارالارى بولعانىن حابارلاعان بولاتىن. ورتالىق اپپارات باسشىسى مەن ەنشىلەس كومپانيا «قازترانسگاز ونىمدەرى» جشس باسشىسى ءمان-جاي انىقتالعانشا قاماۋعا الىندى دەلىنگەن بولاتىن.
