سىبايلاس جەمقورلىققا قارسى ءىس-قيمىل اگەنتتىگى قايتارىلعان اكتيۆتەر ەسەبىنەن قانداي عيماراتتار سالىنعانىن ايتتى، دەپ حابارلايدى «ادىرنا» ءتىلشىسى.
رەسمي دەرەكتەرگە سۇيەنسەك، 2022 جىلدان باستاپ قازىرگى ۋاقىتقا دەيىن سىبايلاس جەمقورلىققا قارسى قىزمەت مەملەكەتكە جالپى سوماسى 1,15 ترلن تەڭگەدەن استام كولەمدە مۇلىك اكتيۆتەرى مەن قارجىنى قايتارۋدى قامتاماسىز ەتكەن.
قايتارىلعان اكتيۆتەر قاتارىنا بيزنەس-ورتالىقتار، اكىمشىلىك عيماراتتار، ساۋدا ورىندارى، تۇرعىن ۇيلەر، پاتەرلەر، قۇرىلىسى تولىق اياقتالماعان نىساندار، جەر ۋچاسكەلەرى، ليۋكس ساناتىنداعى اۆتوكولىكتەر جانە قارجىلىق قاراجاتتار كىرەدى.
انتيكوردىڭ مالىمەتىنشە، الماتى قالاسىندا «Maisat» بيزنەس-ورتالىعى «گەوگرافيا جانە سۋ قاۋىپسىزدىگى ينستيتۋتى» اق مەنشىگىنە بەرىلگەن;
قۇنى 7,9 ملرد تەڭگەدەن اساتىن «KaisarTower» بيزنەس-ورتالىعى قازاق ۇلتتىق قىزدار پەداگوگيكالىق ۋنيۆەرسيتەتىنىڭ يەلىگىنە تاپسىرىلعان;
قۇنى 800 ملن تەڭگەدەن اساتىن اكىمشىلىك عيمارات ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ بالانسىنا بەرىلگەن;
استانادا قۇنى 5 ملرد تەڭگەدەن اساتىن 3 جەكە ءۇي استانا قالاسى اكىمدىگىنىڭ مۇگەدەكتىگى بار بالالارعا ارنالعان «پسيحولوگيالىق-پەداگوگيكالىق تۇزەتۋ كابينەتى» كمم-گە بەرىلگەن.
"سونىمەن قاتار ءبىلىم ينفراقۇرىلىمىن قولداۋ قورىنىڭ جۇمىسى باقىلاۋدا تۇر، ونىڭ ارنايى شوتىنا 153,3 ملرد تەڭگە (نەمەسە 329 ملن دوللار) اۋدارىلعان. قوردىڭ قاراجاتى ەسەبىنەن بارلىعى 100 مىڭ وقۋشى ورىندىق 89 مەكتەپتىڭ قۇرىلىسى قارجىلاندىرىلعان. ونىڭ ىشىندە 61 مەكتەپ پايدالانۋعا بەرىلگەن، ال 2025 جىلى تاعى 28 جاڭا مەكتەپ سالىنۋ كوزدەلگەن", - دەلىنگەن حابارلامادا.
