شىمكەنتتىك جۋرناليست مارينا نيزوۆكينا پرەزيدەنت قاسىم-جومارت توقاەۆقا پوليتسيانىڭ قىسىمى تۋرالى مالىمدەمە جاساپ، ءوزىن قاۋىپسىز سەزىنبەيتىنىن ايتتى، دەپ حابارلايدى «ادىرنا» ءتىلشىسى.
«مەن بەلسەندى ازاماتتىق ۇستانىمى بار ءجۋرناليسپىن، جول قاۋىپسىزدىگى مەن شىمكەنتتەگى كەپتەلىس تۋرالى، جۇرگىزۋشىلەردىڭ دە، پوليتسيا قىزمەتكەرلەرىنىڭ دە قۇقىق بۇزۋشىلىقتارى تۋرالى كوپ جازامىن. سوڭعى كەزدەرى جۋرناليست رەتىندە ءوزىمدى قاۋىپسىز سەزىنبەي ءجۇرمىن. ءبىز، قالا تۇرعىندارى، شىمكەنت جولدارىندا كوپتەگەن رەتسىزدىكتى، بالالار ولىمىنە اكەلەتىن جول-كولىك وقيعاسىن ءجيى بايقايمىز. بۇل تۋرالى ءۇنسىز قالۋعا بولمايدى. بىراق قۋدالاۋدىڭ قۇربانى بولماس ءۇشىن جان-جاعىمىزعا قاراپ، ساقتىقپەن جازۋعا ءماجبۇرمىز»،—دەدى ول.
باق وكىلى قازان ايىنىڭ ورتاسىندا پاترۋلدىك پوليتسيا پولكى باسشىلىعىنىڭ شىمكەنت قالالىق ىشكى ىستەر باسقارماسىنا قارسى شاعىمدارى بويىنشا سوت پروتسەستەرىنە قاتىسقان.
«ءىس تۋرالى قورىتىندى ماتەريال جازعىم كەلدى، بىراق سول ۋاقىتتا شىمكەنت قىىب باستىعىنىڭ ءبىرىنشى ورىنباسارى ەرماحان ءابدرامانوۆتىڭ اتىنان دەپارتامەنت باسشىلىعىنىڭ قورقىنىشتى قىسىمىنا ۇشىرادىم. ول پوليتسياعا ارىز جازىپ، مەنى جالا جاپتى دەپ ايىپتادى. ماعان قاتىستى اكىمشىلىك حاتتاما جاسالىپ، ول ماعان وتە كەش جەتكىزىلدى. سوتقا دەيىنگى بارلىق ءىس وتە تەز جۇرگىزىلدى. كوپتەگەن پروتسەدۋرالىق زاڭ بۇزۋشىلىقتار بولدى»،—دەدى
مارينا نيزوۆكينا .
جۋرناليست سوتتىڭ حاتتامانى زاڭسىز دەپ تانىعانىن اتاپ ءوتتى.
«مەنىڭ جازبالارىمنان ەشقانداي جالا تابىلمادى. بىراق، سوعان قاراماستان،ءوزىمدى قاۋىپسىز سەزىنبەيمىن. وتباسىمنىڭ قاۋىپسىزدىگى ءۇشىن دە قورقامىن. نەلىكتەن ۋچاسكەلىك پوليتسيا قىزمەتكەرى كامەلەتكە تولماعان بالامنىڭ قۇجاتتارىن مەنەن تالاپ ەتۋى كەرەك؟ ەندى مەنىڭ قىزمەتىم دە قانداي دا ءبىر قىسىم مەن قاۋىپكە ۇشىرايدى دەپ ويلايمىن. جۇمىستان كەش قايتۋعا، كولىكتى ايداۋعا قورقامىن. قۇرمەتتى پرەزيدەنت، شىمكەنت پوليتسەيلەرىنىڭ قالا تۇرعىندارىنا قارسى ارەكەت ەتپەۋىنە، كەرىسىنشە، بارلىعىمىز بىرلەسە وتىرىپ، قالامىزدىڭ قاۋىپسىز بولۋىنا ىقپال ەتۋىڭىزدى سۇرايمىن»،—دەپ تولىقتىردى ول.
