مەملەكەت باسشىسى قاسىم-جومارت توقاەۆتى بىرقاتار ەلدەردىڭ پرەزيدەنتتەرى مەرەيتويىمەن قۇتتىقتادى، دەپ جازادى "ادىرنا" ءتىلشىسى.
تەلەفون ارقىلى قاسىم-جومارت توقاەۆتى 70 جاسقا تولعان تۋعان كۇنىمەن رەسەي پرەزيدەنتى ۆلاديمير پۋتين، وزبەكستان پرەزيدەنتى شاۆكات ميرزيەەۆ، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، ءازىربايجان پرەزيدەنتى يلحام اليەۆ، بەلارۋس پرەزيدەنتى الەكساندر لۋكاشەنكو جانە بىرىككەن اراب امىرلىكتەرىنىڭ پرەزيدەنتى شەيح مۇحاممەد بەن زايد ءال ناحايان قۇتتىقتادى.
مەملەكەت باسشىلارى قاسىم-جومارت توقاەۆتى تۋعان كۇنىمەن قۇتتىقتاپ، وعان قازاقستان حالقىنىڭ يگىلىگى جولىنداعى جاۋاپتى مەملەكەتتىك قىزمەتىندە ودان ءارى تابىس تىلەدى.
سونىمەن قاتار، توقاەۆتىڭ اتىنا شەت مەملەكەتتەر مەن ۇكىمەت باسشىلارىنان، پارلامەنت سپيكەرلەرىنەن، حالىقارالىق ۇيىمدار باسشىلارىنان، ديپلوماتيالىق ميسسيالار مەن ىسكەر توپتاردان جەدەلحاتتار كەلىپ ءتۇستى.
قۇتتىقتاۋ جەدەلحاتىن قحر توراعاسى سي تسزينپين، تۇركيا پرەزيدەنتى رەجەپ تايىپ ەردوعان، قىرعىزستان پرەزيدەنتى سادىر جاپاروۆ، تۇركىمەنستان پرەزيدەنتى سەردار بەردىمۇحامەدوۆ، ارمەنيا پرەمەر-ءمينيسترى نيكول پاشينيان، يتاليا پرەزيدەنتى سەردجيو ماتتارەللا، سەربيا پرەزيدەنتى الەكساندر ۆۋچيچ، ۆەنگريا پرەزيدەنتى كاتالين نوۆاك جانە ۆەنگريا پرەمەر-ءمينيسترى ۆيكتور وربان جولدادى. بولگاريا پرەزيدەنتى رۋمەن رادەۆ، البانيا پرەزيدەنتى بايرام بەگاي، سينگاپۋر پرەزيدەنتى حاليما ياكوب، شىۇ باس حاتشىسى چجان مين، تمد باس حاتشىسى سەرگەي لەبەدەۆ جانە ت.ب. پرەزيدەنتىمىزدىڭ تۋعان كۇنىن ەلەۋسىز قالدىرمادى.
قاسىم-جومارت توقاەۆتىڭ مەرەيتويىمەن قۇتتىقتاعاندار قاتارىندا قازاقستاندىقتار، قازاقستاننىڭ كورنەكتى ساياسي جانە قوعام قايراتكەرلەرى، عىلىمي جانە شىعارماشىلىق زيالى قاۋىم وكىلدەرى جانە باسقا دا كوپتەگەن جەدەلحاتتار دا بار.
بۇعان دەيىن توقاەۆ ءوزىنىڭ 70 جىلدىق مەرەيتويىن ءپرينتسيپتى تۇردە اتاپ ءوتۋدى جوسپارلاماعانىن مەملەكەت باسشىسىنىڭ ءباسپاسوز حاتشىسى رۋسلان جەلدىباي حابارلاعان بولاتىن.
ال بۇگىن ول ءوزىنىڭ تۋعان كۇنىندە قىتايعا ساپارعا اتتاندى. كورشى ەل توقاەۆتى سالتاناتتى تۇردە قارسى الدى.
توقاەۆ قحر توراعاسى سي تسزينپينمەن كەلىسسوزدەر جۇرگىزىپ، ستراتەگيالىق سەرىكتەستىكتى ودان ءارى نىعايتۋ، ساۋدا-ەكونوميكالىق، ينۆەستيتسيالىق، كولىك-لوگيستيكا جانە ەنەرگەتيكا سالالارىنداعى ىنتىماقتاستىقتى كەڭەيتۋ، سونداي-اق مادەني-گۋمانيتارلىق بايلانىستاردى تەرەڭدەتۋ ماسەلەلەرىن تالقىلايدى دەپ جوسپارلانۋدا.
18 مامىردا مەملەكەت باسشىسى قىتايدىڭ ءىرى كومپانيالارىنىڭ باسشىلارىمەن كەزدەسىپ، مەملەكەتتىك ساپارلار باعدارلاماسى اياسىندا بىرقاتار ءىس-شارالار وتكىزەدى، سونداي-اق قۇرعاق پورتتا قازاقستاندىق لوگيستيكالىق ورتالىق قۇرىلىسىنىڭ ىسكە قوسىلۋ سالتاناتىنا قاتىسادى.
19 مامىردا مەملەكەت باسشىسى ورتالىق ازيا-قىتاي سامميتىنە قاتىسادى. سونداي-اق سيان قالاسىنداعى ەلىمىزدىڭ باس كونسۋلدىعىنىڭ سالتاناتتى اشىلۋىنا قاتىسۋ جوسپارلانۋدا.
"ادىرنا" ۇلتتىق پورتالى
