قازاقستان پرەزيدەنتى قاسىم-جومارت توقاەۆ ۆاشينگتوندا وتكەن بەيبىتشىلىك كەڭەسىنىڭ يناۋگۋراتسيالىق وتىرىسىندا ءسوز سويلەدى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى "ادىرنا".
سامميتكە قاتىسۋشىلاردى قۇتتىقتاعان مەملەكەت باسشىسى اقش پرەزيدەنتى دونالد ترامپقا وسى تاريحي ءىس-شارانى ۇيىمداستىرعانى ءۇشىن العىس ءبىلدىردى.
ء«بىزدىڭ دونالد ترامپ اتىنداعى بەيبىتشىلىك ينستيتۋتىندا ءوتىپ جاتقان كەزدەسۋىمىز شەشۋشى ءارى پراگماتيكالىق ارەكەتتەر ايقىنداۋشى مانگە يە كەزەڭدە ۇيىمداستىرىلىپ وتىر. نەگىزىنەن، ءسوز شەكسىز كونفەرەنتسيالار مەن يگى نيەتتەرگە عانا نەگىزدەلگەن قارارلار ارقىلى ەمەس، ناقتى ءارى ماقساتتى شارالار ارقىلى بەرىك بەيبىتشىلىك ورناتۋ تۋرالى بولىپ وتىر. قۇرمەتتى پرەزيدەنت مىرزا، جاھاندىق بەيبىتشىلىك پەن تۇراقتىلىقتى ىلگەرىلەتۋ جولىنداعى ايقىن كوزقاراسىڭىز بەن كورەگەن ۇستانىمىڭىز ەلىمدى بەيبىتشىلىك كەڭەسىنە قوسىلۋعا جىگەرلەندىردى»، – دەدى ول.
قاسىم-جومارت توقاەۆتىڭ ايتۋىنشا، بەيبىتشىلىك كەڭەسى جاڭا گەوساياسي احۋالعا ساي كەلىپ، قولدانىستاعى كوپجاقتى كۇش-جىگەردى نىعايتادى.
«الەم مۇنداي باستامالاردى ءالى كورگەن جوق. شىن مانىندە، بۇل – بۇرىن-سوڭدى بولماعان قادام. سەبەبى “جاسامپازدىق ارقىلى بەيبىتشىلىك” اتتى يننوۆاتسيالىق تۇجىرىمداما نەمەسە جوبا ورتاق كۇش-جىگەرىمىزدىڭ ارقاسىندا شىندىققا اينالۋى ابدەن مۇمكىن. سوندىقتان، قۇرمەتتى پرەزيدەنت مىرزا، بەرىك بەيبىتشىلىك ناقتى ءىس-قيمىلدارعا نەگىزدەلۋى ءتيىس دەگەن ۇستانىمىڭىزدى تولىق قولدايمىن»، – دەدى مەملەكەت باسشىسى.
ەسكە سالا كەتەيىك، قازاقستان پرەزيدەنتى 19 اقپاندا ۆاشينگتونعا باردى. ساپار اياسىندا ول شەتەلدىك مەملەكەتتەر باسشىلارىمەن جانە اقش-تىڭ رەسمي تۇلعالارىمەن بىرقاتار كەزدەسۋلەر وتكىزەدى.
بيىل 22 قاڭتاردا قاسىم-جومارت توقاەۆ داۆوستا بەيبىتشىلىك كەڭەسىنىڭ جارعىسىنا قول قويۋ راسىمىنە قاتىستى. بۇل كەڭەس دونالد ترامپتىڭ باستاماسىمەن قۇرىلعان.
بۇعان دەيىن توقاەۆ دونالد ترامپتان گازا بويىنشا قۇرىلاتىن بەيبىتشىلىك كەڭەسىنىڭ قۇرامىنا كىرۋگە رەسمي شاقىرتۋ العان العاشقى كوشباسشىلاردىڭ ءبىرى بولعانى حابارلانعان. سونداي-اق قازاقستانعا قۇرىلتايشى مەملەكەتتەردىڭ ءبىرى بولۋ ۇسىنىلعان.
ۆاشينگتوننىڭ جوسپارىنا سايكەس، بەيبىتشىلىك كەڭەسى گازاداعى بەيبىت دامۋعا قاتىستى مىندەتتەمەلەردىڭ ورىندالۋىن ستراتەگيالىق قاداعالاۋ، حالىقارالىق رەسۋرستاردى جۇمىلدىرۋ جانە باقىلاۋ جۇمىستارىمەن اينالىسادى.
قۇرىلتايشى اتقارۋشى كەڭەسكە (founding executive board) ديپلوماتيا، دەۆەلوپمەنت، ينفراقۇرىلىم جانە ەكونوميكالىق ستراتەگيا سالاسىندا تاجىريبەسى بار جەتى جەتەكشى كىرەدى. ءاربىر مۇشە گازانى تۇراقتاندىرۋ ءۇشىن اسا ماڭىزدى جەكە باعىتقا جاۋاپ بەرەدى.
سونىمەن قاتار گازا اتقارۋشى كەڭەسى (Gaza executive board) قۇرىلىپ، سەكتوردىڭ جاڭا ۇكىمەتىنىڭ قىزمەتىن باقىلاماق. بۇل كەڭەسكە 11 ادام ەنەدى، ونىڭ ىشىندە قۇرىلتايشى اتقارۋشى كەڭەستىڭ ءتورت مۇشەسى بار.
