توقاەۆ سىبايلاس جەمقورلىققا قارسى قىزمەتتىڭ جاڭا باسشىسىنا بىرقاتار تاپسىرمالار بەردى

3275
Adyrna.kz Telegram

قاسىم-جومارت توقاەۆ سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى مارات احمەتجانوۆتى قابىلدادى، دەپ حابارلايدى "ادىرنا" ۇلتتىق پورتالى.

اقوردانىڭ حابارلاۋىنشا، توقاەۆقا 16 ساۋىردە وتكەن سىبايلاس جەمقورلىققا قارسى ءىس-قيمىل جونىندەگى كەڭەستە بەرىلگەن تاپسىرمالاردى ورىنداۋ بارىسى تۋرالى حابارلاندى. مارات احمەتجانوۆ اگەنتتىكتىڭ قىلمىستىق پروتسەستىڭ ءۇش دەڭگەيلى مودەلىنە تولىققاندى كوشۋگە دايىندىعى تۋرالى ايتتى.

پرەزيدەنت سىبايلاس جەمقورلىققا قارسى كۇرەس ادىستەرىن جاڭارتۋ، جۇمىس بارىسىندا جىبەرىلگەن قاتەلىكتەر مەن قاساقانا جاسالعان قىلمىستاردى اجىراتۋ، سونداي-اق قىلمىسكەردى قىلمىس قۇرامى تۇگەل بولعان جاعدايدا عانا جاۋاپقا تارتۋ قاجەت دەپ اتاپ ءوتتى.

سونىمەن قاتار، كاسىپكەرلەردىڭ قۇقىقتارىن قورعاۋ، كاسىپكەرلىك قىزمەتكە زاڭسىز ارالاسىپ، كولەڭكەلى ساۋدانى قولداۋشى مەملەكەتتىك قىزمەتشىلەردىڭ جاۋاپكەرشىلىگىن قاتاڭ قاراستىرۋ بويىنشا مىندەتتەر قويىلدى.

مەملەكەت باسشىسى اگەنتتىككە سىبايلاس جەمقورلىققا قارسى ءىس-قيمىلدىڭ الدىڭعى قاتارلى تاجىريبەسىن زەردەلەۋ جانە مەملەكەتتىك ورگانداردىڭ قىزمەتىن ءتيىستى ۇيلەستىرۋدى جۇرگىزۋ تۇرعىسىنان حالىقارالىق ۇيىمدارمەن تىعىز جۇمىس تۋرالى بىرقاتار تاپسىرمالار بەردى.

"ادىرنا" ۇلتتىق پورتالى

پىكىرلەر