تالعار اۋداندىق سوتىندا "حۋتور" توبىنا قاتىسى بار دەگەن كۇدىكپەن ۇستالعان حاسان قاسىمباەۆ پەن تاعى بەس سوتتالۋشىعا قاتىستى سوت ءىسى اياقتالۋعا تايادى، دەپ حابارلايدى "ادىرنا" ءتىلشىسى.
بۇگىن سوتتالۋشىلار سوڭعى ءسوزىن ايتۋى ءتيىس.
قازىرگى تاڭدا اۋداندىق سوت عيماراتىنىڭ الدىندا ونداعان ادام جينالدى. ولار ايىپتاۋلار تەك جابىرلەنۋشىلەردىڭ كۋالىكتەرىنە نەگىزدەلگەنىن جانە جەتكىلىكتى دالەلدەرمەن راستالماعانىن ايتىپ، سوتتان ءادىل شەشىم شىعارۋدى تالاپ ەتۋدە.
«كۇيەۋىمنىڭ ەش كىناسى جوق. ونى ۇيدە ءۇش بالاسى كۇتىپ وتىر. ەگەر ءادىل شەشىم شىعارماسا، ءدال وسى جەردە ءوزىمدى ورتەيمىن»،-دەدى قاسىمباەۆتىڭ جۇبايى زۋلفيا قاسىمباەۆا.
سوت عيماراتىنىڭ ماڭىندا پوليتسيا قىزمەتكەرلەرى مەن جەدەل جاردەم كولىگى كەزەكشىلىكتە تۇر.
ەسكە سالايىق، بۇعان دەيىن مەملەكەتتىك ايىپتاۋشى ەرلان قۇلانباەۆ قاسىمباەۆقا 15 جىل باس بوستاندىعىنان ايىرۋ جازاسىن سۇراعان ەدى. سونداي-اق ايىپتالۋشىلاردان جابىرلەنۋشى تاراپقا بەس ميلليون تەڭگە مورالدىق وتەماقى ءوندىرۋدى ۇسىنعان.
تەرگەۋ نۇسقاسىنا سايكەس، 2021 جىلى قاسىمباەۆ ارالاس جەكپە-جەك جاتتىقتىرۋشىسى ارمان ءالىموۆتى ۇرلاپ، ونى اياۋسىز ۇرىپ-سوققان. سونداي-اق وعان 2016 جىلى ايۋپجان تاجيەۆكە جاسالعان شابۋىل ءىسى بويىنشا تاعى ءبىر ايىپ تاعىلىپ وتىر.
