كەنتاۋدىڭ ەكس-اكىمى راشيد ايۋپوۆ 10 جىلعا سوتتالدى. ۇكىمدى استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتى شىعاردى، دەپ حابارلايدى «ادىرنا» ءتىلشىسى.
ول قىلمىستىق كودەكستىڭ 28-بابى جانە 312-بابى بويىنشا (1997 جىلعى رەداكتسياسى) جازاسىن ورتاشا قاۋىپسىزدىك مەكەمەسىندە وتەيتىن بولادى.
ايۋپوۆقا مەملەكەتتىك قىزمەتتە جۇمىس ىستەۋگە تىيىم سالىندى. بۇدان بولەك ول قىلمىستىق كودەكستىڭ 177-بابى بويىنشا قىلمىستىق جاۋاپكەرشىلىكتەن بوساتىلدى. سوت بۇل باپ بويىنشا قىلمىستىق جاۋاپقا تارتۋ ۋاقىتى ءوتىپ كەتكەنىن ايتتى.
بۇعان دەيىن ەكس-شەنەۋنىككە ءىرى جەكەمەنشىك كومپانياسىنىڭ مەنشىك يەسىن جاۋاپتى لاۋازىمدى تۇلعالارعا اسا ءىرى سومادا پارا بەرۋگە كوندىردى دەگەن ايىپ تاعىلعان ەدى. ول وسى ارەكەت ءۇشىن قۇرىلىس بويىنشا تەندەردە جەڭىستى قامتاماسىز ەتۋگە ۋادە بەرگەن.
ايتا كەتەيىك، راشيد ايۋپوۆ وتكەن جىلى ناۋرىزدا تۇركىستان وبلىسى كەنتاۋ قالاسىنىڭ اكىمى بولىپ تاعايىندالدى.
ال 2019 جىلدىڭ شىلدە ايىنان 2021 جىلعا دەيىن تۇركىستان قالاسىنىڭ اكىمى قىزمەتىن اتقاردى.
