الماتى قالاسىندا قاتتى جاۋىن-شاشىن سالدارىنان جول وپىرىلىپ، كولىكتەرگە زاقىم كەلگەن، دەپ حابارلايدى «ادىرنا» ءتىلشىسى.
وقىس وقيعا اۋەزوۆ اۋدانىنداعى امانجول كوشەسىندە بولعان.
اۋدان اكىمدىگى اپپاراتىنىڭ مالىمەتىنشە، «سپەتسستروي گرۋپپ لتد» جشس بۇعان دەيىن امانجول كوشەسىندە تاراتۋ جەلىلەرى جوباسىنىڭ اياسىندا اۋىزسۋ جانە كارىز ينجەنەرلىك جەلىلەرىن جۇرگىزۋ جۇمىستارىن تولىق كولەمدە اياقتاعان. اسفالتبەتون جامىلعىسىن قالپىنا كەلتىرۋ ۋاقىتشا كەيىنگە قالدىرىلعان.
«بۇل «QazaqGaz» اق تاپسىرىسىمەن 300 مم ديامەترلى بولات گاز قۇبىرىن تارتۋ جوسپارىنا بايلانىستى قابىلدانعان شەشىم ەدى. جول توسەمىن قايتا قازۋدان جانە تۇرعىندارعا قولايسىزدىق تۋعىزۋدان ساقتانۋ ءۇشىن قالپىنا كەلتىرۋ جۇمىستارى گاز قۇبىرى توسەلگەننەن كەيىن جاسالۋعا ءتيىس ەدى»،—دەدى اكىمدىكتىڭ ءباسپاسوز قىزمەتى.
الايدا جاۋىن سۋى قولدانىستاعى ارىق جۇيەسى ارقىلى وسى كوشەگە جينالىپ، جول توسەمىنە تۇسەتىن سالماقتى ارتتىرعان.
«بۇعان قوسا ينجەنەرلىك جەلىلەردى التى مەترگە دەيىنگى تەرەڭدىكتە جۇرگىزۋ توپىراق نەگىزىن جۇمسارتتى. وسى جاعدايعا جانە قاتتى نوسەردىڭ اسەرى جولدىڭ شوگۋىنە جانە جابىننىڭ بۇلىنۋىنە اكەلدى. سونىڭ سالدارىنان 2025 جىلعى 16 قىركۇيەكتە جول جابىنىنىڭ وپىرىلىپ، 13 اۆتوكولىك زاقىمداندى. قازىرگى ۋاقىتتا امانجول كوشەسى جابىلدى. ەندى كولىكتەردى ەۆاكۋاتسيالاۋ، توپىراقتى شىعارۋ جانە جولدى تولىق تازارتقانعا دەيىن باللاست توسەۋ جۇمىستارى باستالادى»،—دەلىنگەن حابارلامادا.
اكىمدىكتىڭ مالىمەتىنشە، مەردىگەر ۇيىم زاقىمدانعان اۆتوكولىكتەردىڭ يەلەرىنە كەلتىرىلگەن شىعىندى تولىق وتەيدى. ماسەلە الماتى قالاسى اكىمدىگىنىڭ باقىلاۋىنا الىنعان.
