تارازدا جەتى ايلىق بالا ساقينا جۇتىپ قويعان. دارىگەرلەر نارەستەنى امان الىپ قالدى، دەپ حابارلايدى «ادىرنا» ۇلتتىق پورتالى.
جامبىل وبلىسى دەنساۋلىق ساقتاۋ باسقارماسىنىڭ مالىمەتىنشە، 7 ايلىق نارەستە جۇتىنۋدىڭ قيىنداۋى، مازاسىزدانۋ شاعىمدارىمەن اۋرۋحاناعا تۇسكەن. اتا-اناسى بالا بوگدە زات جۇتىپ قويعانىن ايتقان. جامبىل وبلىستىق كوپسالالى بالالار اۋرۋحاناسىنىڭ قابىلداۋ بولىمىندە كىشكەنتاي ناۋقاستى حيرۋرگ كەزەكشى ۆاليەۆ قابىلداعان. ناتيجەسىندە، اسپاپتىق زەرتتەۋ ادىستەرىن قولدانۋ ارقىلى بالانىڭ وڭەشىنەن مەتالل زات ساقينا تابىلدى.
سونداي-اق بوتەن زاتتى الىپ تاستاۋ ءۇشىن حيرۋرگيالىق وتا جاساۋ ماقساتىندا نارەستە شۇعىل تۇردە حيرۋرگيا بولىمىنە جاتقىزىلدى.
«مۇقيات دايىندىقتان كەيىن تاجىريبەلى دارىگەرلەر – بالالار حيرۋرگياسىنىڭ ورديناتورى ءالىمجان اۋكەنوۆ، انەستەزيولوگ مۇراتباەۆتان قۇرالعان وپەراتسيالىق توپ وپەراتسيانى ءساتتى ورىنداپ، ەمدەلگەننەن كەيىن بالا امان-ەسەن ۇيىنە شىعارىلدى»، – دەلىنگەن حابارلامادا.
ايتا كەتسەك، وسىعان دەيىن ءبىر جاسار بالا مونشاق جۇتىپ قويىپ، اۋرۋحاناعا تۇسكەن ەدى.
«ادىرنا» ۇلتتىق پورتالى
