تۇركىستان وبلىسى، قازىعۇرت اۋدانىندا ءبىر جاسار بالا دارەتحانا شۇڭقىرىنا قۇلاپ كەتكەن، دەپ حابارلايدى «ادىرنا» ۇلتتىق پورتالى «وتىرارعا» سىلتەمە جاساپ.
بالانى ۇلكەن اعاسى امان الىپ قالدى.
وقيعا اناسى كەنجە ۇلىنىڭ اۋلاسىندا جوقتىعىن بايقاعان كەزدە بولعان. نارەستەنى دارەتحانانىڭ تەرەڭ شۇڭقىرىنان قۇتقارۋ ءۇشىن اتا-اناسى 10 جاستاعى ۇلكەن اعاسىنىڭ كومەگىنە جۇگىنگەن. بەلىنە ارقان بايلانعان ول سەپتيككە ءتۇسىپ، بالانى شۇڭقىردان شىعاردى.
وسى ەرلىگى ءۇشىن تۇركىستان وبلىسىنىڭ توتەنشە جاعدايلار باسقارماسى ءتورتىنشى سىنىپ وقۋشىسىنا العىس ايتىپ، العىس حات تابىس ەتتى.
بۇل بيىل قازاقستاندا كوشەدەگى دارەتحانالاردىڭ كەسىرىنەن تىركەلگەن ءبىرىنشى جاعداي ەمەس. جازدا ورالدا دا وسىنداي وقيعا تىركەلىپ، وكىنىشكە قاراي، ونىڭ سوڭى قايعىلى اياقتالدى: ەكى جاسار قىز كوشەدەگى دارەتحانانىڭ شۇڭقىرىنان ءولى كۇيىندە تابىلدى.
«ادىرنا» ۇلتتىق پورتالى
