الماتى وبلىسىندا 3 جاسار ەگىزدەر مەن 9 جاسار قىزدى زورلاعان ەر ادام باس بوستاندىعىنان ايىرىلدى، دەپ حابارلايدى "ادىرنا" ۇلتتىق پورتالى بالا قۇقىقتارى جونىندەگى ۋاكىل دينارا زاكيەۆانىڭ جازباسىنا سىلتەپ.
“بۇگىن الماتى وبلىسىندا 3 جاسار ەگىزدەر مەن 9 جاسار قىزدى زورلاۋ فاكتىسىنە قاتىستى ءىس بويىنشا سوڭعى سوت وتىرىسى ءوتتى. بالالارعا قارسى جاسالعان جاعا ۇستاتارلىق قىلمىستار تۋرالى مەن قاراشا ايىندا الماتى وبلىسىنا بارعان سوڭ جازعان بولاتىنمىن . ەر ادام ءومىر بويىنا، ونىڭ ايەلى (3 جاسار قىزدىڭ اجەسى جانە 9 جاسار قىزدىڭ اناسى) 25 جىلعا باس بوستاندىعىنان ايىرىلدى”، – دەپ جازدى زاكيەۆا Instagram جەلىسىندە.
سونىمەن قاتار، ونىڭ ايتۋىنشا، لاۋازىمدى تۇلعالاردىڭ ءىس-ارەكەتىنە قۇقىقتىق باعا بەرۋگە قاتىستى وبلىس پروكۋراتۋراسى قىلمىستىق جاۋاپكەرشىلىكتەن جالتارۋ، قىزمەتتەگى نەمقۇرايلىلىق، ارەكەتسىزدىك بەلگىلەرى بويىنشا قىلمىستىق ءىس قوزعادى.
ەسكە سالساق، بۇعان دەيىن الماتى وبلىسىندا 40 جاستاعى ەر ادام ءۇش جاسار ەگىز قىزداردى زورلادى دەپ كۇدىككە ىلىنگەنى تۋرالى جازعان ەدىك. كەيىننەن ەگىزدەردىڭ اپكەسىنىڭ دە زورلىق كورگەنى انىقتالعان ەدى.
