جاقىندا عانا 9 مامىر جەڭىس كۇنى "ماڭگىلىك پولك" شەرۋى بۇكىل قازاقستاندى اياعىنان تىك تۇرعىزىپ ەدى. بىرەۋلەر قولداپ، ەندى ءبىرى قارسى بولىپ، قازاق قوعامىن ەكىگە ءبولىپ تاستاعان بولاتىن. وسىعان قاراما-قارسى بالاما رەتىندە "اق جول" پارتياسىنىڭ توراعاسى ازات پەرۋاشەۆ ساياسي قۋعىن-سۇرگىن قۇرباندارىن ەسكە الۋ ۇشىن «الاشقا تاعزىم» اتتى شەرۋ وتكىزۋ جايلى ۇسىنىس تاستاعان بولاتىن. بۇل ۇسىنىس قوعامنان قولداۋ تاپقانمەن بيلىكتەن قولداۋ تاپپادى. نۇر-سۇلتان قالاسىنىڭ اكىمدىگى «اق جول» پارتياسىنىڭ "الاشقا تاعزىم" شەرۋىنە رۇقسات بەرمەدى. بىراق، "اقجولدىقتار" دا بەرسە قولىنان، بەرمەسە جولىنان دەپ، نار تاۋەكەلگە بارىپ وتىر. «اق جول» پارتياسى اكىمدىكتىڭ تىيىم سالۋىنا قاراماستان «الاشقا تاعزىم» اتتى ءىس-شاراسىن وتكىزەدى. بۇل تۋرالى ازات پەرۋاشەۆ الەۋمەتتىك جەلىلەردە تاراعان بەينەۇندەۋىندە حابارلادى.
"قۇرمەتتى قازاقستاندىقتار!
جۋىردا نۇر-سۇلتان قالاسىنىڭ اكىمدىگى «اق جول» پارتياسىنىڭ ساياسي قۋعىن-سۇرگىن قۇرباندارىن ەسكە الۋ ۇشىن «الاشقا تاعزىم» اتتى شەرۋ وتكىزۋ جايلى ۇسىنىسىنا رۇقسات بەرمەدى.
رۇقسات بەرمەۋگە نەگىز بولعان سەبەپتەرى – قىپ-قىزىل وتىرىك. ءبىزدىڭ وتىنىشىمىزدە بارلىق قاجەتتى اقپارات زاڭعا سايكەس كورسەتىلگەن بولاتىن.
مەملەكەتتىك ورگانداردى دا تۇسىنۋگە دە بولادى: ولار سايلاۋ كەزىندە ءتۇرلى ارانداتۋلار مەن باسسىزدىقتاردان قاۋىپتەنىپ وتىرعان شىعار.
سوندىقتان مىنانى ايتقىم كەلەدى: ەشكىم وتقا ماي قۇيىپ، كوپشىلىكتى اشىندىرۋعا مۇددەلى ەمەس. مەملەكەتتىك ينستيتۋتتاردى السىرەتۋ - ازاماتتاردىڭ وزدەرى ءۇشىن دە، مەملەكەت ءۇشىن دە قاۋىپتى نارسە. ال ۇلتتىق تاۋەلسىزدىگىمىز بەن جەرىمىزدىڭ تۇتاستىعىن ساقتاۋ ءۇشىن كۇشتى مەملەكەت كەرەك.
سونىمەن قاتار، ول جاي كۇشتى عانا ەمەس، اركىم ءوزىنىڭ مۇمكىندىكتەرى مەن قۇقىقتارىن جۇزەگە اسىرا الاتىن ادىلەتتى دە، وزىق مەملەكەت بولۋى ءتيىس.
جوعارىدا ايتىلعاندارعا بايلانىستى، «الاشقا تاعزىم» شەرۋىنە رۇقسات بەرمەگەنىمەن، «اق جول» پارتياسىنىڭ جەتەكشىلەرى مەن دەپۋتاتتارى 31 مامىر كۇنى «الاش» قايراتكەرلەرى جانە قۋعىن-سۇرگىنگە ۇشىراعان اتا-بابالارىنىڭ پورترەتتەرىمەن ۇلتىنىڭ ازاتتىعى ءۇشىن كۇرەسكەن قۇربانداردىڭ ەسكەرتكىشىنە بارىپ، گۇل قويىپ، قۇران باعىشتايتىنىن حابارلايدى.
بۇل ميتينگ ەمەس، سوندىقتان ءبىز وسى جولى ەشكىمنەن رۇقسات سۇرامايمىز. ءبىزدىڭ قازاق رەسپۋبليكاسىنىڭ بولاشاعى ءۇشىن قۇربان بولعاندارعا تاعزىم ەتۋگە تولىق كونستيتۋتسيالىق حاقىمىز بار" دەگەن ازات پەرۋاشەۆتىڭ بەينە ۇندەۋىندە.
راسىمەن دە قازاقتىڭ ەگەمەن ەل بولۋىن ءبىر عاسىر بۇرىن ارمانداپ، سول ارمان جولىندا، ۇلت مۇراتى ءۇشىن باستارىن بەرگەن ارىستارىمىزعا جىل ون ەكى اي قۇرمەت قىلساق تا، جاراسادى. ال، باباعا دەگەن قۇرمەت پەن تاعزىم، ول جاس ۇرپاقتىڭ ساناسىنا پاتريوتتىق رۋح بولىپ قۇيىلارى ءسوزسىز.
